Përballja e tensionuar Thaçi-Vuciq në Mynih, flasin për marrëveshje ku të dy palët kënaqen

Në një debat të organizuar nga ish-ambasadori gjerman, Wolgang Ichinger, janë përballur presidenti i Kosovës, Hashim Thaçi dhe ai i Serbisë, Aleksander Vuçiq, ku është folur për vazhdimin e dialogut ndërmjet Kosovës dhe Serbisë dhe arritjen e një marrëveshje finale.

Në këtë debat ka qenë i pranishëm edhe eurokomsioneri Johanes Hahn.

Presidenti serb, ka thënë se Serbia është e përkushtuar për vazhdimin e dialogut në mënyr që të arrihet një marrëveshje finale që do të ketë bazë një kompromis ku të dy palët do të jenë fitimtare.

Ai ka thënë se për këtë gjë është i gatshëm që të rrezikojë edhe karrierën e tij politike dhe shumë më shumë, e për këtë thotë se është i njoftuar edhe Johanes Hahn dhe Hashim Thaçi.

Sipas Vuçiqit, nuk duhet që të merren për bazë opinionet e shteteve të tjera sa i përket arritjes së marrëveshjes, sepse një marrëveshje finale ndërmjet Kosovës dhe Serbisë, do të jetë vetëm për qytetarët e këtyre dy shteteve.

“Do të bëjmë gjithçka për të arritur një zgjidhje kompromisi. Nuk do të jetë një marrëveshje për kapitullimin e njërës, palë këtë rast Serbisë. Çështja më e rëndësishme është se di të jetë raporti ndërmjet serbëve dhe shqiptarëve. Ky dialog është për ne, nuk është as për BE-në, as për SHBA-të. Këtë ia kam thënë Thaçit disa herë. Nëse do të punojmë fortë , nuk e mohoj mundësinë e arritjes së marrëveshjes, por sot mund të them se jemi shumë larg marrëveshjes”, ka thënë Vuçiq, raporton Gazeta Express.

Ndërkohë presidenti i Kosovës, Hashim Thaçi, pasi e ka marrë fjalën, ka thënë se problemi ndërmjet Kosovës dhe Serbisë është shumë më i komplikuar se sa çështja ndërmjet Maqedonisë dhe Greqisë, për shkak të kaluarës dhe luftës së vitit 1999.

Thaçi ia ka përmendur Vuçiqit luftën që Serbia ka bërë për mos anëtarësimin e Kosovës në INTERPOL dhe UNESCO, që si pasojë ka pasur më pas vendosjen e taksës ndaj produkteve serbe.

Presidenti ka thënë se janë dukë bërë përpjekje për arritjen e një marrëveshje që si rezultat përfundimtar të ketë njohjen e pavarësisë së Kosovës nga Serbia.

Por vazhdimi i dialogut sipas presidenti duhet të vazhdojë pa kushte, sepse nëse do të ishte ashtu, atëherë Kosova do të kishte 1001 arsye për të vendosur kushte për Serbinë.

“Jam i impresionuar me marrëveshjen e Maqedonisë dhe Greqisë, dhe tani mendoj se kemi edhe një problem tjetër në Ballkanin Perëndimor. Mendoj se çështja ndërmjet Kosovës dhe Serbisë, është shumë më e komplikuar se sa ajo ndërmjet Maqedonisë dhe Greqisë. Sot do të flas për të ardhmen e raporteve ndërmjet Kosovës dhe Serbisë, por me lejoni disa pika rreth Brukselit. Marrëveshja e 2013 ishte një sukses, disa pika janë implementuar, dhe disa po implemeneohet. Ajo çfarë më intereson, është se ku jemi tani. Jemi në një situatë të status-quos. Jemi duke bërë përpjekje për arritjen e një marrëveshje, e cila do të ketë rezultat njohjen e pavarësisë dhe integrimin e Kosovës në OKB. Ajo çfarë ndodhi në UNESCO dhe INTERPOL, u pasua nga tarifa. Dialogu duhet të vazhdojë pa ndonjë kushtëzim. Ne kemi 1001 kushte për të vendosur në dialog por nuk e bëjmë. Ka sfida ndërmjet nesh. Komuniteti serb nuk duhet të shfrytëzohet vetëm për qëllime politike. Në muajt që po vijnë, do të gjejmë një marrëveshje të mirë, që të do të ruaj multietnicitetin e Kosovës. Kjo marrëveshje do të ndihmojë paqen dhe stabilitetin e rajonit. Kosova është duke marrë të gjitha përgjegjësitë”, ka thënë Thaçi.

Presidenti gjithashtu i ka kujtuar Vuçiqit dhe komunitetit ndërkombëtar se deri sot askush nuk është dënuar për krimet që serbët kanë kryer ndaj popullatës civile në Kosovë gjatë luftës së fundit.

“Kush është dënuar për mijëra kosovarët që janë vrarë në serbët në luftën e fundit, dhe kush është dënuar për dhunimet që janë bërë. Askush nuk e ka bërë, askush nuk është dënuar. Kosova është viktima e madhe, që është përballë me spastrim etnik”, ka thënë Thaçi, raporton Express.

Pas fjalës së Thaçit është përgjigjur menjëherë Vuçiq, duke thënë se sa herë kur diskutohet për pikat e marrëveshjes që nuk i ka përmbushur Prishtina, flitet për krimet që Serbia ka kryer gjatë luftës së fundit në Kosovë.

Presidenti serb, thotë që pika për të cilën Thaçi tha që ka mbetur pa u implementuar ende është Asociacioni i Komunave Serbe, që për Thaçin duhet të jetë në përputhje më Kushtetutën e Republikës së Serbisë.

Por Vuçiq thotë se Serbia nuk e njeh Republikën e Kosovës dhe nuk i intereson fare Kushtetuta e Republikës së Kosovës.

