Konjufca-SHIK: Veseli deklaron opinionin e tij

Ish-kreu i Shërbimit Informativ të Kosovës, SHIK, Kadri Veseli, as nuk e ka pohuar e as nuk e ka mohuar se a ka qenë Glauk Konjufca, pjesë ek ësaj organizate.

Në Rubikon të KTV-së, ai ka thënë se nuk dëshiron që të flasë për këtë çështje.

“Shkojmë tutje. Nuk është pjesë e diskutimit të kësaj studioje”, ka thënë Veseli.

Pas insistimeve ai ka thënë se “kushdo që i ka shërbyer vendit duhet të ndjehet krenar, por disa kanë mundur e disa nuk e kanë pasur këtë mundësi për shkak të moshës”, për ta lënë të paqartë përgjigjen rreth këtyre pretendimeve.

Veseli ka thënë se Prishtina dhe Kosova janë të vogla dhe dihet saktësisht se kush ka qenë pjesë e SHIK-ut.

“Tash nuk është momenti për të folur për këtë”, ka thënë Veseli.

Pretendimet se shefi i deputetëve të Vetëvendosjes, Glauk Konjufca, ka qenë për një vit punonjës i SHIK-ut i tha në Kuvendin e Kosovës deputeti Dardan Molliqaj, që ishte bashkëpartiak i Konjufcës në Vetëvendosje, tash në PSD. Konjufca ka ushtruar “padi për shpifje” ndaj Molliqajt, në lidhje me këtë deklaratë.

Glauk Konjufca ishte në SHIK, flasin ish-zyrtarët e kësaj organizate

Asnjë prej ish-zyrtarët të ish-Shërbimit Informativ të Kosovës nuk kanë dashur të komentojnë nëse Glauk Konjufca kishte qenë në SHIK. Kanë thënë se nuk dëshirojnë të përfshihen në këtë debat.

Njëri prej tyre ka thënë se vetëm Kadri Veseli mund të përgjigjet për këtë temë.

Veç Kadri Veseli mund të flasë nëse Glauk Konjufca ishte në SHIK për një vit. Kjo është përgjigja e Fadil Demakut, njërit prej ish-zyrtarëve të Shërbimit Informativ të Kosovës, pas konstatimeve të Dardan Molliqajt se Glauk Konjufca ishte pjesë e SHIK’ut për një vit.

Molliqaj ka paralajmëruar se do t’i tregojë edhe emrat tjerë të zyrtarëve të Vetëvendosjes që ishin pjesë e Shërbimit të udhëhequr nga Kadri Veseli, aktualisht Kryetar i PDK’së.

“Vete Kadri Veselin, ai mund të tregojë”, ka thënë Demaku, të dielën, për Express.

Ish-deputeti nga radhët e PDK’së ka thënë se nuk dëshiron të përfshihet në hajgaret e zyrtarëve të VV’së e PSD’së.

“Kësi hajgaresh nuk i komentoj”, ka shtuar ai.

Glauk Konjufca, aktualisht deputet i Vetëvendosjes, më herët, ka qenë pjesë e AAK’së.

Dardan Molliqaj tha se Konjufca ishte edhe në PDK. Ndërsa, tha se Shefi i deputetëve ishte për 365 ditë në SHIK.

Molliqaj nuk ka treguar se çfarë pozite ka pasur Konjufca dhe as sa është paguar për punën që ka bërë në organizatën e Kadri Veselit.

“S’di a e dini ju që Galuk Konjufca ka qenë një vit pjesë e SHIK’ut. Ai ka qenë në këtë shërbim para se të ishte pjesë e VV’së. Ti vetë Glauk ke qenë pjesë e SHIK. Dil e trego haptas që ke punuar aty”, ka thënë Molliqaj, në Kuvendin e Kosovës.

