Limaj: Kosova po pret të rinjtë të marrin përgjegjësitë

Nisma Socialdemokrate ka mbajtur Kuvendin e II Zgjedhor të Rinisë.

Me pjesëmarrjen e rreth 700 delegatëve, Nisma ka zgjedhur strukturat e reja drejtuese të rinisë në krye me Xhemajl Hazizin, kryetar i Rinisë së Nismës.

Në këtë Kuvend morën pjesë strukturat më të larta të këtij subjekti.

Kryetari i Nismës, Fatmir Limaj, tha se kanë ardhur në këtë Kuvend shumë më të organizuar me një strukture të profesionalizuar dhe me një përvoje të admirueshme politikë.

Limaj ka thënë se shumë punë është bërë për të krijuar rininë e Nismës, e cila i dha sukses e shpirt platformës politike të Nismës.

“Ku kemi qenë pesë vite me parë e ku jemi sot. Me punë e përkushtim orientim të qartë e më shumë sfida pa u ndalur jemi këtu ku jemi sot. Djemtë dhe vajzat tona të rinisë sot marrin përgjegjësi shtetërorë”, ka thënë Limaj në Kuvendin e II Zgjedhor të Rinisë.

Limaj tha se pesë vite me parë askush nuk ka menduar që kaç shpejt mund të arrijmë këtu ku jemi.

“Rinia e Nismës ishte promotor i suksesit tonë. Në të gjitha komunat ku arritëm suksese të mëdha në zgjedhjet lokale dhe qendrore të vitit 2017. Sot shumë djem e vajza tona kanë marrë përgjegjësi ekzekutive e legjislative. Ëndrra jonë e përbashkët është fuqizimi i shtetit të Kosovës për të qenë secili krenar këtu”, ka shtuar Limaj.

Kryetari i Nismës ka kërkuar nga të rinjtë që në asnjë variant të dorëzohen para çfarëdo sfide.

Limaj ka thënë se Kosova shtet i pavarur dhe konsoliduar po pret të rinjtë të marrin përgjegjësitë shtetëror.

Ai ka kërkuar nga të rinjtë të mos ia kthejnë shpinën Kosovës, edhe pse është i vetëdijshëm se ka shumë probleme me të cilat të rinjtë ballafaqohen.

“Imagjinoni gjeneratat e para luftës po të iknin nga vendi. Secili kemi mund të dilnim jashtë e me heq dorë nga vendi. Por, sot nuk do të folshim sot për shtet të pavarur. Nuk do të folshim sot për sukseset në sport e muzike. Sot ata do të kishin emra tjerë dhe do përfaqësonin kombe e shtete tjera. Lidhja e njeriut me tokën e vet është lidhje e shenjtë që Zoti e ka lënë. Askund kokën më lartë nuk mund ta mbani se aty ku ju ka lindë nëna juaj”, ka theksuar Limaj.

Ai ka ftuar të rinjtë të mobilizohen dhe të frymëzohen me dëshirën për të forcuar vendin tonë.

“Detyra jonë si parti është ta dërgojmë Kosovën në një stad tjetër të zhvillimit. Ta bëjmë këtë vend më të mirë të jetueshëm për të gjithë. Nisma në pesë vitet e ardhshme do të jetë platforma që do të drejtojë shtetin e Kosovës”, ka përfunduar Limaj.

Kryetari i Këshillit Kombëtar, Jakup Krasniqi, tha se ndjehet i lumtur që në pesë vjetorin e Nismës sheh plot të ri dhe të reja që duan të angazhohen në këtë subjekt politikë për t’i kontribuar vendit dhe qytetarëve tanë.

“Të rinjtë dhe të rejat sot i mbushin sallat për të bërë angazhimin organizimin dhe veprimin e tyre politikë për vendin e vet dhe qytetarët e vendit dhe gjeneratën e vet”, ka thënë Krasniqi.

Kryetari i ri i Rinisë së Nismës, Xhemajl Hazizi tha se të rinjtë e Nismës vetëm të bashkuar mund t’ia dalin mbanë. Ai ftoi të rinjtë që të jenë aktiv dhe shtoi se çelësi i suksesit tha se do të jetë bashkëpunimi me të rinjtë anëkend vendit.