Ndërkohë sa i përket krimeve të luftës që ia përmend Thaçiq, Vuçiq thotë se ai nuk po tregon se çfarë ka ndodhur me serbët të cilët janë dëbuar gjatë luftës së vititi 1999.

“Para së gjithash në fillim ai tha që shumë gjëra janë përmbushur, dhe është vetëm një që nuk është mbushur, që është Asociacioni i Komunave Serbe. Ai tha që diçka që është në kundërshtim me Kushtetutën, nuk mund të themelohet. Neve nuk ka intereson Kushtetua e tyre, sepse ne nuk e njohim Kosovën si shtet. Po ta them një gjë: Jeni duke folur për mijëra refugjatë të cilët janë detyruar ta lënë Kosovën. Mendoj se sot është e ekzagjeruar, nuk ka rëndësi numri, por të gjithë janë kthyer në Kosovë. Por a e dini se çfarë ka ndodhur serbët që janë larguar nga Kosova në luftën e vitit 1999. Vetëm një përqindje e vogël janë kthyer në shtëpitë e tyre. Unë mund të flas për javë të tëra për krimet që janë bërë ndaj serbëve gjatë kohës së luftës. Por nuk po dua të vazhdojë, po e mbyll këtu këtë çështje”, ka thënë Vuçiq, raporton Gazeta Express.

Presidenti serb ndërkohë ka akuzuar palën shqiptare se nuk po i përmbahen marrëveshjeve që po i nënshkruajnë, dhe sipas tij për të arritur një marrëveshje dhe për ta zgjidhur problemin një herë e përgjithmonë, Serbisë i duhet një partner i përgjegjshëm.

Sipas Vuçiqit as Kosovës e as Serbisë nuk duhet t’i interesojë se çfarë thonë shtetet tjera, sepse marrëveshja finale do të bëhet ndërmjet dy popujve më të mëdhenj në Ballkan.

Ai thotë se kjo marrëveshje duhet të jetë win-win për të dyja palët.

“Ne dëshirojmë t’i zgjidhim problemet me shqiptarët, një herë e përgjithmonë. Por ne na duhet një partner i përgjegjshëm. Në duhet ta bëjmë këtë për veten tonë. Nuk duhet të shqetësohemi se çfarë thonë partnerët ndërkombëtar. Është një marrëveshje ndërmjet dy popujve më të mëdhenj në Ballkan. Jam gati të rrezikojë karrierën time, dhe më shumë se aq , vetëm që të provojmë të arrijmë një marrëveshje . Por duhet të jetë një marrëveshje, që të dy palët do të jemi të kënaqur. Do të jetë një marrëveshje win/win” ka thënë Vuçiq.

Ai ka folur edhe për taksën, duke thënë se si pasojë e atij vendimi, Serbia është duke humbur miliona euro, por për dallim nga Kosova nuk është duke ndërmarr ndonjë masë që do të dëmtontë shqiptarët.

“Ne nuk po vendosim kushte, kemi përmbushur të gjitha kushtet e Brukselit. Po humbim miliona euro nga taksa e vendosur. Ne nuk dëshirojmë që të dëmtojmë Kosovën. Sepse jemi të përkushtuar Jam i gatshëm që të vazhdojmë dialogun, Thaçi e di këtë. Asnjëherë unë nuk e kam thënë asnjë fjalë të keqe për shqiptarët”, ka thënë Vuçiq, raporton Gazeta Express.

Ndërkohë në mes të këtij debati ka ndërhyrë edhe Wolfgang Ichinger i cili ka thënë se është e rëndësishme që të arrihet një marrëveshje, dhe sipas tij një gjë e tillë nuk është e pamundur.

“Nuk është e pamundur të zgjidhet ai konflikt. Por fundamentale është që mund të bëhet”, ka thënë Ichinger,.

Edhe Johanes Hahn ka folur pas këtij debati, duke thënë se nuk mendon se cështja ndërmjet Kosovë dhe Serbisë është më e komplikuar se sa ajo ndërmjet Maqedonisë dhe Greqisë për emrin.

Sipas Hahn, në momentin kur të dy palët vendosin masa bllokuese ndërmjet njëra-tjetrës, jo vetëm që e bllokojnë shtetet e tyre, por e bllokojnë të gjithë rajonin.

Hahn është pajtuar me Vuçiqin që marrëveshja finale ndërmjet dy shteteve duhet të jetë një marrëveshje ku fitojnë të dyja palët.

Ai thotë se tani është momenti për të arritur marrëveshjen finale, dhe ky moment nuk duhet të humbet.

“Nuk jam i sigurt nëse është e sigurt që çështja e Maqedonisë është me e komplikuar se çështja ndërmjet Kosovës dhe Serbisë. Ky dialog është çështja më e rëndësishme e rajonit të Ballkanit Perëndimor. Kur këta e bllokojnë njëri –tjetrin, këta e bllokojnë të gjithë regjionin. Palët duhet të punojnë për arritjen e marrëveshjes. Nëse humbim, kohë, ne humbim momentin. Unë iu them që të gjeni një marrëveshje , që do të jetë pjesë e marrëveshjes, ku të dy palët do të fitojnë. Kjo është një gjë që të gjithë ta kuptojnë”, ka thënë Hahn, raporton Gazeta Express.

Më pas Thaçi i ka kujtuar Vuçiqit se të gjithë e dinë se kush ishte agresori gjatë luftës së fundit në Kosovë dhe se historia nuk mund të rishkruhet.

Sa i përket Asociacionit, Thaçi thotë se ai duhet të jetë vetëm në përputhje me Kushtetutën e Republikës së Kosovës.

