ZYRTARE: Nisma Social Demokrate dhe AKR nënshkruajnë koalicion para zgjedhorë me Limajn kandidatë për kryeministër

Fatmir Limaj dhe Behgjet Pacolli kanë nënshkruar sot koalicionin parazgjedhor me të cilin do të futen në zgjedhjet e parakohshme, pas dorëheqjes së Ramush Haradinajt nga posti i kryeministrit.

Fatmir Limaj në fjalën e tij ka treguar se do të jetë kandidat për kryeministër nga ky koalicion, duke shtuar se do të shkojnë të vetëm në zgjedhje dhe se do të jenë faktor determinues për krijimin e qeverisë së ardhshme.

“Është një lajm i mirë për vendin. Lajm i mirë për politikën në vend. Një lajm që tregon se me këtë vendim të sotit, do të ndërtojmë një bosht politik, presim që të bashkohen edhe grupe tjera politike. Besoj që është shumë e rëndësishme të kemi një frymë konkstruktive. Besoj që koalicioni parazgjedhor NISMA-AKR, jep një mundësi të tillë. Unë kam nderin që do të jem kandidat për kryeministër nga ky koalicion”, ka thënë Limaj.

Ndërkohë, Pacolli ka thënë se do të kenë një listë të përbashkët zgjedhore dhe se do të bëjnë një punë dinjitoze.

“AKR dhe NISMA mbrëmë kanë biseduar për koalicion. AKR dhe NISMA do të jenë në një koalicion parazgjedhor. Do të kenë një listë të përbashkët, me kandidatin e vetë për kryeministër. Do të bëjmë një punë dinjitoze”, ka thënë Pacolli.

Nisma-AKR bëhet koalicioni i dytë para zgjedhorë, pas koalicionit AAK – PSD./TeleshkronjaPost/

Limaj: Kosova po pret të rinjtë të marrin përgjegjësitë

Nisma Socialdemokrate ka mbajtur Kuvendin e II Zgjedhor të Rinisë.

Me pjesëmarrjen e rreth 700 delegatëve, Nisma ka zgjedhur strukturat e reja drejtuese të rinisë në krye me Xhemajl Hazizin, kryetar i Rinisë së Nismës.

Në këtë Kuvend morën pjesë strukturat më të larta të këtij subjekti.

Kryetari i Nismës, Fatmir Limaj, tha se kanë ardhur në këtë Kuvend shumë më të organizuar me një strukture të profesionalizuar dhe me një përvoje të admirueshme politikë.

Limaj ka thënë se shumë punë është bërë për të krijuar rininë e Nismës, e cila i dha sukses e shpirt platformës politike të Nismës.

“Ku kemi qenë pesë vite me parë e ku jemi sot. Me punë e përkushtim orientim të qartë e më shumë sfida pa u ndalur jemi këtu ku jemi sot. Djemtë dhe vajzat tona të rinisë sot marrin përgjegjësi shtetërorë”, ka thënë Limaj në Kuvendin e II Zgjedhor të Rinisë.

Limaj tha se pesë vite me parë askush nuk ka menduar që kaç shpejt mund të arrijmë këtu ku jemi.

“Rinia e Nismës ishte promotor i suksesit tonë. Në të gjitha komunat ku arritëm suksese të mëdha në zgjedhjet lokale dhe qendrore të vitit 2017. Sot shumë djem e vajza tona kanë marrë përgjegjësi ekzekutive e legjislative. Ëndrra jonë e përbashkët është fuqizimi i shtetit të Kosovës për të qenë secili krenar këtu”, ka shtuar Limaj.

Kryetari i Nismës ka kërkuar nga të rinjtë që në asnjë variant të dorëzohen para çfarëdo sfide.

Limaj ka thënë se Kosova shtet i pavarur dhe konsoliduar po pret të rinjtë të marrin përgjegjësitë shtetëror.

Ai ka kërkuar nga të rinjtë të mos ia kthejnë shpinën Kosovës, edhe pse është i vetëdijshëm se ka shumë probleme me të cilat të rinjtë ballafaqohen.