“Kur ka qenë Glauku në SHIK s’ka qenë në VV dhe unë s’e kam problem, por që s’e ka tregu se s’ka pas guximin me tregu. Mire është me kallxu një nja një që keni qenë në SHIK. Dua ta shoh edhe etikën edhe guximin edhe me pa a je gati me e pranu këtë gjë”, ka shtuar ai.

Glauk Konjufca ka kërkuar fakte nga Molliqaj për konstatimet se ishte pjesë e SHIK’ut.

“…i pranoj pretendimet e Dardanit, veç me një kusht: le të ofron fakte për shpifjet e tij”, ka deklaruar Konjufca.

Edhe një udhëheqës tjetër i ish-SHIK’ut, Fatmir Xhelili, aktualisht deputet i PDK’së, ka refuzuar të përfshihet në debatin Molliqaj-Konjufca.

“Nuk komentoj. Janë akuza të dy partive tjera. Nuk kisha dashur të komentoj”, ka thënë Xhelili, për Express.

Edhe Latif Gashi, ish-drejtor i përgjithshëm i SHIK’ut, ka thënë se nuk dëshiron të merret me deklarimet e Konjufcës e Molliqajt.

“Janë probleme të tyre. Nuk dua të merrem me to”, ka thënë Gashi.

Shërbimi Informativ i Kosovës, SHIK, ishte organizatë e themeluar në kohën e luftës dhe organ i Ushtrisë Çlirimtare të Kosovës. Kishte funksionuar deri më 2008, kur ishte shpallur pavarësia e Kosovës. Ka pasur akuza se pjesëtarë të kësaj organizate ishin të përfshirë në vepra penale.

Shumica e ish-anëtarëve të kësaj organizate kanë vazhduar aktivitetin politik në PDK, disa në AAK, VV e parti tjera.

Kadri Veseli, vitin e kaluar, kishte paralajmëruar se do t’i ‘nginte’ SHIK të gjithë zyrtarët e partive politike. Kishte thënë se kur të dalin faktet s’bën të kukasin “Ciu, ciu, ciu”.

Veseli: Po i japim fund anarkisë me paga, rritje në arsim, shëndetësi, polici e ushtri

Kryeparlamentari Kadri Veseli ka thënë se me Ligjin për Pagat do t’i japin fund anarkisë që ka mbizotëruar qe 20 vite në sektorin publik.

I pari i Kuvendit ka thënë se Ligji parasheh vetëm rritje, dhe se askujt nuk do t’i ulet paga ekzistuese.

Veseli përmes një postimi në llogarinë e tij në Facebook, ka thënë se sot bashkë me Ligjin e Buxhetit, do të miratohet edhe Ligji i Pagave për sektorin publik.

Ai ka thënë se me këtë Ligj, pagat u janë rritur të gjithë mësimdhënësve, personelit shëndetësor, policëve, ushtarëve, shërbyesve civilë dhe të gjitha kategorive tjera në sektorin publik. Derisa ka shtuar se Ligji parasheh vetëm rritje, dhe se askujt nuk do t’i ulet paga ekzistuese.

“Sot, bashkë me Ligjin e Buxhetit, po miratojmë edhe Ligjin e Pagave për sektorin publik në shtetin tonë. Me këtë ligj, po i japim fund arbitraritetit dhe anarkisë që kanë mbizotëruar në këtë fushë për pothuajse 20 vjet. Pagat u janë rritur të gjithë mësimdhënësve, personelit shëndetësor, policëve, ushtarëve, shërbyesve civilë dhe të gjitha kategorive tjera në sektorin publik.

Kemi bërë një ligj të standardeve më të mira, duke respektuar meritat e secilës kategori që paguhet nga buxheti i shtetit. Askujt nuk do t’i ulet paga ekzistuese. Ligji parasheh vetëm rritje. Tani, fokusi do të jetë në sektorin privat, për rritjen e prodhimit vendor dhe nxitjen e ndërmarrësisë të hapë vende të reja pune dhe me paga më të larta”, ka shkruar Veseli.