Presidenti i Kosovës thotë se njohja që pavarësisë së Kosovës nga Serbia nuk është një dhuratë, por diçka që do të burojë si pasojë e marrëveshjes finale.

“Vuçiq tha që do të mbrojë serbët. Është e lehtë të krijosh drama, dhe ta luash viktimën. Ne nuk mund ta rishkruajmë historinë, të gjithë e dinë historinë dhe atë çfarë ndodhi në vitin 1999 dhe spastrimin etnik që ka ndodhur.

Sa i përket asociacionit të komunave ne jemi pajtuar që ai të themelohet në përputhje më Kushtetutën e Republikës së Kosovës.

“Vuçiq duhet ta kuptojë që Kosova është shtet i pavarur i njohur nga 116 vende të botës. Unë dhe Vucic kemi dallime ndërmjet, megjithatë po përpiqemi për të gjetur një marrëveshje. Njohja e Kosovës nga Serbia nuk do të jetë një dhuratë, por do të jetë një kompromis ndërmjet Prishtinës dhe Beogradit. I ftoj të gjitha shtetet, që të jenë sa më unike në mbështetjen e dialogut. SHBA-të janë shumë të qarta sa i përket kësaj çështje. E di që ka shumë skepticizëm. Por nuk kam parë ndonjë ide tjetër, se si duhet të dalim nga kjo situatë. Derisa nuk e zgjidhim këtë situatë, mundësia për të ndërhyrë e shteteve të tjera në këtë çështje është shumë më e madhe”, ka thënë Thaçi./GazetaExpress/

RITRANSMETIM NË FACEBOOK

RITRANSMETIM NË FACEBOOK: KONFERENCA NË MUNIH

Posted by Hashim Thaçi on Saturday, February 16, 2019

Trump edhe zyrtarisht i kërkon Serbisë ta njohë Kosovën si shtet

Presidenti i Shteteve të Bashkuara të Amerikës, Donald Trump, i ka dërguar një letër presidentit të Serbisë, Aleksandar Vuçiq, me rastin e Ditës së Republikës së Serbisë, raportojnë mediat në Serbi.

Përveç urimeve, presidenti amerikan i ka kërkuar homologut serb Vuçiq, të arrihet një marrëveshje me Kosovën që do të rezultonte me njohjen e ndërsjellë, transmeton Telegrafi.

Në letrën e presidentit të SHBA-së, Donald Trump thuhet:

I nderuar zotëri president,

Në emër të popullit amerikan, kam kënaqësinë t’iu dërgojë urimet më të sinqerta me rastin e Ditës së Republikës së Serbisë.

Këtë vit, në festimin e 100 vjetorit të valimit të flamurit serb në Shtëpinë e Bardhë, duhet të nisemi nga ajo që të sigurojmë që shekulli i ardhshëm i partneritet tonë të jetë i ngjashëm me atë të kaluarin sa i përket përkushtimit për paqe, prosperitet dhe liri.

Shtetet e Bashkuara të Amerikës mbeten të palëkundura në mbështetjen e përkushtimit tuaj sa i përket thellimit të bashkëpunimit rajonal, në veçanti në angazhimin tuaj për normalizimin e raporteve me Kosovën.

Derisa ju mbetet palëve të arrijnë marrëveshje që të dyja mund ta mbështesin, konsiderojmë se njohja e ndërsjellë do të duhej të ishte elementi qendror i normalizimit të raporteve.

Një marrëveshje e tillë historike, me njohje në tërësinë e saj, do të ndërtonte rrugën për qëllimin e integrimit euroatlantik të Serbisë dhe rritjen ekonomike – thuhet në letrën e presidentit Trump.

Dokument: 11 parimet e Platformës së Dialogut me Serbinë nga ekipi negociator

Ekipi negociator për dialogun Kosovë-Serbi, ka hartuar platformën lidhur me këtë proces, platformë kjo e cila pritet të votohet nga Kuvendi i Kosovës.

Draft- Platforma e hartuar, i jep goditje idesë së presidentit Hashim Thaçi për korrigjim e kufijve. Në draft- platformën të cilën e ka siguruar Telegrafi, theksohet qartë se sovraniteti i Kosovës është i padiskutueshëm.

Ekipi negociator në këtë draft-platformë ka përmendur 11 parimet kryesore, mbi të cilat do të zhvillohet dialogu Kosovë-Serbi dhe pritet të arrihet edhe marrëveshja me Serbinë.

Në këto parime përveç çështjes së sovranitetit të Kosovës, përmenden edhe çështja e të pagjeturve.

Po ashtu theksohet se marrëveshja përfundimtare, gjithëpërfshirëse dhe ligjërisht e detyrueshme duhet tё jetё e çartë dhe pa dykuptimësi.

Më poshtë ju sjellim parimet e plota dhe përmbajtjen e tyre:

Parimi 1, thekson se qëllimi kryesor i Republikës së Kosovës është që nga Republika e Serbisë të sigurojë njohjen dhe pranimin e qartë të sovranitetit të Kosovës, si shtet i pavarur, me zotime ligjërisht të detyrueshme:

(a)të ndërpresë të gjitha aktivitetet që pengojnë Republikën e Kosovës në rrugën drejt njohjes ndёrkombёtare si shtet i pavarur dhe sovran;

(b)të respektojë sovranitetin dhe integritetin territorial të Republikës së Kosovës;

(c) të heqë dorё nga kundërshtimi, ose ndikimi mbi palët e treta që të kundërshtojnë, çfarëdo aplikimi nga Republika e Kosovës për anëtarësim në organizatat ndërkombëtare përfshirë Kombet e Bashkuara, Bashkimin Evropian, Këshillin e Evropës, OSBE-në, dhe agjencitë e tyre; dhe

(d) të heq dorё nga të gjitha format e ndërhyrjes në çështjet e brendshme apo marrëdhëniet ndërkombëtare të Republikës së Kosovës. Republika e Kosovёs beson se kjo ёshtё e vetmja mënyrë efektive për të nxitur bashkëpunimin midis dy shteteve, për të arritur progres në rrugën drejt Bashkimit Evropian dhe përmirësimit të jetës së qytetarëve, siç edhe parashihet nga Rezoluta e Asamblesë së Përgjithshme të Kombeve të Bashkuara të datёs 9 shtator 2010.