“Imagjinoni gjeneratat e para luftës po të iknin nga vendi. Secili kemi mund të dilnim jashtë e me heq dorë nga vendi. Por, sot nuk do të folshim sot për shtet të pavarur. Nuk do të folshim sot për sukseset në sport e muzike. Sot ata do të kishin emra tjerë dhe do përfaqësonin kombe e shtete tjera. Lidhja e njeriut me tokën e vet është lidhje e shenjtë që Zoti e ka lënë. Askund kokën më lartë nuk mund ta mbani se aty ku ju ka lindë nëna juaj”, ka theksuar Limaj.

Ai ka ftuar të rinjtë të mobilizohen dhe të frymëzohen me dëshirën për të forcuar vendin tonë.

“Detyra jonë si parti është ta dërgojmë Kosovën në një stad tjetër të zhvillimit. Ta bëjmë këtë vend më të mirë të jetueshëm për të gjithë. Nisma në pesë vitet e ardhshme do të jetë platforma që do të drejtojë shtetin e Kosovës”, ka përfunduar Limaj.

Kryetari i Këshillit Kombëtar, Jakup Krasniqi, tha se ndjehet i lumtur që në pesë vjetorin e Nismës sheh plot të ri dhe të reja që duan të angazhohen në këtë subjekt politikë për t’i kontribuar vendit dhe qytetarëve tanë.

“Të rinjtë dhe të rejat sot i mbushin sallat për të bërë angazhimin organizimin dhe veprimin e tyre politikë për vendin e vet dhe qytetarët e vendit dhe gjeneratën e vet”, ka thënë Krasniqi.

Kryetari i ri i Rinisë së Nismës, Xhemajl Hazizi tha se të rinjtë e Nismës vetëm të bashkuar mund t’ia dalin mbanë. Ai ftoi të rinjtë që të jenë aktiv dhe shtoi se çelësi i suksesit tha se do të jetë bashkëpunimi me të rinjtë anëkend vendit.

Ai ka falënderuar kryetarin e deritashëm të rinisë, Albert Maxhunin dhe kryesinë e mëhershme që në situata të vështira kanë bërë punë të madhe.

Fatmir Limaj e ‘kap’ fort shtetin, punëson farefisin e vet e të partisë

Pronë prive po i konsideron institucionet e shtetit, Nisma Socialdemokrate.Punësimi i një anëtari të familjeve që nuk kanë të punësuar ishte premtim i Nismës Socialdemokrate. Këtë premtim e kishte dhënë kreu i kësaj partie, Fatmir Limaj. Dikasteret qeveritare që udhëhiqen nga Nisma tash e sa kohë kanë filluar ta jetësojnë këtë plan, por jo duke u dhënë mundësi të barabartë të gjithë qytetarëve.

Djali, dhëndëri, motra e gruas dhe bashkëshortja e shoferit personal -janë vetëm disa nga të afërmit e zëvendëskryeministrit Limaj, të cilët janë punësuar në ministritë të cilat udhëhiqen nga Nisma Socialdemokrate, shkruan lajmi.net.

Keq nuk kanë mbetur as familjarët e anëtarëve të tjerë partisë së Limajt. Shoqëria civile dhe mediet po raportojnë në vazhdimësi për këto punësime.

MTI-ja ‘kapët’ fort

Ministria e Tregtisë dhe Industrisë që udhëhiqet nga Endrit Shala i partisë së Nismës Socialdemokrate, po rehaton në këtë institucion familjarë të bashkëpartiakëve. Lajmi.net ka gjetur se Donjeta Bytyqi është njëra prej punësimeve të reja në MTI. Ajo u zgjodh si më e mira për pozitën “Zyrtar i lartë për ekzaminim” në konkursin që u hapë për këtë pozitë.