Memli Krasniqi i përgjigjet akuzave të Isa Mustafës

Nënkryetari i Partisë Demokratike të Kosovës, Memli Krasniqi ka thënë se LDK dhe kreu i saj Isa Mustafa, janë bërë për keqardhje me veprimet e tyre qysh nga mandati i tij si kryeministër.

Pas akuzave të Isa Mustafës se Kadri Veseli është përgjegjës për grevat, në një prononcim për klankosova.tv, deputeti Memli Krasniqi ka thënë se ishte vet Isa Mustafa ai që në mandatin e tij si kryeministër, nuk qe në gjendje t’iu rriste pagat askujt e lëre më mësimdhënësve të paktën për 5%.

”Njeriu qe ne mandatin e tij s’ka qene ne gjendje t’ua rrite pagat askujt, e as mesimdhenesve, bile as per 5%, se paku do te duhej te heshte kur ky koalicion ua rrite pagat per 20%, me zotimin qe do te arrije 30% deri ne fund te mandatit”.

”Por, LDK dhe Isa Mustafa kane rene ne fund te pusit dhe jane bere aq per keqardhje, sa nuk ia vlen fare te komentohen deklaratat e tyre halucinative”, është shprehur Kransiqi për klankosova.tv.

Mustafa akuzon Kadri Veselin për grevën në arsim

Kryetari i Lidhjes Demokratike të Kosovës, Isa Mustafa ka fajësuar kryetarin e Kuvendit, Kadri Veselin për grevat në arsim.

Mustafa ka shkruar në Facebook se Veseli i gjeti paratë për ngritjen e pagave në arsim, për të cilat sipas tij Haradinaj nuk i kishte.

I pari i LDK-së ka thënë se grevat i ka organizuar Kadri Veseli, duke pretenduar se për këtë bëri edhe marrëveshje për ndërprerjen e grevës.

“Pesëqind mijë nxënës pësuan tre javë mësim për lojëra politike të Kadri Veselit. Ai sot, në rolin e ‘Kryeministrit’ arriti marrëveshjen me Sindikatën për ndërprerjen e grevës. Veseli i gjeti dhe i premtoi paratë, për të cilat Kryeministri Haradinaj deklarohej se nuk ka. Nga kjo rezulton se Veseli si Kryetar i PDK-së dhe i Kuvendit i ka organizuar grevat prandaj edhe bëri marrëveshjen për dalje nga greva”, ka shkruar Mustafa.

Ai gjithashtu ka thënë se po e pret marrëveshjen që Veseli do ta bëjë javën e ardhshme.

“Ndryshe si shpjegohet roli i Kryetarit të Kuvendit ( speaker -it) në këtë proces, kur këto janë përgjegjësi të ministrit të arsimit dhe të kryeministrit?! Shohim se çfarë marrëveshje tjetër do të bëjë Veseli javën e ardhshme”, përfundon postimi i Isa Mustafës në Facebook.

Ndryshe, greva në arsim u pezullua sot pas një marrëveshje ndërmjet SBASHK-ut dhe qeverisë.

Thaçi tregon qka u bisedua në takim me ambasadorin Kosnet dhe liderët

Pas më shumë se dy orë pasi përfundoi takimi mes liderëve, presidenti Hashim Thaçi ka publikuar një deklaratë.

Aty shkruan se si në takim u bisedua për ruajtjen e raporteve mes Kosovës dhe SHBA’ve, transmeton Teleshkronja Post.

Në postim Thaçi e ka përsëritur edhe një herë kërkesën se pret vendimmarrje të përgjegjshme në përputhje të plotë me interesat shtetërore sepse nuk ka kohë për të humbur.

Përfundon takimi i liderëve të koalicionit PANA

Udhëheqësit e koalicionit qeverisës të Kosovës kanë zhvilluar sot një takim të jashtëzakonshëm, në ndërtesën e Qeverisë.