Në parimin 2 përmendet qartë se nuk ka marrëveshje për asgjë deri sa të mos ketë marrëveshje për gjithçka. Siç ёshtё theksuar nё Parimin 1, njohja e ndërsjellë duhet tё jetё rezultati primar, shkruan Telegrafi.

Parimi 3 sipas kësaj platforme thuhet se: Kushtetuta e Kosovёs e cila ka pёrfshirё obligimet e dala nga Plani i Ahtisaarit nuk është e hapur për negocim. Ky Plan shënoi pёrmbylljen e njё procesi tё negociatave tё autorizuara nga Kombet e Bashkuara për statusin përfundimtar të Kosovës dhe mori përkrahjen e shumicës së bashkësisë ndërkombëtare si zgjidhja përfundimtare. Plani shpreh në mënyrë eksplicite atë që kërkohej nga të dyja palët për arritjen e një zgjidhjeje të drejtë, duke imponuar një sërë koncesionesh mbi Republikën e Kosovës pёr ofrimin e garancive për të drejtat e komuniteteve në Kosovë, veçanërisht komunitetin serb. Kosova i ka zbatuar me përkushtim tё gjitha dispozitat e Planit të Ahtisaarit.

Parimi 4: Objektivat politike të Republikës së Kosovës në procesin e dialogut synojnë zgjidhjen e të gjitha çështjeve të hapura me Republikën e Serbisë, duke përfshirë:

(a) heqjen e të gjitha pengesave të mbetura ndaj ushtrimit të pavarur të kompetencave sovrane të qeverisjes, në përputhje me parimet e mosintervenimit dhe mos-ndërhyrjes;

(b) avancimin e të drejtave të komunitetit shqiptar që jetojnë në Republikën e Serbisë, në reciprocitet tё plotё me komunitetin serb në Republikën e Kosovës;

(c) promovimin e respektimit nga të gjitha palët e së drejtës ndërkombëtare për të drejtat e njeriut dhe refugjatët, së bashku me standardet përkatëse ndërkombëtare të qeverisjes demokratike, llogaridhënëse dhe transparente; dhe

(d) krijimin e mekanizmave të përshtatshëm për të adresuar krimet e luftës, shkeljet e të drejtave të njeriut dhe drejtës humanitare, përfshirë zbardhjen e fatit tё tё pagjeturve, si dhe reparacionin.

Parimi 5: Marrëveshja përfundimtare, gjithëpërfshirëse dhe ligjërisht e detyrueshme duhet tё jetё e qartё dhe pa dykuptimёsi. Pёrvoja tregon se qasja e dykuptimёsisё konstruktive ka rezultuar nё zbatimin asimetrik të marrëveshjeve të arritura deri më tani. Kjo praktikë mund të rezultojë me stagnim dhe mosmarrëveshje eventuale. Dialogu duhet të vazhdoj derisa të dyja palët të ndajnë një kuptim dhe interpretim të përbashkët të asaj se çfarë është rënë dakord.

Parimi 6: Çdo marrëveshje përfundimtare duhet të jetë plotësisht në përputhje me Kushtetutën e Republikës së Kosovës, e cila parasheh që “sovraniteti dhe integriteti territorial i Republikës së Kosovës është i pacenueshëm, i patjetërsueshëm dhe i pandashëm dhe mbrohet me të gjitha mjetet e përcaktuara me këtë Kushtetutë dhe me ligj” (Neni 2(2)). Integriteti territorial i Kosovës garantohet gjithashtu nga e drejta ndërkombëtare.

Parimi 7: Në Republikën e Kosovës nuk mund të ketë një nivel tjetër të qeverisjes përveç nivelit lokal dhe qendror. Republika e Kosovës është e përkushtuar për respektimin e dispozitave të Kushtetutës dhe Planit të Ahtisaarit për bashkëpunimin ndër-komunal, por këto dispozita nuk mund të rezultojnë në nivel tjetër të qeverisjes.

Parimi 8: Në përputhje me Kushtetutën dhe ligjet e saj, të drejtat mbi burimet natyrore dhe asetet të cilat janë në territorin sovran të Republikës së Kosovës, janë ekskluzivisht të Republikës së Kosovës dhe rrjedhimisht nuk janë të hapura për negociim.

Parimi 9: Pёr Republikёn e Kosovёs marrëveshja përfundimtare, ligjërisht e detyrueshme hyn nё fuqi, vetёm pas plotёsimit tё kushteve nё vijim a) Serbia ka njohur Kosovёn si shtet të pavarur dhe sovran, b) referendumi pёr marrёveshjen ёshtё mbajtur nё Kosovё, dhe c) marrёveshja ёshtё ratifikuar nga Kuvendet e tё dyja shteteve.

Parimi 10: Para dakordimit lidhur me formatin dhe rrjedhën e procesit të dialogut, Republika e Kosovës do të kërkojë masa të ndërtimit të besimit nga Republika e Serbisë. Këto masa përfshijnë:

(a) Zotimin që, në kuadër të marrëveshjes për të gjitha çështjet e tjera, delegacioni serb e ka autoritetin që të bie dakord për Parimin 1;

(b) Zotimin nga Republika e Serbisë se do t’i ndërpresë menjëherë të gjitha aktivitetet diplomatike apo aktivitetet tjera që synojnë të pengojnë ose minojnë njohjen e Kosovës nga shtetet e tjera gjatë kohës sa dialogu është duke vazhduar, dhe se do të përmbahet nga kundërshtimi, ose nga inkurajimi i shteteve të tjera për të kundërshtuar, i aplikimeve të vazhdueshme të Kosovës për anëtarësim në organizatat ndërkombëtare.