Lajmi.net ka mësuar se Bytyçi është mbesa e deputetit të Nismës Socialdemokrate, Haxhi Shala. Burimet e lajmi.net kanë treguar se e njëjta nuk i ka plotësuar kriteret që vetë MTI-ja i ka vendosur në konkurs, respektivisht nuk e ka përmbushur kriterin e përvojës së punës që është kërkuar që kandidati të këtë minimum tri vite përvojë pune profesionale. Se është mbesa e tij, e ka pranuar për lajmi.net vetë deputeti Shala.

Ndërkohë, ministria e Tregtisë dhe Industrisë, që udhëhiqet nga partia Nisma Socialdemokrate i ka hapur dyert edhe për njerëzit tjerë të afërm të krerëve të kësaj partie. Gazeta JnK ka raportuar se si janë punësuar të afërmit e Fatmir Limajt, Jakup Krasniqit e Valdete Bajramit.

Veron Selmani, burri i vajzës së Fatmir Limajt, është punësuar në Ministrin e Tregtisë dhe Industrisë, e cila udhëhiqet nga NISMA. Kryetar i NISMA Socialdemokrate është Fatmir Limaj. Sipas JnN-së, konsulent për çështje financiare, është pozita për në të cilën Veron Selmani është angazhuar me kontratë për shërbime të veçanta në mars të vitit 2018 në Agjencinë KISEA. Kjo Agjenci është në kuadër të MTI-së. Në të njëjtën ministri është punësuar Durim Limaj, djali i Fatmir Limajt.

Media në fjalë poashtu ka gjetur se Taulant Krasniqi, nipi i Jakup Krasniqit, është punësuar si inspektor i naftës në ministrinë që drejtohet nga partia e themeluar nga Fatmir Limaj e Jakup Krasniqi. Kunata e ish-deputetes Valdete Bajramit do të kujdeset për monitorimin dhe kontrollin e cilësisë së naftës. Ajo është punësuar në MTI përmes një konkursi, kriteret e të cilit ishin vendosur në përputhje me shkollimin e saj. Shkëndije Bajrami – Azizi, kunata e Bajramit, është pranuar në punë përmes konkursit të dytë për inspektore e tregut për cilësinë e naftës. Ajo është punësuar vetëm pasi MTI-ja ka arritur të ndryshojë kriteret e konkursit, duke i përshtatur me përgatitjen profesionale të Bajrami-Azizit. Konkursi i parë ishe anuluar me vendim të Këshillit të Pavarur Mbikëqyrës për Shërbimin Civil, pasi ky Këshill kishte konstatuar se MTI-ja në mënyrë të kundërligjshme e kishte futur Fakultetin e Shkencave Matematike-Natyrore (FShMN) si diplomë e përshtatshme për punësim.

MASHT-i shembull i abuzimit, strehë e militantëve dhe nepotizmit

Rrjeti i OJQ-ve AVONET ka bërë hulumtimin dhe si rezultat i kësaj ka identifikuar se rekrutimi në Ministrinë e Arsimit, Shkencës dhe Teknologjisë është bërë në baza politike dhe familjare, pothuajse komplet në këto punësime janë personat të cilët janë pranuar dalin të jenë pjesë e strukturave të partisë Nisma Socialdemokrate, parti e cila udhëheq me këtë ministri.

AVONET ka publikuar disa nga personat të cilat lidhen drejtpërdrejt me militant dhe familjar të partisë NISMA Socialdemokrate, siç janë: Shkurte Gashi, ishte kandidate për asamble në Komunën e Prishtinës; Valdete Prebeza, ishte kandidate për asamble në Komunën e Prishtinës; Arianit Krasniqi, kryetar i rinisë të Degës Nisma Socialdemokrate në Malishevë; Rudina Restelica, e aderuar në muajin qershor 2018 në partin Nisma Socialdemokrate; Veton Kastrati ish-asamblist i partisë Nisma dega në Malishevë; Lavdim Rizani anëtar i degës së partisë Nismës në Lipjan; Diana Bytyqi,bashkëshortja e Ardian Gashit zyrtarit të Nismës për Media; Alberina Foniqi Boja, anëtare e forumit të gruas në Suharekë; Në këtë institucion përmes një projekti të MPMS është punësuar mbesa e ministrit Beslina Hoxha dhe Milot Hyseni, djali i motrës së bashkëshortes se ministrit; Ardita Muqolli e cila ka aderu në muajin qershor në Nismë.