Ky takim, i cili kishte nisur në pasditën e së mërkurës, ka zgjatur më shumë se dy orë.

Pas përfundimit të takimit, krerët e koalicionit nuk e kanë thënë asnjë fjalë.

S’është deklaruar as kryeministri Ramush Haradinaj, e as kryetari i Kuvendit, Kadri Veseli. Nuk kanë folur as zëvendëskryeministrat Fatmir Limaj e Behgjet Pacolli.

Në këtë takim ishte raportuar se mund të vendosej për ndryshime të mundshme në koalicionin qeverisës të vendit.

Pavarësisht interesimit të madh të mediave, gazetarët nuk janë lejuar brenda mbledhjes, madje as në objekt fare.

Takimi është mbajtur përkitazi me zhvillimin e një seance të Kuvendit të Kosovës, me shumë pika në rend të ditës.

Kadri Veseli i konfirmon edhe një herë ideatorët e taksës 100%

I ftuar në emisionin “Debat Plus” kryetari i Kuvendit dhe kryetari i Partisë Demokratike të Kosovës ka sqaruar edhe një herë vendimin e taksës 100%.

I pyetur nga Fidan Rama se kush është ideatori i vërtetë i taksës Veseli u përgjigj drejtë për drejtë.

“Ideator si fillim për masën prej 10 % ishte nga Enver Hoxhaj, më pas Haradinaj më ka thirrë në telefon dhe më ka thënë ta ngritim 30 %.”

“Kur më tha kështu kryeministri unë i thashë që nëse vërtetë dëshirojmë në vendim të tillë dhe mendoni se mund ta mbajmë deri në fund atëherë ta vendosim 100%.”

Kështu u shprehë Kadri Veseli, i cili po e kërkon pezullimin e taksës për 120 ditët e ardhëshme./TeleshkronjaPost/

Kryetari i Kuvendit Veseli me propozim konkret për taksën

Kryetari i Kuvendit të Kosovës, Kadri Veseli, njëherësh kryetar i Partisë Demokratike të Kosovës, ka deklaruar se taksa prej 100 për qind, e vendosur nga Qeveria e Kosovës ndaj Serbisë dhe Bosnjës e Hercegovinës, nuk do të hiqet.

Ajo mund të pezullohet përkohësisht dhe me kushte, si mirëbesim ndaj Shteteve të Bashkuara të Amerikës dhe Bashkimit Evropian, për disa arsye.

“Taksa doganore nuk duhet të hiqet, por ajo duhet të pezullohet për 120 ditë dhe gjatë kësaj periudhe duhet të vihen në fuqi disa kushte konkrete për pezullimin e saj. Dhe nëse pas 120 ditësh nuk kemi një situatë të re, ku sjelljet e Serbisë dhe të Bosnje e Hercegovinës ndryshojnë rrënjësisht, atëherë e njëjta taksë vazhdon, por edhe vendimet e tjera që me automatizëm dërgojnë në reciprocitet të plotë me këto dy vende”, ka thënë Veseli, në një shkrim të publikuar në llogarinë e tij zyrtare, në rrjetin social Facebook, në internet.

Deklarata e Veselit vjen pas një takimi që ai ka pasur sot me ambasadorin e Shteteve të Bashkuara të Amerikës në Prishtinë, Philip Kosnett.

Veseli ka thënë se interesat amerikane në Kosovë janë edhe interesa të Kosovës dhe po ashtu interesat e Kosovës janë edhe interesa të SHBA-ve, ndërsa ka shtuar se ky është një fakt i pamohueshëm dhe kështu do të mbetet gjithmonë.

“Kosovës nuk i duhet kursi i konfrontimit me SHBA-të e as me BE-në. Përkundrazi! Gjuha e kushtëzimeve ndaj partnereve tonë kryesorë strategjikë si SHBA dhe BE nuk do ta ndihmojë Kosovën as në mbrojtje të sovranitetit dhe integritetit territorial, e as në rrugën e saj drejt integrimeve euroatlantike”, ka shkruar Veseli.