Parimi 11: Në ushtrimin e mandatit të tij, Delegacioni Shtetëror do të funksionoj nёn premisat si nё vijim:

11.1 Transparenca: Delegacioni do të sigurojë informim të rregullt publik dhe parlamentar mbi ecurinë e dialogut.

11.2 Gjithëpërfshirja: Procesi negociues do të zhvillohet në atë mënyrë që të mundësojë përfaqësimin e interesave të gjithë qytetarëve të Kosovës. Do të ketë një përbërje të gjerë të Delegacionit Shtetëror, të komisionit mbikëqyrës parlamentar dhe të organeve të tjera të përfshira në këtë proces.

11.3 Qasja: Për ato grupe tё interesit që nuk përfaqësohen, Delegacioni Shtetёror do të krijojë një mekanizëm kontakti për të mundësuar pjesëmarrjen efektive në proces. Qёndrimet dhe sygjerimet e tilla do të merren parasysh dhe do të bëhen publike.

11.4 Konsensusi politik: Çdo herё që është e mundur, pozicionet negociuese duhet të merren nё konsensus politik midis partive parlamentare. /Telegrafi/

Çka është “Diplomacia fluturuese”, që po përmendët në dialog me Serbinë ?

Procesi i dialogut ndërmjet Kosovës dhe Serbisë vazhdon të mbetet i bllokuar si pasojë e vendimit të Qeverisë së Kosovës për vendosjen e tarifës doganore 100 për qind ndaj importeve nga Serbia dhe Bosnjë e Hercegovina.

Por, përkundër këtij fakti, përfaqësuesit e ekipit negociator të Kosovës thonë se aktualisht po punohet në platformën për fazën finale të dialogut Kosovë-Serbi, që po zhvillohet në Bruksel me lehtësimin e Bashkimit Evropian.

Një takim i ri ndërmjet presidentëve të Kosovës dhe Serbisë, sipas Bashkimit Evropian, nuk pritet të realizohet përderisa Kosova e mban në fuqi tarifën doganore. Edhe SHBA-ja u ka bërë thirrje autoriteteve në Prishtinë që të pezullojnë tarifën, duke i cilësuar veprimet kundër dialogut në kundërshtim me interesat amerikane.

Në një situatë të tillë, mbetet të shihet nëse BE-ja apo edhe SHBA-ja do të aktivizojnë edhe diplomacinë për realizimin e takimeve të ndara me palët në Prishtinë dhe në Beograd, në përpjekje të arritjes së pajtimit për vazhdimin e dialogut.

Njëri nga kryesuesit e ekipit negociator, Fatmir Limaj, i cili është edhe zëvendëskryeministër i Kosovës, tha për Radion Evropa e Lirë se Shtetet e Bashkuara të Amerikës janë mbështetësi kryesor i këtij procesi që po lehtësohet nga Bashkimi Evropian. Sipas tij, një marrëveshje finale ndërmjet Kosovës dhe Serbisë do të duhet të garantohej nga SHBA-ja dhe BE-ja.

Limaj nuk e ka mohuar e as pohuar se gjatë procesit të dialogut mund të ketë ndryshim të qasjes së dialogut, duke i dhënë edhe një dimension të ri përmes aktivizimit të diplomacisë fluturuese apo siç njihet edhe me termin ndërkombëtar “shuttel diplomacy”.

“Se rrugës (dialogu) a mund të ndryshojë, tash për tash është herët për të folur. Por, ky është pozicioni dhe është pozicion ndihmues për Kosovën. Unë besoj se ka ardhur koha që edhe Kosova edhe Serbia të ulën drejtpërdrejt edhe të mbyllin çështjet e tyre të hapura, gjithmonë me prezencën e partnerëve tanë të fuqishëm që na kanë ndihmuar ta ndërtojmë këtë shtet dhe të vijmë deri këtu ku jemi tani”, tha Limaj.

Nga ana tjetër, politologët nuk e përjashtojnë mundësinë që në faza të caktuara gjatë procesit të dialogut ndërmjet Kosovës dhe Serbisë të ketë edhe “diplomaci fluturuese”.
Profesori i shkencave politike, në Universitetin e Prishtinës, Arben Hajrullahu, tha për Radion Evropa e Lirë se asnjë lloj forme apo metode nuk do të kontribuojë në zgjidhjen e qëndrueshme të konfliktit ndërmjet Serbisë dhe Kosovës, përderisa nuk krijohen parakushtet për paqe.

“Teorikisht do të ishte e mundur që në faza të caktuara gjatë procesit të dialogut mes Serbisë dhe Kosovës, apo siç e quajnë ata që nuk e njohin pavarësinë e Kosovës, si p.sh. BE, dialogu mes Prishtinës dhe Beogradit, të aplikohet edhe “shuttle diplomacy” [diplomacia fluturuese]. Megjithatë, asnjë lloj forme e metode nuk mendoj se do të kontribuojë në zgjidhjen e qëndrueshme të konfliktit serbo – kosovar, përderisa nuk krijohen parakushtet për paqe. E për këtë të themi që kërkim-falja shtetërore nga palët për krimet e kryera në emër të tyre, ofrimi i informatave për personat e pagjetur, e kështu me radhë, do të ishin shenja të vullnetit dhe të gatishmërisë për të tejkaluar konfliktet dhe për t’i dhënë një mundësi paqes së qëndrueshme në këto hapësira”, tha Hajrullahu.

