Historia e plotë e 16-vjeqares nga Drenasi, mësimdhënësit dhe policit

39 vjeçari Sh.Xh, mësimdhënës në shkollën e mesme “Skënderbeu” në Drenas, dyshohet se për gati dy vite ka kryer marrëdhënie seksuale me të miturën A.G, e cila më pas dyshohet se u përdhunua edhe nga polici V.V.

Për historinë me arsimtarin e saj vajza e mitur kishte raportuar në Polici, por i kishte tërhequr më vonë deklaratat. Pas publikimit të rastit të saj, mësimdhënësi Xhekaj u suspendua për të dytën herë, për shkak të raporteve me të miturën deri në një vendim të Gjykatës. Express gjatë ditës ka qëndruar në Drenas, nga ku sjell rrëfimin për rastin

Në shkollën e mesme “Skënderbeu” në Drenas, mësimi të mërkurën po vazhdonte si zakonisht. Vetëm një ditë më parë, u bë e ditur se njëri nga profesorët e kësaj shkolle kishte abuzuar seksualisht me një të mitur, gjithashtu nxënëse në këtë shkollë.

Edhe pse mbi të po rëndonin këto akuza, Shkëlzen Xhekaj që jepte “Teknologji Informative”, kreu gjatë ditës orët që i kishte me nxënësit.

Ai ishte shumë i bindur se asgjë nga ato që kishte deklaruar e mitura A.G (emër i njohur për redaksinë), nuk ishin të vërteta, e thirrej mbi një vendim të prokurorisë që kishte pushuar hetimet për këtë rast.

Fillimisht, arsimtari Xhekaj tha se nuk ka çka të deklarohet për media, duke shtuar se drejtësia kishte vendosur pro tij.

Mirëpo, në një prononcim për Expressin, drejtori i shkollës, Valdet Istogu, kishte rrëfyer për rastin, duke shtuar se Xhekaj ishte suspenduar për një kohë, e edhe pasi kishin pushuar hetimet, Drejtoria Komunale e Arsimit, për gati katër muaj kishte hezituar që të njëjtin ta kthente në mësim.

“Ishte suspenduar deri sa të merrte vendim gjykata, kështu kishte vendosur DKA’ja. Drejtoria e ka pru vendimin. Gjykata me vendim e kishte shpallë të pafajshëm, edhe e ka çu letër edhe drejtorisë komunale që me e rikthy në vendin e vetë të punës. Edhe para se me ndodh kjo as nxënësi as prindi nuk janë ankuar te ne që mësimdhënësi në fjalë pe kushtëzon apo pe ngacmon” tha Istogu.

Drejtori ka konfirmuar se nxënësja tashmë po vazhdon mësimet rregullisht dhe momentalisht është në klasën e 12, ndërsa rasti kishte ndodhur kur ajo kishte qenë në klasën e 11.

As nxënësja e as familjarët e saj, sipas drejtorit nuk kanë deklaruar në shkollë asnjë nga këto shqetësime, përveç se te organet e rendit.

Drejtori po thotë se nuk kishin as informacione për ndonjë kushtëzim në notë dhe nxënësja kishe sjellje normale, nuk ishte agresive dhe nuk bënte mungesa.

Sipas tij, e gjithë ngjarja ka ndikuar në imazhin e keq të shkollës.

E mësimdhënësi Xhekaj gjatë ditës së nesërme, nuk do të mund të vazhdojë të jap mësim.

Krejt kjo, pasi që pas raportimit në media, Komuna e Drenasit e ka pezulluar për të dytën herë atë, për të njëjtin rast.

I njëjti, sipas vendimit të cilin e ka siguruar Gazeta Express nuk do të kthehet në punë deri me një vendim të Gjykatës, ndërsa, gjatë kësaj kohe do të marrë pagë 50%.

Më herët ai ishte pezulluar për gjashtë muaj, dhe i njëjti edhe pasi që ishte rikthyer në shkollë, nuk kishte pasur orë mësimi me vajzën.