Shkrimi i plotë i Veselit në Facebook:

Sot kam takuar Ambasadorin e SHBA-ve në Prishtinë, Philip Kosnett. E vlerësoj dhe e falënderoj edhe një herë publikisht qëndrimin amerikan në përkrahje të sovranitetit dhe integritetit territorial të shtetit të Kosovës dhe perspektivës euroatlantike të vendit tonë.

Pa dyshim, SHBA-të mbeten partneri ynë më strategjik dhe miku më i madh i Kosovës në të gjitha fazat dhe proceset e lirisë dhe shtetndërtimit.

Dua ta bëj të qartë se përkushtimet e SHBA-ve për zgjerimin e NATO-s në Ballkanin Perëndimor, për orientimin e vendeve të Ballkanit Perëndimor në BE dhe për paqen e qëndrueshme ne rajon, përmes Dialogut dhe fqinjësisë së mirë, janë edhe interesa vitale të vetë shtetit tonë.

Kosovës nuk i duhet kursi i konfrontimit me SHBA-të e as me BE-në. Përkundrazi! Gjuha e kushtëzimeve ndaj partnereve tonë kryesorë strategjikë si SHBA dhe BE nuk do ta ndihmojë Kosovën as në mbrojtje të sovranitetit dhe integritetit territorial, e as në rrugën e saj drejt integrimeve euroatlantike.

Republika e Kosovës, që disa muaj, ka vendosur taksën doganore prej 100% për produktet me origjinë nga Serbia dhe Bosnja e Hercegovina. Taksa është vendosur si kundërpërgjigje ndaj agresivitetit politik dhe diplomatik të këtyre dy shteteve kundër shtetit, qytetarëve dhe mallrave tona.

Ky është një vendim legjitim, i drejtë, i duhur dhe i imponuar ndaj institucioneve tona që po përballen me këtë agresion, prandaj edhe do të qëndrojë në fuqi për aq kohë sa këto shtete do të kenë një politikë të tillë kundër shtetit tonë.

Taksa asnjëherë nuk ka pasur dhe as nuk do të ketë orientim kundër aleatëve tanë kryesorë, SHBA-ve dhe BE-së, e as kundër interesave të tyre strategjike në Kosovë dhe në Ballkanin Perëndimor.

E ritheksoj se interesat amerikane në Kosovë janë edhe interesa të Kosovës dhe po ashtu interesat e Kosovës janë edhe interesa të SHBA-ve. Ky është një fakt i pamohueshëm dhe kështu do të mbetet gjithmonë.

Takimin që kam ftuar javën e kaluar, më 23 janar, bashkë me Kryeministrin dhe Ambasadorin Kosnett, ka qenë i frytshëm dhe në funksion të gjetjes së një zgjidhjeje kalimtare në lidhje me taksën ndaj Serbisë dhe Bosnje e Hercegovinës. Qëllimi i takimit ka qenë afrimi dhe jo largimi me SHBA-të.

Andaj, shqetësimet serioze, të shprehura në deklaratën e fundit të Ambasadës Amerikane, si vazhdimësi e letrës së Presidentit Trump, por edhe qëndrimin konsistent amerikan në lidhje me zhvillimet e fundit në vendin tonë, i marrim me seriozitetin më të madh dhe do t’iu përgjigjemi në mënyrë konstruktive.

Në takimin e javës së kaluar kam dhënë një propozim konkret, të cilit i qëndroj deri në fund. Taksa doganore nuk duhet të hiqet, por ajo duhet të pezullohet për 120 ditë dhe gjatë kësaj periudhe duhet të vihen në fuqi disa kushte konkrete për pezullimin e saj. Dhe nëse pas 120 ditësh nuk kemi një situatë të re, ku sjelljet e Serbisë dhe të Bosnje e Hercegovinës ndryshojnë rrënjësisht, atëherë e njëjta taksë vazhdon, por edhe vendimet e tjera që me automatizëm dërgojnë në reciprocitet të plotë me këto dy vende.