Hajrullahu konsideron se jetësimi i të gjitha marrëveshjeve që janë arritur deri më tani do të ishte një veprim i duhur për të ecur përpara procesi.

“Me elitat politike aktuale në vendet gjegjëse nuk ngel shumë vend për optimizëm për një zgjidhje që do të ofronte paqe të qëndrueshme, e që po trumbetohet si marrëveshje historike”, tha Hajrullahu.

Edhe politologu, Ramush Tahiri, thotë se diplomacia fluturuese është një mundësi, apo siç thotë ai, një variant i mirë. Por, sipas Tahirit, në këtë fazë të ‘ngurtë të procesit’ nuk mund të këtë dhe as që mund të punohet në këtë drejtim.

“Në këtë fazë edhe diplomacia fluturuese nuk jep ndonjë rezultat, sepse duket se asnjëra palë nuk po pajtohet. Mirëpo, diplomacia e fshehur dhe diplomacia që është konkrete mund të arrijnë marrëveshjen përfundimtare. Kjo nuk nënkupton ketë Ekipin negociator, por nënkupton nivel të presidentëve ose kryeministrave, personalitete që e kanë të drejtën ligjore dhe kushtetuese për nënshkrimin e marrëveshjeve të tilla dhe që në një mbledhje pak a shumë solemne, pa debat në Kuvend të miratohet”, tha Tahiri.
Tahiri, konsideron se tash kur procesi i dialogut është kthyer në pikën zero, siç thotë ai, dhe kur ka një mosbesim në Prishtinë te presidenti Hashim Thaçi, nuk mund të ketë nisma për një proces të tillë të bisedimeve, ndonëse si mundësi ekziston.

“Diplomacia ‘shuttle’, ose ndërmjetësuese apo fluturuese mund të përdoret, edhe zakonisht përdoret sepse shkojnë bashkëbiseduesit që janë të besueshëm në të dyja palët dhe bëjnë ndërmjetësimin dhe kur të afrohen debatet takohen fshehurazi, po flas për teknikat e bisedimeve. Dhe, kështu arrihet marrëveshja e cila dakordohet në çdo pikë dhe siç ka thënë presidenti (i SHBA-së, Donald) Trump, palët më pas shkojnë në Shtete e Bashkuar të Amerikës dhe e nënshkruajnë”, tha Tahiri.

Sido që të jetën gjatë kësaj jave Ekipi negociator, pritet të dorëzojë në Kuvendin e Kosovës platformën e negociatave mes Kosovës dhe Serbisë, ku me pas Kuvendi pritet ta miratojë.

Presidenti i Kosovës, Hashim Thaçi, pas kthimit nga Amerika ka thënë se ka marrë porosi të qartë se pa pezullimin e tarifës doganore ndaj mallrave nga Serbia dhe Bosnjë e Hercegovina, nuk mund të vazhdojë dialogu në Bruksel. /rel/

Deklarata qesharake e Vuçiqit

Presidenti serb, Aleksandar Vuçiq ka reaguar pasi ‘të gjitha mediat në Kosovë si lajm kryesor dje kishin protestat kundër tij’.

Vuçiq ka thënë se tani është e kuptueshme dhe shihet se kush po shpreson në rënien e tij.

“Në Graçanicë kanë protestuar vetëm 19 persona ndërsa në Mitrovicë 53, a është e mjaftueshme kjo në një pjesë ku jetojnë më shumë se 19 mijë serb”, ka pyetur Vuçiq, përcjell lajmi.net.

Ai ka theksuar se shqiptarët janë kundër dhe gëzohen për dështimin e tij, pasi si lider serb ai po i mbron interesat e serbëve në Kosovë dhe kjo e bën edhe më të suksesshëm.

Tutje, Vuçiq është shprehur mirënjohës ndaj serbëve në Kosovë në veçanti ndaj atyre që kanë ruajtur shtëpitë edhe kur ishin të rrezikuar.

Theksojmë se mbrëmë janë zhvilluar protesta në Beograd dhe qytete tjera. Protestuesit po e akuzojnë Vuçiqin për shkelje të lirive demokratike, kontroll ndaj mediave si dhe për goditjet ndaj kundërshtarëve politik.

Në shenjë pakënaqësie ata po e kërkojnë dorëheqjen e tij.

Britania e Madhe ka një mesazh për Serbinë

Ndarja e Kosovës është një nga temat që ka ndezur shkëndija tensioni në rajonin e Ballkanit, teksa në mjediset politike flitet për një marrëveshje paraprake Thaçi-Vuçiq për shkëmbim territoresh.

Gjithashtu ka aludime për një ndarje klanesh lidhur me këtë çështje, me SHBA-të që raportohet të jenë pro shkëmbimit të territoreve për arritjen e paqes Kosovë-Serbi dhe BE-në që është kategorikisht kundër.

Për çështjen më të nxehtë të momentit ka shkruar sot e përditshmja britanike “The Times”, e cila thekson se “hyrja e Maqedonisë në NATO shënon fundin e një betejë të gjatë, por hartimi i rajonit në një mënyrë që do t’i kënaqte të gjithë aktorët mbetet ende një pikë e pamundur”.

Duke e përshkruar ish-Jugosllavinë si një ‘puzzle’ e kompozuar nga shtatë pjesë, gjashtë ish-republikat plus Kosovën, “Times” shkruan se dy dekada pas përfundimit të luftës në Ballkan, Bashkimi Evropian dhe NATO po numërojnë shtetet e sapolindura duke investuar në to miliarada dollarë dhe duke premtuar partneritet, në përpjekje për të garantuar paqe dhe zgjidhje për kufijtë.