Ai ka falënderuar kryetarin e deritashëm të rinisë, Albert Maxhunin dhe kryesinë e mëhershme që në situata të vështira kanë bërë punë të madhe.

Fatmir Limaj e ‘kap’ fort shtetin, punëson farefisin e vet e të partisë

Pronë prive po i konsideron institucionet e shtetit, Nisma Socialdemokrate.Punësimi i një anëtari të familjeve që nuk kanë të punësuar ishte premtim i Nismës Socialdemokrate. Këtë premtim e kishte dhënë kreu i kësaj partie, Fatmir Limaj. Dikasteret qeveritare që udhëhiqen nga Nisma tash e sa kohë kanë filluar ta jetësojnë këtë plan, por jo duke u dhënë mundësi të barabartë të gjithë qytetarëve.

Djali, dhëndëri, motra e gruas dhe bashkëshortja e shoferit personal -janë vetëm disa nga të afërmit e zëvendëskryeministrit Limaj, të cilët janë punësuar në ministritë të cilat udhëhiqen nga Nisma Socialdemokrate, shkruan lajmi.net.

Keq nuk kanë mbetur as familjarët e anëtarëve të tjerë partisë së Limajt. Shoqëria civile dhe mediet po raportojnë në vazhdimësi për këto punësime.

MTI-ja ‘kapët’ fort

Ministria e Tregtisë dhe Industrisë që udhëhiqet nga Endrit Shala i partisë së Nismës Socialdemokrate, po rehaton në këtë institucion familjarë të bashkëpartiakëve. Lajmi.net ka gjetur se Donjeta Bytyqi është njëra prej punësimeve të reja në MTI. Ajo u zgjodh si më e mira për pozitën “Zyrtar i lartë për ekzaminim” në konkursin që u hapë për këtë pozitë.

Lajmi.net ka mësuar se Bytyçi është mbesa e deputetit të Nismës Socialdemokrate, Haxhi Shala. Burimet e lajmi.net kanë treguar se e njëjta nuk i ka plotësuar kriteret që vetë MTI-ja i ka vendosur në konkurs, respektivisht nuk e ka përmbushur kriterin e përvojës së punës që është kërkuar që kandidati të këtë minimum tri vite përvojë pune profesionale. Se është mbesa e tij, e ka pranuar për lajmi.net vetë deputeti Shala.

Ndërkohë, ministria e Tregtisë dhe Industrisë, që udhëhiqet nga partia Nisma Socialdemokrate i ka hapur dyert edhe për njerëzit tjerë të afërm të krerëve të kësaj partie. Gazeta JnK ka raportuar se si janë punësuar të afërmit e Fatmir Limajt, Jakup Krasniqit e Valdete Bajramit.

Veron Selmani, burri i vajzës së Fatmir Limajt, është punësuar në Ministrin e Tregtisë dhe Industrisë, e cila udhëhiqet nga NISMA. Kryetar i NISMA Socialdemokrate është Fatmir Limaj. Sipas JnN-së, konsulent për çështje financiare, është pozita për në të cilën Veron Selmani është angazhuar me kontratë për shërbime të veçanta në mars të vitit 2018 në Agjencinë KISEA. Kjo Agjenci është në kuadër të MTI-së. Në të njëjtën ministri është punësuar Durim Limaj, djali i Fatmir Limajt.

Media në fjalë poashtu ka gjetur se Taulant Krasniqi, nipi i Jakup Krasniqit, është punësuar si inspektor i naftës në ministrinë që drejtohet nga partia e themeluar nga Fatmir Limaj e Jakup Krasniqi. Kunata e ish-deputetes Valdete Bajramit do të kujdeset për monitorimin dhe kontrollin e cilësisë së naftës. Ajo është punësuar në MTI përmes një konkursi, kriteret e të cilit ishin vendosur në përputhje me shkollimin e saj. Shkëndije Bajrami – Azizi, kunata e Bajramit, është pranuar në punë përmes konkursit të dytë për inspektore e tregut për cilësinë e naftës. Ajo është punësuar vetëm pasi MTI-ja ka arritur të ndryshojë kriteret e konkursit, duke i përshtatur me përgatitjen profesionale të Bajrami-Azizit. Konkursi i parë ishe anuluar me vendim të Këshillit të Pavarur Mbikëqyrës për Shërbimin Civil, pasi ky Këshill kishte konstatuar se MTI-ja në mënyrë të kundërligjshme e kishte futur Fakultetin e Shkencave Matematike-Natyrore (FShMN) si diplomë e përshtatshme për punësim.