Vajza kishte raportuar në polici krejt rastin, e sipas deklaratave të saj, ajo kishte rrëfyer se krejt historia me të cilën përfshihen marrëdhënie seksuale me profesorin kishte zgjatur një vit e gjashtë muaj.

Këto deklarata i kishte tërhequr kur ishte pyetur në prani të prindit, e për këtë rast kishin pushuar hetimet në janar të vitit të shkuar.

A.G, 17 vjeçare gjatë kohës kur kishte shkuar për ta denoncuar këtë rast në polici, ishte takuar me Vesel Veselin, polic, e i cili dyshohet se më vonë do ta dhunonte për një kohë, e pastaj, të njëjtën do ta detyronte që të abortonte. Veseli tashmë është arrestuar.

Doktori i cili e ka kryer abortin, pa dëshirën e vajzën, Fehmi Ahmeti, siç mëson Express është Shef i Repartit të Onkologjisë, ndërkaq, abortin ia ka bërë vajzës në ordinancën e tij private, krejt kjo me pretekstin se nuk e kishte ditur se vajza ishte e moshës së mitur.

  • Si kishte nisur e gjithë historia me profesorin?

Historia e vajzës kishte nisur në qershor të vitit 2016’të. Atëherë A.G (emër i njohur për redaksinë), tash 17 vjeçare, kishte filluar të fliste përmes Facebook’ut me Shkelzen Xhekajn të cilin e kishte edhe fqinj, por, që i njëjti jepte mësim edhe në shkollën ku mësonte vajza.

Të dy këta jetojnë në fshatin Poklek në Komunën e Drenasit dhe ishin njohur mes vete edhe familjarisht, edhe para se vajza të shkonte në shkollë të mesme.

Sipas deklaratës që kishte dhënë ajo në Polici, dy herë, kur kishte munguar arsimtarja e cila jepte lëndën e njëjtë me Xhekajn, Shkelzeni e kishte zëvendësuar atë dhe kështu kishte ligjëruar në klasën e A.G.

Fillimisht, të dy këta, e mitura dhe arsimtari, kishin filluar komunikimin përmes Facebook’ut, e më pas, edhe kishin pirë kafe në fshat.

Siç kishte deklaruar e mitura në polici, zakonisht të dy takoheshin në orën 13:00, e pas një kohe që të dy vazhduan të takoheshin së bashku, kishin kryer edhe marrëdhënie seksuale.

Krejt kjo histori kishte vazhduar për një vit e gjashtë muaj, deri kur për rastin ishte njoftuar edhe gruaja e arsimtarit.

Në polici, e mitura edhe kishte dhënë detaje se si kishte filluar marrëdhënia me Xhekajn.

“Kemi dalë me Shkelzenin me pi kafe te ordinanca “….”, në fsh. Poklel i Ri, dhe zakonisht jemi dalë pas orës 13:00 dhe pastaj kemi shkuar në Prishtinë. Kemi pas marrëdhënie seksuale në veturën e Shkelzenit e cila ishte e parkuar te fusha e futbollit “Bejtë Rexhepi”, koha ishte e ftohtë dhe ishte diku pasdite rreth orës 20:00”, kishte thënë A.G para policisë.

E njëjta, kishte thënë se për këtë ka edhe prova, madje di edhe motelin në të cilin shkonin zakonisht, e aty e njihnin edhe personat që punonin aty.

“Kemi shkuar në një motel në Prishtinë, lokalin e di, por emrin nuk ia di dhe kam një foto në telefonin tim, derisa isha në Fushë Kosovë edhe personat që punojnë aty na njohin mirë”, shtonte ajo.

Nga profesori, që edhe atë kohë ishte i martuar e me fëmijë, kishte marrë premtimin se krejt rrugët e të dyve do të rregulloheshin, pasi që e mitura të përfundonte shkollën e mesme.

Madje, kishte disa raste, kur ai i kishte dhënë tableta kundër shtatzënisë vajzës.