Me hyrjen e Maqedonisë në NATO dhe në të ardhmen, potencialisht si një vend që do të fillojë negociatat për hyrje në BE, me pjesët veriore dhe jugore të ‘puzzle-it’ të Kroacisë, Sllovenisë, Malit të Zi dhe Maqedonisë duket se gjithçka është përmirësuar, por Serbia, Bosnja dhe Kosova, ende mbesin në zemër të këtij rajoni që ende diçka po shkon keq, shkruan Times.

Sipas këtij shkrimi, gjatë vitit të kaluar, presidenti i Kosovës dhe ai i Serbisë, Hashim Thaçi dhe Aleksandër Vuçiq, kanë negociuar prapa dyerve të mbyllura për një marrëveshje për ‘shkëmbim territoresh’ apo atë që e quajnë ‘korrigjim kufiri”, por sidoqoftë ‘vizatimi i kufijve ende nuk do të jetë një hap i lehtë”.

“The Times” shkruan gjithashtu se nëse arrihet një marrëveshje, Beogradi do ta njihte pavarësinë e Kosovës, do të hapej dera e anëtarësimit të Serbisë në BE dhe se një plan i tillë, është i mbështetur nga Përfaqësuesja e Lartë e BE-së, Federica Mogherini.

Por problemi sipas “Times” është se “plani i Kosovës inspiron një jetë të re në ambicien e Milorad Dodikut të Republikës Serbe”.

“Dhe nëse kjo fillon të implementohet kështu, do të mbetet një rrugë për zgjidhjen e kufijve nëpër të gjitha vendet e ish-Jugosllavisë dhe njëra nga shtatë pjesët e ‘puzzle’ potencialisht mund të eksplodojë”, thekson prestigjiozja britanike.

Në analizën e gjatë të gazetës, shkruhet se “Turqia, Kina dhe vendet e Gjirit, bashkë me Rusinë, janë bashkuar për të rritur ndikimin në Ballkan”. “Times” i lë një hapësirë të veçantë edhe vizitës së presidentit rus, Vladimir Putin në Serbi dhe mesazheve të tij për Kosovën.

Sipas gazetës britanike, thirrjet e Putinit gjatë vizitës në Serbi për Perëndimin ishin se “nuk do të ketë zgjidhje për Kosovën pa qenë edhe Rusia aty” dhe se Putin ka pozicionuar tashmë veten si një garantues për procesin në Kosovë.

Çitaku shtang Serbinë: Mbledhjet në OKB po i ktheni në teatër, Daçiq po tregon përralla

Diplomatja e Kosovës në Uashington, Vlora Çitaku i ka cilësuar si teatër mbledhjet e Këshillit të Sigurimit në OKB, ku po diskutohet për Kosovën.

Zonja Çitaku ka deklaruar se me këtë, Beogradi zyrtar po tenton t’i tregojë përralla dhe tregime të shpikura botës.

Ajo ka vlerësuar se diskutimet e shpeshta për Kosovën, janë dëshmi se Serbia nuk është aspak e sinqertë, transmeton Telegrafi.

“Është e papranueshme që kjo dhomë është shndërruar në një teatër nga Serbia. Ky forum është bërë skenë për Serbinë që t’i tregojë përralla botës, dhe tregime të shpikura që as ata vetë nuk i besojnë. Këto sesione kanë humbur kuptimin e tyre, dhe në fakt gjithë kjo që po ndodhë këtu është një dëshmi tjetër se Seria nuk është e sinqertë as në qëllimet që po artikulon, për vazhdimin e dialogut”, ka thënë Çitaku.

Ambasadorja e Kosovës në Uashington, duke folur për taksën ndaj Serbisë, ka thënë se vendimi i Qeverisë së Kosovës ka ardhur pas fushatës brutale të Beogradit, kundër shtetësisë së Kosovës.

Ajo deklaroi se Serbia me njërën dorë e lufton Kosovën, kurse me tjetrën thotë se është e interesuar për normalizimin e raporteve.

Sipas Çitakut, edhe nëse hiqet taksa, Serbia do të gjejë arsye tjera për të mos e vazhduar dialogun.

“Vendimi për taksat ndaj Serbisë nuk ka qenë i lehtë, por megjithatë pyetja që duhet ngritur është pse është marrë ky vendim. Tarifat ishin në reagim të fushatave brutale të qeverisë së Serbisë kundër Kosovës. Nuk mund dikush ta mbaj njërën dorë ta luftojë ekzistencën tonë, e me tjetrën të pretendojnë se janë për normalizimin e marrëdhënieve me Kosovën”, ka thënë Çitaku.

Ajo foli edhe për mundësinë e vazhdimit të dialogut, duke shtuar se një gjë e tillë mund të ndodhë vetëm për njohje të ndërsjellë.

Çitaku komentoi edhe deklarimet e ministrit të jashtëm serb, Ivica Daçiq i cili tha se Gjykata Speciale po i trajton kriminelët e luftës së UÇK-së.

Ajo than ë mbledhjen e OKB-së, se Kosova ka bërë luftë çlirimtare, duke e cilësuar tutje krijimin e ushtrisë si vendim të duhur.

“Vendimi për Ushtrinë ishte i ligjshëm, kushtetues dhe kjo vetëm po krijonte parakushte e një mekanizmi të sigurisë, që mundëson kontributin e Kosovës që të jetë pjesë e aleancave evropiane”, ka thënë Vlora Çitaku.

Ndryshe, mbajtja e seancës së Këshillit të Sigurimit mbi Kosovën ishte deri në momentin e fundit në pikëpyetje, pasi disa vende perëndimore e kundërshtuan praktikën e diskutimit të kësaj çështjeje katër herë në vit.

Britania e Madhe kërkoi që Kosova të hiqet përgjithmonë nga rendi i ditës, ndërsa SHBA beson se seancat duhet të mbahen dy herë në vit.