Besoj se ky është vendim i arsyeshëm, që e ruan dinjitetin e vendit, afirmon legjitimitetin e vendimit për taksën 100%, por edhe balancon interesin shumë strategjik të Kosovës, duke ruajtur dhe intensifikuar raportet me partnerët tanë kryesorë, SHBA-të dhe BE-në.

Qëndrimi im është që taksa duhet të mbetet si vendim i drejtë i Republikës së Kosovës, por pezullimi i përkohshëm, me kohëzgjatje prej vetëm 120 ditësh, duhet të ndodhë si masë mirëbesimi ndaj SHBA-ve dhe BE-së, edhe për këto arsye:

1. Kosova tregon përkushtimin e vet të palëkundur ndaj SHBA-ve dhe BE-së, si dhe ndaj prioriteteve të vëna për Ballkanin Perëndimor, të cilave ju besojmë edhe ne si shtet.

2. Kosova dëshmon se është pjesë e politikave të paqes dhe partneritetit dhe i promovon ato si politika të veta.

3. Përderisa qëndrimi i Kuvendit të Republikës së Kosovës është për t’i dhënë shans Dialogut për arritjen e Marrëveshjes Ndërkombëtarisht Obligative ndërmjet Kosovës dhe Serbisë, për çka është krijuar tashmë edhe Delegacioni Shtetëror, ne duhet t’i japim mundësi këtij procesi dhe zgjidhjes së të gjitha çështjeve të hapura. Ne besojmë se Dialogu është mjeti më efikas dhe i domosdoshëm për t’i tejkaluar të gjitha mosmarrëveshjet në Ballkanin Perëndimor dhe si shtet duhet të jemi promovues permanentë të këtyre vlerave.

4. Dialogu, si proces, mund dhe duhet të ndodhë me një format dhe orar që përcaktohet në pajtim me partnerët tanë perëndimorë. Por, qasja konstruktive e Republikës së Kosovës në këtë proces nuk duhet të merret si e mirëqenë dhe të shërbejë si mundësi përfitimi për Serbinë në rrugën e saj drejt BE-së, derisa qytetarët e Kosovës ende janë të izoluar, pa të drejtën e lëvizjes së lirë në Zonën Schengen.

5. Kosova duhet të jetë e përkushtuar për përfundim të suksesshëm të Dialogut. Por, nëse ky proces nuk rezulton me Marrëveshje të pranueshme për Republikën e Kosovës, shteti ynë do të rivendosë taksën prej 100% dhe do të ndërmarrë masa të tjera shtesë për vendosjen e reciprocitetit të plotë, për të mbrojtur interesat tona politike dhe ekonomike.

Kujtesa jonë politike në Kosovë na lë të kuptojmë pa dyshim se kërkesat e SHBA-ve gjithmonë kanë rezultuar me veprime pozitive për Kosovën dhe qytetaret e saj. Konferenca e Rambujesë, intervenimi i NATO-s, Pakoja e Ahtisaarit, Pavarësia e Kosovës, si dhe së fundmi mbështetja për themelimin e Ushtrisë së Kosovës, e shumë vendime e veprime të tjera, janë dëshmitë më të pakontestueshme se kurdoherë që kemi qenë në linjë të njëjtë me SHBA-të vetëm kemi fituar dhe asnjëherë s’kemi humbur.

Në politikën kosovare, në shoqërinë tonë, në popullin tonë, nuk duhet të ketë asnjë pikë dyshimi se harmonizimi i Kosovës me SHBA-të i sjell vetëm të mira popullit të Kosovës. Përkundrazi, vetëm harmonizimi i Kosovës me SHBA-të është garanci për suksesin e Kosovës në çdo aspekt. Andaj, kokëfortësia ndaj kërkesave të mikut tonë më të madh nuk është politike shtetformuese.