“Ai më ka premtuar që rrugët tona do të na çelen masi unë të mbaroj shkollën, nga janari i 2016 deri në përfundim në qershor të vitit 2017 kemi shkuar në hotel dhe kemi pasur marrëdhënie seksuale. Shkelzeni më ka dhënë tablet mos me mbetë shtatzënë”, rrëfente ajo.

A.G, madje, i kishte thënë policisë se e kishte takuar edhe gruan e profesorit të tij, të cilën e njihte edhe më herët, e që para saj kishte thënë se profesori ia ka shkatërruar jetën.

Autor i artikullit: GazetaExpress.

Mustafa akuzon Kadri Veselin për grevën në arsim

Kryetari i Lidhjes Demokratike të Kosovës, Isa Mustafa ka fajësuar kryetarin e Kuvendit, Kadri Veselin për grevat në arsim.

Mustafa ka shkruar në Facebook se Veseli i gjeti paratë për ngritjen e pagave në arsim, për të cilat sipas tij Haradinaj nuk i kishte.

I pari i LDK-së ka thënë se grevat i ka organizuar Kadri Veseli, duke pretenduar se për këtë bëri edhe marrëveshje për ndërprerjen e grevës.

“Pesëqind mijë nxënës pësuan tre javë mësim për lojëra politike të Kadri Veselit. Ai sot, në rolin e ‘Kryeministrit’ arriti marrëveshjen me Sindikatën për ndërprerjen e grevës. Veseli i gjeti dhe i premtoi paratë, për të cilat Kryeministri Haradinaj deklarohej se nuk ka. Nga kjo rezulton se Veseli si Kryetar i PDK-së dhe i Kuvendit i ka organizuar grevat prandaj edhe bëri marrëveshjen për dalje nga greva”, ka shkruar Mustafa.

Ai gjithashtu ka thënë se po e pret marrëveshjen që Veseli do ta bëjë javën e ardhshme.

“Ndryshe si shpjegohet roli i Kryetarit të Kuvendit ( speaker -it) në këtë proces, kur këto janë përgjegjësi të ministrit të arsimit dhe të kryeministrit?! Shohim se çfarë marrëveshje tjetër do të bëjë Veseli javën e ardhshme”, përfundon postimi i Isa Mustafës në Facebook.

Ndryshe, greva në arsim u pezullua sot pas një marrëveshje ndërmjet SBASHK-ut dhe qeverisë.

SBASHKU tregon a janë plotësuar kërkesat e tyre 100%

Kryetari i SBASHK-ut, Rrahman Jashari është ndarë i kënaqur me marrëveshjen që kanë arritur me kryeministrin Ramush Haradinaj dhe kryeparlamentarin Kadri Veseli.

“Ishte kënaqësi dje e filluam një raund të ri, sot arritëm marrëveshje. Lëvizja e re na ofron shumë kërkesave tona”, tha Jasharaj.

SBASHK-u ka vendosur ta ndërpresë grevën në arsim, pas marrëveshjes që është arritur me krerët e institucioneve.

Edhe këta të fundit, kanë pohuar së ky është një lajm i mirë për arsimin në vend, teksa kanë pohuar se të shtunën pritet edhe të votohet Projekt-buxheti për vitin 2019 dhe Ligji për Paga.

Universiteti Prishtinës vlerësohet lartë nga “Webometrics”

Në edicionin e janarit 2019-të, Ranglista me prestigjioze e rangimit të universiteteve botërore, Webometrics, rendit Universitetin e Prishtinës “Hasan Prishtina” në pozitën 1471 në botë.

UP-ja në këtë edicion ka shënuar ngritje për 1662 pozita që nga viti 2018, duke shënuar kështu rritjen më të madhe ndonjëherë në këtë ranglistë për UP-në.

Sipas këtij publikimi të Webometrics, UP-ja zë vendin e 565-të në Evropë, ndërkaq renditet në vendin e tetë në rangimin e universiteteve në rajon, duke lënë prapa vetës universitetet e Nishit, Sarajevës, Shkupit dhe Tiranës.