MASHT-i shembull i abuzimit, strehë e militantëve dhe nepotizmit

Rrjeti i OJQ-ve AVONET ka bërë hulumtimin dhe si rezultat i kësaj ka identifikuar se rekrutimi në Ministrinë e Arsimit, Shkencës dhe Teknologjisë është bërë në baza politike dhe familjare, pothuajse komplet në këto punësime janë personat të cilët janë pranuar dalin të jenë pjesë e strukturave të partisë Nisma Socialdemokrate, parti e cila udhëheq me këtë ministri.

AVONET ka publikuar disa nga personat të cilat lidhen drejtpërdrejt me militant dhe familjar të partisë NISMA Socialdemokrate, siç janë: Shkurte Gashi, ishte kandidate për asamble në Komunën e Prishtinës; Valdete Prebeza, ishte kandidate për asamble në Komunën e Prishtinës; Arianit Krasniqi, kryetar i rinisë të Degës Nisma Socialdemokrate në Malishevë; Rudina Restelica, e aderuar në muajin qershor 2018 në partin Nisma Socialdemokrate; Veton Kastrati ish-asamblist i partisë Nisma dega në Malishevë; Lavdim Rizani anëtar i degës së partisë Nismës në Lipjan; Diana Bytyqi,bashkëshortja e Ardian Gashit zyrtarit të Nismës për Media; Alberina Foniqi Boja, anëtare e forumit të gruas në Suharekë; Në këtë institucion përmes një projekti të MPMS është punësuar mbesa e ministrit Beslina Hoxha dhe Milot Hyseni, djali i motrës së bashkëshortes se ministrit; Ardita Muqolli e cila ka aderu në muajin qershor në Nismë.

“Në bazë të nenit 65 (1) të Kushtetutës së Republikës së Kosovës, KODI PENAL I REPUBLIKËS SË KOSOVËS me nr. 04/L-082 i Kuvendit të Republikës së Kosovës. Neni 222. Cenimi i të drejtave të punësimit dhe papunësisë. Kushdo që ia mohon apo kufizon personave tjerë të drejtën në punësim në kushte të njëjta, ashtu siç që është përcaktuar me ligj, dënohet me gjobë ose me burgim deri në dy vjet”.

AVONET, konsideron se përgjegjësi e kësaj praktike është ministri Bytyqi, i cili është udhëheqës i kësaj ministrie dhe përgjegjësia i takon ministrit Bytyqi, po ashtu ai është në dijeni për këtë praktik, ku ky ministër ka të punësuar edhe të afërt të tij.

Praktika e njëjtë si nëpër borde është vazhduar edhe në emërimin e sekretarëve të përgjithshëm nëpër ministri, konkretisht në Ministrinë e Arsimit dhe atë të Tregtisë dhe Industrisë.

Qeveria e Kosovës kishte emëruar sekretar të Ministrisë së Arsimit, Ekrem Kastratin. Kastrati i emëruar sekretar në ministrinë e udhëhequr nga Nisma, mandatin e kaluar ishte drejtor komunal në Malishevë, komunë e udhëhequr po ashtu nga Nisma. Kjo ishte bërë pa pëlqimin e britanikëve dhe pa plotësim kriteresh. Pavarësisht që ambasada britanike si partner në përzgjedhjen e pozitave të larta dhe komisioni vlerësues kishin dhënë rekomandim se asnjëri nga tre kandidatët nuk kishte dhënë rezultat të kënaqshëm, ministri i arsimit, Shyqiri Bytyqi kishte propozuar emrin e Kastratit për këtë pozitë. Ngjashëm kishte ndodhur edhe me emërimin e sekretarit e përgjithshëm në MTI. Qeveria kishte vendosur ta emërojë Burim Rrecajn sekretar në këtë ministri, ani pse ai nuk i kishte plotësuar kushtet dhe ishte i renditur i katërti në listën e vlerësimit.

Kundër këtij vendimi kishin reaguar edhe një grup i organizatave të shoqërisë civile.