Vendimet tona politike duhet të kenë në thelb të vetin interesin e shtetit dhe të qytetarëve tanë, e jo qasjen iracionale të përfitimeve politike individuale, grupore e partiake.

Prandaj, në Dialog duhet të shkojmë më të bashkuar dhe më të qartë se kurdoherë me parë. Kjo është qasja ime, por edhe e koalicionit tonë. Kushtetuta e Kosovës është mandati dhe baza jonë e vetme në Dialog. Sovraniteti, integriteti territorial dhe karakteri unitar i shtetit tonë janë të pacenueshme. Andaj, nuk do të ketë as këmbim territoresh, e as Asociacion të komunave me kompetenca ekzekutive. Çfarëdo vendimi që mund të vijë nga përfundimi i Dialogut, do ta ketë vulën dhe vullnetin e qytetarëve të Republikës së Kosovës, përmes të të zgjedhurve të tyre në Kuvendin e Republikës së Kosovës, si dhe përmes referendumit.

Në këtë proces, ne duhet t’i bashkërendojmë veprimet tona me partnerët tanë strategjikë, para së gjithash me SHBA-të. Dhe në këtë drejtim, askush nuk duhet ta lëkundë besimin tonë te SHBA-të, e as besimin amerikan te ne. Çfarëdo qëndrimi që e vendos Kosovën në kursin e konfrontimit me SHBA-të nuk do ta ketë mbështetjen time asnjëherë.

Kërkesa e Veselit bën që mjekët, policët dhe mësuesit të fitojnë rritje page

Kërkesa e Kryetarit të Kuvendit të Kosovës, Kadri Veseli për uljen e koeficientit të pagës së tij nga 11 në 9, ka sjellë ndryshime drastike në sistemin e pagave.

Ky ndryshim si parim kryesor do të shkaktojë një zvogëlim të pagave për politikanët dhe të emëruarit e tyre, por rritje për kategoritë tjera publike; mjekët, mësuesit, policët, etj.

Një burim i lajmi.net brenda Komisionit për Administratë Publike që tash e disa ditë po punon në Ligjin për Pagat, ka shpjeguar në detaje se çfarë efekti ka pasur kërkesa e Veselit për ulje të pagës së tij.

Kjo kërkesë ka ndikuar që të bëhen ndryshime të rëndësishme në ligj.

Fillimisht, ajo e ka bërë jo funksional vendimin e qeverisë për rritjen e pagave të tyre, duke kursyer një vlerë prej 7 milionë euro.

Me ndryshimet që po ndodhin, duke u zvogëluar pagat enorme të ndërmarrjeve publike buxhetit të shtetit i kursehen edhe 38 milionë euro në tri vitet e ardhshme.

“Në ndërmarrjet publike nuk do të ketë më paga super të larta dhe rritje me vendim nga vet ata. Paga më e lartë në ndërmarrje publike do të jetë rreth 1.600 euro”, ka thënë ky burim i lajmi.net.

Me këto kursime, pritet të ketë rritje në sektorët tjerë të rëndësishëm në vend, e të cilët tash e disa ditë janë duke mbajtur greva apo kanë paralajmëruar të tilla.

Sipas kësaj logjike në shëndetësi, specialisti do të marrë pagë prej 1458, rritje të pagës për 70%. Mjeku i përgjithshëm do të marrë pagë 812 euro apo 50% rritje. Infermierët do të kenë rritje në pagat e tyre për rreth 50 euro.

Mësimdhënësit, varësisht, koeficienti do t’ju rritet për 0.20%. Shërbyesve civil që kanë koeficient nën 2.7, iu rritet paga për 50 euro.

Policia nga 391 euro pagën do ta kenë, bazuar me këto ndryshime, 528 euro. Shto kësaj edhe shtesat që ata marrin, diku paga e tyre do të shkojë deri në 728 euro. Ligji për Pagat do të jetë së shpejti në seancë për miratim.