Vlen të theksohet se katër vjet më parë Universiteti i Prishtinës zinte vendin e 4,937 në këtë ranglistë.

Rangimit të Webometrics i nënshtrohen më tepër se 12.000 universitete nga mbarë bota. Webometrics në mënyrë unike përdor analizimet e linqeve të cilat ata citojnë për të ofruar një vlerësim më kualitativ, i cili konsiderohet si mjet më i fuqishëm sesa analiza e citimit ose anketat globale.

Së fundi UP-ja ka shënuar ngritje edhe në databazën e SCIMAGO-s duke u ranguar në vendin e 713 në këtë databazë.

Mediat ndërkombëtare për grevën: 500 mijë nxënës në shtëpi

Sektori i Arsimit në Kosovë kanë hyrë në ditën e tyre të 10-të të grevës në Arsim dhe nuk po japin shenja dorëzimi apo fillimi të procesit mësimorë.

Puntorët në sektorin e Arsimit po kërkojnë nga Qeveria e Republikës së Kosovës përmbushjen e kërkesave të tyre për rritjen e koeficientit në Projektligjin për Pagat.

Greva nga sektorit i Arsimit në Kosovë, ka bërë bujë edhe në mediat e huaja ndërkombëtare, transmeton Teleshkronja Post.

Reuters shkruan se mësimdhënësit kosovarë për shkak të grevës kanë bërë që 500 mijë nxënës dhe studentë të mbesin në shtëpi për më shumë se një javë.

Gjithashtu theksohet se edhe mjekët dhe minatorët kanë ndërmarrë veprime për grevë për paga më të larta dhe punonjës të tjerë të sektorit publik po kërcënojnë ta bëjnë këtë, pasi të jetë propozuar një ligj që do të rriste pagat për shërbyesit civilë dhe punonjësit e tjerë të Qeverisë.

Rritja e madhe e pagës së vitit të kaluar për kryeministrin Haradinaj – në 2,950 euro në muaj nga 1,443, gjithashtu renditet me disa punonjës publikë.

“Hapi i parë që zyrtarët qeveritarë do të bënin është rritja e pagave për veten dhe stafin e tyre dhe ata na lënë në një mënyrë të mjerueshme”, është shprehur për Reuters Kadire Preniqi, e cila jep mësim në një shkollë fillore në kryeqytetin e Prishtinës.

Ndërsa ekonomisti, Naim Gashi, ka deklaruar se grevat e sektorit publik shfaqin pakënaqësi rreth mospërputhjeve të pagave duke treguar dhe shembuj.

”Ka raste kur dikush që i lan enët në një institucion publik paguhet më shumë se një mësues”, ka thënë ai.

Ruud Vermeulen, përfaqësuesi rezident i Fondit Monetar Ndërkombëtar në Kosovë tha se rritja e pagave prej 30 përqind do të ishte një barrë shumë e madhe për ekonominë, të cilën FMN-ja pret të rritet 4.2 përqind këtë vit, krahasuar me 4 përqind në 2018.
“Një rritje prej 10 për qind e pagave për mësuesit do të kushtonte rreth 13-14 milionë euro, ose rreth 0.2 për qind të GDP-së (prodhimi i brendshëm bruto), një rritje prej 30 për qind do të kushtonte tre herë më shumë”, shkruan ai në një email për Reuters.

Ndërsa para dy ditësh kryekuvendari Kadri Veseli bëri një kërkesë për zbritje page, e nëse kjo aprovohet atëherë koeficienti i pagës së tij dhe deputetëve do të zbritej nga 11 në 9 në Projektligjin për Sistemin e pagave.

“Fati i mësuesit kosovar, është në dorën e ngelësve të tij”

Nga: Nezir Kraki

Injoranca s’e kupton mësuesin

Disa megjithatë presin që mësuesit e Kosovës të sillen sikur t’ishin mesues suedezë, dmth pa arsye të forta për grevë, sikur të jetonin në një vend me moral social e politik. Çfarë marrëzie!