“Në bazë të nenit 65 (1) të Kushtetutës së Republikës së Kosovës, KODI PENAL I REPUBLIKËS SË KOSOVËS me nr. 04/L-082 i Kuvendit të Republikës së Kosovës. Neni 222. Cenimi i të drejtave të punësimit dhe papunësisë. Kushdo që ia mohon apo kufizon personave tjerë të drejtën në punësim në kushte të njëjta, ashtu siç që është përcaktuar me ligj, dënohet me gjobë ose me burgim deri në dy vjet”.

AVONET, konsideron se përgjegjësi e kësaj praktike është ministri Bytyqi, i cili është udhëheqës i kësaj ministrie dhe përgjegjësia i takon ministrit Bytyqi, po ashtu ai është në dijeni për këtë praktik, ku ky ministër ka të punësuar edhe të afërt të tij.

Praktika e njëjtë si nëpër borde është vazhduar edhe në emërimin e sekretarëve të përgjithshëm nëpër ministri, konkretisht në Ministrinë e Arsimit dhe atë të Tregtisë dhe Industrisë.

Qeveria e Kosovës kishte emëruar sekretar të Ministrisë së Arsimit, Ekrem Kastratin. Kastrati i emëruar sekretar në ministrinë e udhëhequr nga Nisma, mandatin e kaluar ishte drejtor komunal në Malishevë, komunë e udhëhequr po ashtu nga Nisma. Kjo ishte bërë pa pëlqimin e britanikëve dhe pa plotësim kriteresh. Pavarësisht që ambasada britanike si partner në përzgjedhjen e pozitave të larta dhe komisioni vlerësues kishin dhënë rekomandim se asnjëri nga tre kandidatët nuk kishte dhënë rezultat të kënaqshëm, ministri i arsimit, Shyqiri Bytyqi kishte propozuar emrin e Kastratit për këtë pozitë. Ngjashëm kishte ndodhur edhe me emërimin e sekretarit e përgjithshëm në MTI. Qeveria kishte vendosur ta emërojë Burim Rrecajn sekretar në këtë ministri, ani pse ai nuk i kishte plotësuar kushtet dhe ishte i renditur i katërti në listën e vlerësimit.

Kundër këtij vendimi kishin reaguar edhe një grup i organizatave të shoqërisë civile.

Punësime edhe në ministrinë e Diasporës

Promovimi i Investimeve tek Investimet Strategjike në Ministrinë e Diasporës ka disa muaj që janë në duart e Sadbere Balajt. Ministria e Diasporës dhe Investimeve Strategjike ka punësuar Balajn e cila është motra e bashkëshortes së Fatmir Limajt, kryetar i partisë NISMA Social Demokrate.

Në ministrinë e Diasporës dhe Investimeve Strategjikë është punësuar edhe Mirlind Hyseni. Lajmi.net ka mësuar se Hysen është djali i motrës së bashkëshortes së Ministrit të Arsimit, Shyqyri Bytyqi.

Ushtruese e Detyrës së Sekretares së kësaj ministrie është Shyhrete Gosalci, ish kandidate për deputete të NISMA-s, në vitin 2014.

Për këto punësime lajmi.net la kërkuar përgjigje edhe nga zyra për informim e kësaj ministrie, por nuk ka marr përgjigje.

Në Ministrinë e Punës dhe Mirëqenies Sociale e cila udhëhiqet nga ministri i Nismës Socialdemokrate, në Departamentin e Zyrës së Auditorit të Brendshëm është punësuar, bashkëshortja e Shpëtim Telakut shofer personal i Fatmir Limajt

Institucionet e Republikës së Kosovës i kanë hapur dyert për gjashtë nipërit e ish-kryetarit të Kuvendit të Kosovës, Jakup Krasniqit.