Punësime edhe në ministrinë e Diasporës

Promovimi i Investimeve tek Investimet Strategjike në Ministrinë e Diasporës ka disa muaj që janë në duart e Sadbere Balajt. Ministria e Diasporës dhe Investimeve Strategjike ka punësuar Balajn e cila është motra e bashkëshortes së Fatmir Limajt, kryetar i partisë NISMA Social Demokrate.

Në ministrinë e Diasporës dhe Investimeve Strategjikë është punësuar edhe Mirlind Hyseni. Lajmi.net ka mësuar se Hysen është djali i motrës së bashkëshortes së Ministrit të Arsimit, Shyqyri Bytyqi.

Ushtruese e Detyrës së Sekretares së kësaj ministrie është Shyhrete Gosalci, ish kandidate për deputete të NISMA-s, në vitin 2014.

Për këto punësime lajmi.net la kërkuar përgjigje edhe nga zyra për informim e kësaj ministrie, por nuk ka marr përgjigje.

Në Ministrinë e Punës dhe Mirëqenies Sociale e cila udhëhiqet nga ministri i Nismës Socialdemokrate, në Departamentin e Zyrës së Auditorit të Brendshëm është punësuar, bashkëshortja e Shpëtim Telakut shofer personal i Fatmir Limajt

Institucionet e Republikës së Kosovës i kanë hapur dyert për gjashtë nipërit e ish-kryetarit të Kuvendit të Kosovës, Jakup Krasniqit.

Siç ka raportuar Insajder, katër vëllezërit e Krasniqit, kanë të punësuar djemtë e tyre në institucione të ndryshme të vendit. Abdyli vëllai i Jakup Krasniqit ka të punësuar dy djemtë e tij në institucione të vendit, ndërsa vet ai është pjesë e Autoritetit Kosovar të Konkurrencës. Vëllai tjetër i Jakupit, Halimi që kishte qenë drejtor në një shkollë në Negrovc, ka të punësuar djalin e tij në ministrinë e Punës dhe Mirëqenies Sociale.

Zv.kryeministri Limaj, në fushatën zgjedhore të qershorit të vitit 2017, kishte dhënë një premtim të madh. Pati thënë se nuk do të ketë familje në këtë që nuk do ta ketë së paku një person të punësuar.

“Janë me mijëra familje që nuk e kanë asnjë të punësuar dhe ne duam ta ndërlidhim ndërmarrjen tonë me agjencinë e punësimit dhe t’i lidhim ndërmarrësit tanë me shkollat tona profesionale dhe kjo garanton apo siguron mundësi tjetër për punësim edhe zhvillim ekonomik të vendit. Koha është të ndryshohet gjendja”, kishte thënë Limaj. /Lajmi.net/

Përfundon takimi i Thaçi me liderët e koalicionit

Para pak çastesh ka përfunduar takimi i liderëve të koalicionit PDK-AAK-Nisma-AKR.

Kryeministri Ramush Haradinaj dhe zëvendësësit e tij, Fatmir Limaj e Behgjet Pacolli, janë parë ta kenë lënë takimin, por nuk janë prononcuar para gazetarëve që po i prisnin në oborrin e ndërtesave të Kuvendit dhe Qeverisë.

Ata kanë hyrë në zyrat e ndërtesës së Qeverisë së Kosovës, raporton Teleshkronja Post.

Nuk janë parë të ketë dalur nga takimi kryeparlamentari Kadri Veseli.

Në zyrë të Qeverisë ka hyrë edhe Shpend Ahmeti, kryetar i Prishtinës dhe i PSD-së, që thotë se është në opozitë. Ahmeti bashkë me Limajn janë kryesues të Ekipit shtetëror të dialogut.

Në takim ishte edhe ambasadori francez, Didier Chabert, i cili ishte i pari që ka dal nga takimi.

“Nuk kemi frikë nga zgjedhjet, Ramushi fiton më së shumti nga rrëzimi i Qeverisë”

Për njërin prej udhëheqësve të Nismës Socialdemokrate, Jakup Krasniqi, thotë se vendosja e taksës ndaj produkteve serbe nuk mund t’i prishë raportet Kosovë – SHBA edhe pas presionit që po bën kjo e fundit.