Jo o dashamirë, mësuesi i Kosovës ka 20 vite (pas luftes) që shikon i pafuçishëm se si injoranca ia shkaterroi edhe shkollat edhe shtetin. Tash është normale që e njejta injorancë të mos ia kuptoj hallin.

Mësuesi i Kosovës ka 20 vite që është i zënë rob dhe i shatazhuar nga bandat që herë i kërkojnë favore « shkollimi » e herë e kërcënojnë me metoda ndëshkimi.

Edhe më zi…
Mësuesi i Kosovës ka 20 vite që me habi takon ish nxënësit e tij ngelës tash të kravatuar dhe me tituj akademikë, me rroga 5 deri ne 10 herë më të larta se të tijën.

Mësuesi i Kosovës ka 20 vite që është shembull i durimit dhe i qytetarisë në një shoqëri të tejprishur nga apetiti personal.

Po pra, u bënë 20 vite që mësuesi i Kosovës endet kokëulur në shtetin ku shoferi i një kravate injorante çmohet më shumë sesa misioni fisnik i transmetimit të dijes.

Merreni me mend, sot fati i mësuesit është në dorën e ngelësve të tij, në dorën e kravatave injorante që shkollën e shohin si humbje kohe.

Dmth, sot, mësuesi është i obliguar t’i kërkojë ndihmë dhe mirëkuptim injorancës.

Çfarë tmerri!

MASHT’i dhe DKA’të kërkojnë që të ndërpritet greva

Ministri i Arsimit, Shkencës dhe Teknologjisë, Shyqiri Bytyqi, ka mbajtur sot një takim me drejtorët e Drejtorive Komunale të Arsimit (DKA).

Aty është diskutuar për gjendjen e krijuar pas fillimit të grevës në arsim dhe mundësitë për të dalë nga kjo situatë

Në një komunikatë të dërguar nga MASHT’i, thuhet se gjatë këtij takimi, secili nga drejtorët e DKA-ve u deklaruan se janë kategorikisht kundër grevës dhe shprehën besimin e tyre që akterët vendimmarrës shumë shpejt të gjejnë një zgjidhje, e cila do të rezultojë me ndërprerjen e grevës.

“I bëhet thirrje SBAShK-ut për ndërprejn e grevës në të gjithë sistemin arsimor, në veçanti nëpër çerdhe që nga dita e nesërme; U formua grupi punues që do të udhëhiqet nga ministri Bytyqi, pjesë e të cilit do të jenë tre drejtorë të DKA-ve dhe një përfaqësues nga Këshilli i Prindërve, grup i cili do të zhvillojë takime me përfaqësues të SBAShK-ut dhe akterët tjerë vendimmarrës në funksion të arritjes së një zgjidhje”, theksohet në komunikatë.

Jasharaj: Ministri Bytyqi pajtohet me greven por se pranon publikisht

Kreu i Sindikatës së Bashkuar të Arsimit, Shkencës dhe Kulturës të Kosovës (SBASHK), Rrahman Jasharaj, ka thënë se pozita e ministrit të Arsimit, Shyqiri Bytyqi, nuk ia lejon që publikisht të thotë se janë në përkrahje të grevës.

Rrahman Jasharaj, ka thënë se edhe Ministria e Arsimit, Shkencës dhe Teknologjisë (MASHT) mbështet grevën e mësimdhënësve, por që sipas tij, ministrit Shyqiri Bytyqi, nuk ia lejon posti që të dalë publikisht dhe të thotë se e mbështet grevën e mësimdhënësve.

Këto komente kreu i SBASHK-ut i bëri pas takimit me mësimdhënësit e shkollës fillore “Elena Gjika”, në Prishtinë.

Sipas tij, vet ministri Bytyqi përkrah kërkesat e tyre.

“MASHT më në fund është në të njëjtin front të luftës me ne. Sa i përket koificientëve dhe ligjeve janë me ne mirëpo, natyra e punës së ministrit nuk e lejon që të dalë në media e të thotë se e përkrah këtë grevë”, deklaroi Jasharaj, duke shtuar se në MASHT janë optimist që do të ndryshojnë gjërat, raporton lajmi.net.