Siç ka raportuar Insajder, katër vëllezërit e Krasniqit, kanë të punësuar djemtë e tyre në institucione të ndryshme të vendit. Abdyli vëllai i Jakup Krasniqit ka të punësuar dy djemtë e tij në institucione të vendit, ndërsa vet ai është pjesë e Autoritetit Kosovar të Konkurrencës. Vëllai tjetër i Jakupit, Halimi që kishte qenë drejtor në një shkollë në Negrovc, ka të punësuar djalin e tij në ministrinë e Punës dhe Mirëqenies Sociale.

Zv.kryeministri Limaj, në fushatën zgjedhore të qershorit të vitit 2017, kishte dhënë një premtim të madh. Pati thënë se nuk do të ketë familje në këtë që nuk do ta ketë së paku një person të punësuar.

“Janë me mijëra familje që nuk e kanë asnjë të punësuar dhe ne duam ta ndërlidhim ndërmarrjen tonë me agjencinë e punësimit dhe t’i lidhim ndërmarrësit tanë me shkollat tona profesionale dhe kjo garanton apo siguron mundësi tjetër për punësim edhe zhvillim ekonomik të vendit. Koha është të ndryshohet gjendja”, kishte thënë Limaj. /Lajmi.net/

Pendohet Fatmir Limaj pas takimit me amerikanët

Pendohet Fatmir Limaj ! Ashtu edhe siç pritej, pas takimit me njerëzit e dërguar nga administrata Trump është zbutur në qëndrimin për taksën ndaj produkteve serbe, duke e lënë kryeministrin Ramush Haradinajn të vetmin që insiston në mbajtjen e taksës.

Dy bashkëkryesuesit e ekipit negociator të krijuar me platformë të Kuvendit, Fatmir Limaj e Shpend Ahmeti, janë takuar me delegacionin amerikan sot në zyrën e presidentit Hashim Thaçi.

I pari i Nismës, Limaj, në Facebook ka shkruar se delegacionit amerikan u ka thënë se po punojnë që të unifikojnë qëndrimin rreth taksës, në mënyrë që të mundësohet fillimi i dialogut, duke marrë parasysh këshillat e amerikanëve.

“Shfrytëzova rastin për thënë se vendimi për taksën ka qenë vendim shtetëror dhe tashmë është e qartë se ka këndvështrime të ndryshme rreth kësaj teme. I sigurova që po punojmë fuqishëm që institucionet e Kosovës rreth kësaj çështjeje të kenë një qëndrim unik i cili do t’i mundësonte edhe fillimin e dialogut duke marrë parasysh këshillat e miqve tanë amerikanë”, shkruan ndër të tjera Limaj.

Dihet se këshillat e amerikanëve janë që taksa të hiqet, ndërsa ky është edhe kushti që Serbia ka vënë për ta vazhduar dialogun.

Postimi i plotë i Limajt:

Sot në zyrën e presidentit, ne si Delegacion Shtetëror për Bisedime me Serbinë, u takuam me përfaqësuesit e lartë të Këshillit Kombëtar të Sigurisë së Shteteve të Bashkuara të Amerikës, John Erath dhe Brad Berkley,

Unë shfrytëzova rastin që dy zyrtarët e lartë të Shtëpisë së Bardhë t’i njoftoj për punën e deritanishme të Delegacionit Shtetëror, për parapërgatitjet që po i bëjmë për dialogoun e mundshëm me Serbinë.

Njoftova për përgatitjen e platformës për bisedime e cila, pas miratimit nga ana e institucioneve, është proceduar në Kuvend dhe shpresoj që Kuvendi i Kosovës të diskutojë dhe votojë këtë platformë e cila do ta paraqesë qëndrimin zyrtar të Kosovës në dialogun e ardhshëm me Serbinë.

Gjithashtu shpreha shqetësimin tonë për sjelljen e shtetit serb në raport me Kosovën, ndërhyrjen që çdo ditë Serbia i bën në Kosovë dhe ndaj qytetarëve të Kosovës, pengesat që i bën Kosovës dhe qytetarëve të saj. Përmendëm arsyet që na kanë detyruar ta marrim vendimin për taksën.

