Mimoza Kusari si kryeministre e një qeverie gjithëpërfshirëse? Përgjigjet vet Kusari-Lila

Kryetarja e Alternativës, Mimoza Kusari-Lila ka thënë se në këtë situatë aktuale nuk do të pranonte të drejtonte një qeveri gjithëpërfshirëse.

Ish-kryetarja e Gjakovës, Kusari-Lila, ka thënë se pa bërë lëshimin e koalicionit nga ndonjëra nga subjektet aktuale që janë në qeveri nuk mund të krijohet një qeveri gjithëpërfshirëse.

“Partnerët e koalicionit i kanë vetëm fjalët kundër njëri tjetrit, por në vepra janë plotësisht duke funksionuar. Po bashkëpunojnë shumë mirë në ndarjen e pushtetit. Ata janë bashkë në vendimet që merr Qeveria. Në asnjë çështje ata nuk po kanë dallime në aspektin përmbajtjesore”.

Kryetarja e Alternativës ka thënë se në rrethanat aktuale në Kosovë ajo nuk do të pranonte drejtimin e Qeverisë gjithëpërfshirëse.

“Në këto rrethana dhe me këtë përbërje qeverisëse nuk jam e gatshme të marr drejtimin e qeverisë”, tha ajo në RTV Dukagjini.

Kusari-Lila ka thënë se qeveria gjithëpërfshirëse me kryeministër Bajram Rexhepin kishte pasur shumë probleme, dhe sipas saj thyerjet mes partive në atë kohë kanë qenë të mëdha.

“Asnjëherë nuk kemi pasur një qeveri gjithëpërfshirëse përpos kur është bërë kryeministër konsensual Bajram Rexhepi. E di që në atë kohë ka pasur thyerje të mëdha mes subjekteve politike, sidomos mes LDK dhe PDK. Ka qenë një punë shumë e vështirë. Edhe në rrethana aktuale me këtë spektër të gjerë politik, do të duhesh të kishe një platformë shumë të definuar për të dhënë përgjigje”, tha ndër të tjera Mimoza Kusari-Lila.

Mimoza Kusari del kundër Ilir Dedës

Kryetarja e Alternativës, Mimoza Kusari-Lila, ka thënë se partia e saj nuk e ka mbështetur votimin e buxhetit e as Ekipin negociator në Kuvendin e Kosovës.

Ish-zonja e parë e komunës së Gjakovës, Kusari-Lila, në RTV Dukagjini ka thënë se votimi i Ilir Dedës pro buxhetit dhe Ekipit negociator ka qenë kundër qëndrimit të partisë.

“Iliri ka vendos për votën e tij. Në këtë rast nuk ka qenë mbështetje e subjektit politik. Mendimi i tij ka qenë se duhet mbështetet buxheti dhe Ekipi negociator”, tha ajo.

Deputetja e Kuvendit të Kosovës ka thënë më tej se në bazë të informacioneve që ka marrë në Kuvend, vota e Ilir Dedës ka qenë vendimtare për të kaluar Ekipi negociator.

“Nuk e di si ka shkuar situata, pasi sot kam marrë informata se vota e Ilirit për delegacionin ka qenë determinuese pasi që ka kaluar me 61 vota. Nëse ai është shprehur “pro” ky nuk është qëndrim i Alternativës. E them me përgjegjësi të plotë se organet vendimmarrëse të Alternativës nuk e mbështesin këtë formë të dialogut”.
Kusari-Lila ka thënë se çështja e votimit të Ilir Dedës ende nuk është shqyrtuar në organet e partisë.

“Argumentimi i tij në këtë rast është se ai ka të drejtë. Por mendoj se në strukturën politike të subjektit është nuk është shqyrtuar kjo çështje”, tha ndër të tjera Mimoza Kusari-Lila.