Në këtë takim me mësimdhënës, Jasharaj po ashtu deklaroi se greva do të përfundoj vetëm në momentin kur të plotësohen kërkesat e tyre dhe se sipas tij, çdo kush që tenton t’i bëj presion apo t’i kërcënoj grevistët, SBASHK do të ndërmarr hapa konkret dhe do të bëj kallëzim penal.

Tutje ai ka thënë se këtë mund ta bëjnë pasi që padinë për personat që pengojnë grevistët ia lejon ligji.

Zyrtarisht nesër nuk ka mësim, SBASHK-u në grevë

Nesër nuk do të ketë mësim, por do të ketë grevë, këtë vendim e ka marr SBASHK-u, transmeton Teleshkronja Post.

Përmes një njoftimi në Facebook, Sindikata e Bashkuar e Arsimit, Shkencës dhe Kulturës e Kosovës ka thënë se kanë marr vendim që nesër të filloj greva në gjitha instutcionet arsimore publike në vend.

Kjo grevë do të filloj nga ora 09:00-12:00 çdo ditë:

Postimi i SBASHK-ut:

Të nderuar, anëtarë të SBASHK-ut.

Ashtu siç edhe jeni të informuar, përmes mjeteve të informimit por edhe nga kryetarët e sindikatave të institucioneve tuaja, si dhe nga kryetarët e sindikatave të komunave tuaja, Këshilli Drejtues i SBAShK-ut në mbledhjen e vet të datës 10.01.2019, në mënyrë unanime ka marrë vendim që i tërë sistemi arsimor duke i përfshirë Çerdhet, Shkollat Fillore dhe të Mesme të Ulëta, Shkollat të Mesme të Larta dhe Universitetet të fillojnë Grevën e Përgjithshme nga data 14.01.2019, nga ora 9:00 deri 12:00, deri në realizimin e kërkesave.
Kërkojmë nga ju që secili të bisedoj gjatë kësaj kohe me prindërit e institucionit tuaj, të kërkoni mirëkuptim dhe përkrahjen e tyre dhe ti bëni me dije, se greva nuk është vullnet i yni, por është një domosdoshmëri për ta rregulluar ligjin e pagave i cili ka qindra defekte, dhe përgjegjës për këtë grevë janë institucionet e Kosovës që nuk janë marrë seriozisht me paralajmërimet e SBAShK-ut, që nga viti 2016, por edhe që nga prilli i vitit 2018.

Gjatë këtyre ditëve mund të plasojnë edhe informata që tentojnë ta përçajnë grevën, e një e tillë e rrejshme veç u përhap sot ne rrjetet sociale gjëja se është anuluar greva,por ju të dashur anëtarë të SBASHK-ut duhet të bazoheni vetëm në informatat që vijnë nga SBASHK-u përmes përfaqësuesve tuaj të cilët ju vetë i keni zgjedhur për ta udhëhequr grevën në institucionin tuaj, po ashtu mund të informoheni nga lajmet në web-faqen e SBASHK-ut, www.sbashk.-rks.org, si dhe në Facebook: SBAShK – Sindikata e Bashkuar e Arsimit, Shkencës dhe Kulturës e Kosovës.

SBASHK do t’ju mbaj të informuar në çdo kohë për negociatat eventuale që do të zhvillohen në institucionet e Kosovës, dhe ju siguron se pa përmbushjen e kërkesave tuaja greva nuk do të përfundon.

Me respekt,
Rrahman Jasharaj- Kryetar i SBASHK-ut
Prishtinë, më 13 janar 2019 ora 13,15

Mësimdhënësit marrin një superlajm

Mësimdhënësit e viteve 90-ta kanë marrë një lajm të mirë nga komisionit Parlamentar për Integrime Evropiane.