Përfaqësuesit e lartë të Këshillit Kombëtar të Sigurisë së Shteteve të Bashkuara të Amerikës, John Erath dhe Brad Berkley, edhe njëherë paraqitën qëndrimin e njohur amerikan për pezullimin e taksës për t’i dhënë mundësi dialogut dhe përkushtimin e SHBA-ve për të parë sa më shpejt një marrëveshje mes Kosovës dhe Serbisë e cila do ta mbyllte njëherë e përgjithmonë konfliktin mes dy vendeve.

Shfrytëzova rastin për të thënë se vendimi për taksën ka qenë vendim shtetëror dhe tashmë është e qartë se ka këndvështrime të ndryshme rreth kësaj teme. I sigurova që po punojmë fuqishëm që institucionet e Kosovës rreth kësaj çështjeje të kenë një qëndrim unik i cili do t’i mundësonte edhe fillimin e dialogut, duke marrë parasysh këshillat e miqve tanë amerikanë.

Thaçi tregon qka u bisedua në takim me ambasadorin Kosnet dhe liderët

Pas më shumë se dy orë pasi përfundoi takimi mes liderëve, presidenti Hashim Thaçi ka publikuar një deklaratë.

Aty shkruan se si në takim u bisedua për ruajtjen e raporteve mes Kosovës dhe SHBA’ve, transmeton Teleshkronja Post.

Në postim Thaçi e ka përsëritur edhe një herë kërkesën se pret vendimmarrje të përgjegjshme në përputhje të plotë me interesat shtetërore sepse nuk ka kohë për të humbur.

Përfundon takimi i liderëve të koalicionit PANA

Udhëheqësit e koalicionit qeverisës të Kosovës kanë zhvilluar sot një takim të jashtëzakonshëm, në ndërtesën e Qeverisë.

Ky takim, i cili kishte nisur në pasditën e së mërkurës, ka zgjatur më shumë se dy orë.

Pas përfundimit të takimit, krerët e koalicionit nuk e kanë thënë asnjë fjalë.

S’është deklaruar as kryeministri Ramush Haradinaj, e as kryetari i Kuvendit, Kadri Veseli. Nuk kanë folur as zëvendëskryeministrat Fatmir Limaj e Behgjet Pacolli.

Në këtë takim ishte raportuar se mund të vendosej për ndryshime të mundshme në koalicionin qeverisës të vendit.

Pavarësisht interesimit të madh të mediave, gazetarët nuk janë lejuar brenda mbledhjes, madje as në objekt fare.

Takimi është mbajtur përkitazi me zhvillimin e një seance të Kuvendit të Kosovës, me shumë pika në rend të ditës.

Fjalët e kryesuesve të dialogut pas takimit me presidentin Thaçi

Kryesuesi i Ekipit Negociator për dialogun me Serbinë, Shpend Ahmeti pas takimit me presidentin Hashim Thaçi, ka bërë të ditur se presidenti Thaçi sot ua ka dorëzuar një raport mbi takimet që ka zhvilluar në Bruksel.

“Zotëri Thaçu na ka dorëzuar raportin për fazën finale të dialogut Kosovë-Serbi . Ky është një raport i zyrës së presidencës për dialogun shtetëror, pra nuk është dokument pra nuk është transkript i temave që ka pas z.Thaçi, por është raport i ekipit të presidentit për temat e ndryshme që janë hapur në Bruksel si pjesë e fazës përfundimtare të dialogut,. Këtu figurojnë tema si të zhdukurit, të zhvendosurit, trashëgimia kulturore, pronat në të dyja shtetet, të drejtat e minoriteteve etj.”, u shpreh Ahmeti.

Ai shtoi se këtë material do t’ia dorëzojnë ekipit të dialogut shtetëror, dhe do të shohin nëse do të kenë pyetje shtesë, shkruan Telegrafi.

Ahmeti theksoi se presidenti Thaçi u ka siguruar se nuk ka asnjë draft-marrëveshje të nënshkruar me Serbinë.