Për rrëzimin e mundshëm të Qeverisë Haradinaj, ku partner koalicioni është Nisma, Krasniqi thotë se partia e tij nuk u frikësohet zgjedhjeve. Jakup Krasniqi komenton edhe përplasjen Thaçi – Haradinaj, për Gazetën Express

Vendosmëria e kryeministrit Haradinaj për mosheqjen e taksës ndaj Serbisë që po merr përkrahje edhe nga partneri i koalicionit Nisma, mund t’i kushtojë me rrëzim të Qeverisë. Por edhe nëse do të ndodhë kjo, Jakup Krasniqi thotë se partia e tij nuk u frikësohet zgjedhjeve. Ai thekson se kësaj situate duhet t’i frikësohen ata që nuk e kanë gatishmërinë për t’i mbrojtur interesat e vendit. Në këtë situatë më së shumti do të fitojë Ramush Haradinaj, thotë ai.

“Ndoshta edhe mund të ndodhë, por nga kjo askush nuk mund të fitojë më shumë sesa Ramushi. Ne nuk e kemi asnjë arsye që t’u frikohemi zgjedhjeve të reja. Le të frikësohen të gjithë ata që nuk po e kanë gatishmërinë për t’i mbrojtur interesat e shtetit e të kombit! Po sekush duhet të mendojë për interesin e vendit e kombit e jo të pushteteve personale”, tha Krasniqi në një bisedë për Gazetën Express.

Krasniqi vlerëson se taksa nuk i prish raportet SHBA – Kosovë. Ai thotë se presioni amerikan duhet të drejtohet nga Serbia pasi, sipas tij, ata janë shkaktari i të këqijave në Evropë.

“Taksa nuk mund ta prishë partneritetin me SHBA-në, ajo po i prish raportet e atyre që nuk janë të gatshëm të vendosin politika reciprociteti më Serbinë e disponuar armiqësisht, me ata që luftojnë për t’i mbrojtur interesat e shtetit e të qytetarëve tanë. Presioni duhet të drejtohet ndaj Serbisë, pasi ajo është shkaktari i të gjitha të këqijave në Evropë”, u shpreh Krasniqi.

Jakup Krasniqi e ka komentuar edhe përplasjen virtuale mes presidentit Thaçi dhe kryeministrit Haradinaj. Raportet u acaruan edhe më shumë gjatë vikendit kur Thaçi shkroi se bora do të shkrihet por shpreson të mos bëhet skllotë, kjo deklaratë erdhi pasi Haradinaj ishte shprehur se bora do të shkrihej dikur.

Për këtë, Krasniqi tha se Haradinaj është në krye të detyrës që duhet mbështetur fuqishëm.

“Kryeministri Haradinaj është në krye të detyrës e përgjegjësive të tij kushtetuese, për çka duhet mbështetur fuqishëm. Drejtuesit e shtetit duhet të jenë në krye të përgjegjësive të tyre kushtetuese”, përfundoi ai.

Ende nuk dihet nëse kjo Qeveri i ka ditët e numëruara në pushtet. Sot liderët shtetërorë kanë zhvilluar takim me ambasadorin amerikan në Kosovë, Philip Kosnett, pas të cilit Ramush Haradinaj tha se këtë javë mund të ndodhin zhvillime. Ndërsa Hashim Thaçi e quajti takim të zakonshëm duke shtuar se nuk ka agjendë as individ qe e prish miqësinë e Kosovës me SHBA-në. /M.Miftari /Gazeta Express

Kjo është deputetja më e re dhe më e pasur e Kuvendit të Kosovës

Në radhët e deputetëve biznesmenë të Kuvendit të Kosovës hyn edhe deputetja nga radhët e Nismës Albulena Balaj-Halimaj

Albulena Balaj-Halimaj në formularët e Agjencisë Kundër Korrupsionit (AKK) ka deklaruar se 100% e aksioneve në kompaninë “Halimaj Reisen”, në vlerë prej 130 mijë eurosh, janë në pronësi të bashkëshortit të saj, shkruan Zeri.

Ndryshe, janë së paku 14 deputetë të Kuvendit të Kosovës që krahas politikës janë pronarë ose edhe bashkëpronarë në biznese të ndryshme private, që operojnë brenda dhe jashtë vendit tonë.

Duke u bazuar në të dhënat që ata i kanë deklaruar vetë në formularët e Agjencisë Kundër Korrupsionit (AKK) shihet se aksionet e tyre nëpër kompani nisin nga 200 euro e deri në 45 milionë euro.