Miratohet Projektligji për dialogun me Serbinë

Kuvendi i Kosovës për disa orë më radhë ka shqyrtuar Projektligjin për detyrat, përgjegjësitë dhe kompetencat e delegacionit shtetërorë të Republikës së Kosovës, në procesin e dialogut me Republikën e Serbisë.

Në Kuvendin e Kosovës është miratuar projektligji për detyrat, përgjegjësitë dhe kompetencat e delegacionit shtetërorë të Kosovës në procesin e dialogut në raport me Serbinë.
Deputetët e Kuvendit të Kosovës kanë votuar me 61 vota për këtë ligj, ndonëse në sallë në momentin e votimit të pranishëm kanë qenë 91 sish.

Më 24 dhjetor të vitit të kaluar Qeveria e ka miratuar këtë projektligj për dialogun me Serbinë për të cilin Kryeministri Ramush Haradinaj ka thënë se do t’i dërgohet Kuvendit për shqyrtim dhe miratim.

“Me anë të ligjit do të përcaktohet hierarkia institucionale dhe procedura vendimmarrëse në procesin e dialogut me Republikën e Serbisë”, pati thënë Haradinaj.

Kujtojmë se institucionet e Kosovës po i bëjnë përgatitjet për fazën finale të bisedimeve me Serbinë, në kuadër të dialogut që po lehtësohet nga Bashkimi Evropian në Bruksel.

Sipas Presidentit Hashim Thaçi, synimet janë që në fund të këtij procesi, Kosova dhe Serbia të nënshkruajnë një marrëveshje e cila do të ishte ligjërisht obligative për të dy shtetet, me anë të së cilës Kosova do të siguronte edhe ulësen e saj në Kombet e Bashkuara.

Gjuriq sot viziton Kosovën

Shefi i të ‘ashtuquajturës Zyrë për Kosovën në Qeverinë e Serbisë’, Marko Gjuriq, do të qëndrojë për vizitë sot në Kosovë.

Marko Gjuriq, shef i të ‘ashtuquajturës Zyrë për Kosovën në Qeverinë e Serbisë’, sot do të vizitojë Kosovën.

Vizita e tij është mundësuar pas lejes së dhënë nga Ministria e Punëve të Jashtme të Kosovës (MPJ).

Këtë e ka konfirmuar Jetlir Zyberaj, këshilltar i ministrit të Punëve të Jashtme, Behgjet Pacolli.

“Po ka marrë leje për vizitën e tij”, e ka thënë shkurt Zyberaj.

Ndryshe, Gjuriqi pritet që sot të mbajë një takim në Qendrën e Studentëve në pjesën veriore të Mitrovicës.

Johanes Hahn ofertë për heqjen e taksës

Komisioneri për Zgjerim të Bashkimit Evropian, Johannes Hahn, i ka bërë një ofertë Kosovës dhe Serbisë, e cila do të ndihmonte që sipas tij të hiqet taksa që Qeveria e Kosovës i ka vënë produkteve serbe e boshnjake.

I pari që përmendi këtë ofertë është kryeministri Ramush Haradinaj, i cili pasi kishte pritur javën e kaluar në zyrën e tij Hahnin, tha se ky i fundit po u ofron ndihmë, shkruan Gazeta Express.

Megjithatë, Haradinaj që këmbëngul për mosheqjen e taksës, ka thënë se pranon ndihmën e Hahnit, veçse pas ndonjë marrëveshjeje të mundshme, duhet të ketë reciprocitet mes Kosovës e Serbisë dhe Bosnjës.

“Komisionari Hahn është ofru për ndihmë edhe ne i kemi thënë se ai mund të na ndihmojë për ta përgatitur kapitullin e tregtisë së lirë. “Kapitulli i tregtisë së lirë nënkupton krejt marrëdhëniet Kosovë-Serbi në ekonomi. Sikur të merresh vesh për një ngjarje si Rambujeja, si ndonjë ngjarje tjetër, ku mblidhen edhe i mbyllin dyert dhe nuk i lënë të dalin derisa të arrihet zgjidhja”, ka thënë kryeministri Haradinaj.

Sipas shefit të ekzekutivit një marrëveshje arrihet, nëse Serbia dhe Bosnja heqin barrierat e tyre ndaj Kosovës.

Ai madje nuk i është bindur as deklaratës direkte të lëshuar dje nga Ambasada amerikane, në të cilën kërkohej që të pezullohej taksa.

Ndërkaq komisioneri Hahn nuk i ka përmbyllur përpjekjet për të bindur palën kosovare që të heqin taksën prej 100 për qind ndaj produkteve serbe.

Ai në Davos të Zvicrës, ku po mbahet Forumi Ekonomik Botëror, ka takuar presidentin Thaci, i cili përkrah heqjen e taksës, si dhe presidentin serb, Aleksandër Vuciq.

Të dy liderëve Hahn u ka bërë një ofertë që do të conte në një marrëveshje të heqjes së barrierave. Në një intervistë për N7, ai tregoi se i ka njoftuar në hollësi se cka përmban pakti që, sipas komisionerit, palët duhet ta arrijnë.

“Propozova që të bashkërendohen të gjitha çështjet përkatëse tregtare që kanë të bëjnë me Serbinë dhe Kosovën. Unë jam i gatshëm që ta drejtoj këtë bisedë dhe kjo do të ishte bazë për të supozuar që është i mundur vazhdimi i dialogut i ndërmjetësuar nga Përfaqësuesja e Lartë, Federtica Mogherini”, tha Hahn.

Komisioneri tregon se po e pret përgjigjen e Thacit e Vuciqit brenda ditëve.

Vetë presidenti Thaci ka dalë pro heqjes së taksës, madje përmes një shkrimi në Facebook ka thënë që për teket personale të liderëve, Kosova nuk mund të rrezikojë raportet me Shtetet e Bashkuara të Kosovës.