Projektligji për statusin e punëtorëve të arsimit shqip të viteve 1990-1999 është dërguar në Kuvend nga Komisioni Parlamentar për Integrime Europiane, duke konstatuar se nuk ka ndonjë shpërputhje me legjislacionin e Bashkimit Europian.

Nënkryetari i këtij komisioni, Armend Zemaj (LDK) tha se ky projektligj është i duhur pasi u njeh mundin që kanë bërë arsimtarët gjatë atyre viteve, duke shtuar se “njohja e statusit të tyre është tej zgjatur tash e disa vite”.

Anëtari i Komisionit për Integrime, Ismajl Kurteshi (VV) njëherit edhe kryetar i Komisionit Parlamentar për Arsim tha se bashkësia ndërkombëtare ka njohuri për këtë ligj pavarësisht kritikave të tyre.

“Gjatë punës në Komisionin për Arsim ne kemi mbajtur debate në lidhje me këtë projektligj. Aty kanë qenë të ftuar të gjitha palët, si Ministria e Financave ajo e Punës dhe Mirëqenies Sociale po edhe të gjitha organizatat ndërkombëtare, edhe pse një pjesë e tyre nuk e kanë përkrahë për shkak të implikimeve buxhetore, ky ligj është i njohur për ta”, tha Kurteshi.

Kurse, anëtari tjetër i këtij komisioni, Milaim Zeka (NISMA), tha se kohëve të fundit janë duke u aprovuar shumë kërkesa nga sindikatat dhe shoqata e ndryshme që, sipas tij, po e rëndojnë buxhetin e Kosovës.

“Unë nuk jam kundër këtij projektligji por kështu si ia kemi nis kemi me bankrotu shtetin, sepse kohëve të fundit jemi duke aprovuar shumë kërkesa nga të gjitha anët prej të gjitha sindikatave dhe shoqatave të ndryshme vetëm për faza kalimtare dhe nuk po I analizojmë veprimet, megjithatë i kuptoj brengat e arsimtarëve”, tha Zeka.

Visar Ymeri nga PSD tha se Komisioni për Integrime Europiane nuk është përkatës për vlerësimin e këtij projektligji por, sipas tij, arsimtarët e meritojnë njohjen e kontributit që e kanë bërë gjatë viteve ’90-ta.

“Ne duhet të kemi kujdes me të drejtat që po ua japim shtresave të ndryshme të shoqërisë, si me veteranët dhe shumë pensione të tjera sepse kjo e mundon buxhetin. Por mendoj se problem nuk është vetëm te kjo kategori por edhe tek të tjerat që duhet ta rregullojmë njohjen e kontributeve me një kod pensional”, tha ai.

Ai po ashtu shtoi se mësimdhënësit duhet të fokusohen më shumë në rritjen e koeficientit në projektligjin për paga, gjë të cilën ai e kërkoi që të ulet paga e presidentit sipas këtij projektligji.

Kurse Ismet Beqiri nga LDK tha se falë mësimdhënësve të viteve ’90-ta “sot flasim e shkruajmë shqip”.

Anëtari i këtij komisioni nga PDK, Zenun Pajaziti tha se secili deputet ua ka borxh njohjen e kontributet të këtyre mësimdhënësve, sepse janë bërë shumë premtime nga të gjitha partitë.

“Unë mendoj se ky ligj nuk duhet të kthehet prapa sepse në foltoren e Kuvendit secili prej nesh ka dhënë përkrahje për këtë kategori dhe madje edhe gjatë zgjedhjeve janë bërë premtime”, tha Pajaziti.

Kurse sipas anëtares të VV-së, Fatmire Kollçaku, mungesa e reformave pensionale po vazhdon të jetë problem kryesor pse shumë kategorive nuk u njihet kontributi.

Komisioni për Integrime Europiane po ashtu ka miratuar edhe Projektligjin për mbrojtjen e të dhënave personale dhe tri ligje të përkrahjes për sportin, të cilat sipas anëtarëve nuk janë në kundërshtim me legjislacionin e Bashkimit Europian.