“Edhe në raport shkruan, por dhe në takim z.Thaçi tha se nuk ka asnjë draft zyrtarë të dakorduar qoftë me Brukselin qoftë me Serbinë, pra nuk ka draft-marrëveshje. Konfirmuam që deri më tani kanë ndodhur 3+1 takime, takimi i katërt nuk është bërë shkaku i taksës, pasi që është tërhequr pala serbe”, theksoi Ahmeti.

Ahmeti bëri të ditur se së shpejti do ta kenë vizitën e dytë në Bruksel, ku do të flasin më tutje për dialogun.

Në anën tjetër, Fatmir Limaj shtoi se pas pranimit të këtij raporti, tani e dimë se ku jemi si shtet në këtë proces.

“Ne tani e dimë ku jemi si shtet në këtë proces. Dalëngadalë po ndërtohet një bazë për të ecur përpara”, theksoi Limaj.

Limaj shtoi se Ekipi Negociator do të punoj intensivisht që këtë dokument tia dërgojmë sa më parë Kuvendit.

Limaj i përgjigjet Thaçit nga Brukseli: Gara për taksën s’të bën nder

Hashim Thaçi dje ka provuar që meritat për vendosjen e taksës 100 për qind ndaj Serbisë, t’ua delegojë ish-bashkë partiakeve të tij, Enver Hoxhajt e Kadri Veselit, duke thënë se ideja për atë vendim ishte e tyre.

Megjithatë sot nga Brukseli, zëvendësi i Ramush Haradinajt, Fatmir Limaj, i ka dhënë një përgjigje, duke thënë se vendime të tilla nuk janë individuale.

Limaj ka thënë se politikat bëhen nga koalicioni qeverisës dhe vendimet për ato politika i merr kryeministri i Republikës së Kosovës, Ramush Haradinaj.

“Vendimet shtetërore janë vendime shtetërore. Nuk ka vendime e propozime individuale. Qeveria është atje e ka një kryeministër, e ka një qeveri, një koalicion. Politikat i bon koalicioni, vendimet i merr Qeveria”, ka thënë Limaj në konferencë para gazetarëve në Bruksel.

Sipas tij kjo garë për të marrë meritat si për dialog si për çështje tjera nuk i bëjnë nderë askujt.

“Kjo garë dhe kjo logjikë e garës, si këtu për dialog, si atje. Për besë kërkun nuk na çojnë”, ka shtuar ndër të tjera Limaj.

Sa i përket deklarimeve të Hashim Thaçit të bëra në ‘Washington Post’ se Kosova është gati ta shqyrtojë heqjen e taksës, Limaj e ka përsëritur edhe një herë që taksa do të hiqet vetëm pas një marrëveshje finale që rezultat do të kishte njohjen e pavarësisë së Republikës së Kosovës nga Serbia.

“E bëmë të qartë që tashmë Kosova ka ekip, dhe jo individ. Ka ekip shtetëror. Ne e tham edhe aty, duhet të hiqen arsyet pse ka ardhur taksa. Ka shumë kushte që Serbia duhet t’i plotësojë për ta tërhequr taksën. Kjo nuk është e një anshme. Ne jemi në kushte të tilla që jetojmë me Serbinë. Ka qindra marrëveshje që Serbia nuk i ka respektuar. S’po flasim për këtë fushatën e egër kundër Kosovës. Edhe çështja e taksës në një marrëveshje gjithëpërfshirëse nuk do të ketë nevojë për taksë”, ka thënë ndër të tjera Fatmir Limaj.

Së bashku me Limajn në Bruksel ka qenë edhe kryetari i PSD-së, Shpend Ahmeti. Para gazetarëve Ahmeti ka folur edhe rreth idesë për korrigjim të kufijve, duke thënë se BE-ja e mbështet çfarëdo marrëveshje për të cilën merren vesh Kosova dhe Serbia.

“BE-ja nuk përkrah shtete etnikisht të pastërta”, ka shtuar Ahmeti