Pacolli: Serbia s’duhet ta njohë patjetër Kosovën

Ministri i jashtëm i Kosovës, Behgjet Pacolli, në një intervistë dhënë “AgenziaNova” gjatë vizitës së tij në Romë, ka thënë se Kosova mund të jetë e kënaqur me rezultat e shumta të arritura, kur pak ditë e ndajnë nga kremtimi i dhjetë viteve që nga shpallja e pavarësisë (17 shkurt 2008), pavarësisht se pesë vende të BE-së ende nuk e njohin “faktin që ne jemi shtet”.

Pas takimit në Ministrinë e Jashtme Italiane me ministrin Angelino Alfano, të cilin e ka përshkruar si “të shkëlqyer dhe të dobishëm për rrugën e integrimit evropian” të Prishtinës, Pacolli ka marrë pjesë në Società Dante Alighieri për prezantimin e biografisë së tij “Asgjë nuk është e pamundur”.

Në njoftimin e zyrës së MPJ-së, vend i lihet edhe lavdit për punët private të biznesmenit Pacolli.

“Ministri i Jashtëm i Kosovës është në fakt edhe themeluesi i kompanisë ndërkombëtare të ndërtimit Mabetex, e cila ka restauruar Kremlinin dhe ka ndërtuar shumë ndërtesa të kryeqytetit të Kazakistanit Astana, dhe është një mbështetës i dialogut në Ballkan për të krijuar një ‘antikamera’ rajonale me qëllim integrimin në BE”.

“Për mua është një gjë e mrekullueshme që Kosova është e pavarur: jam i kënaqur me mënyrën se si gjërat kanë shkuar edhe pse disa vende ende nuk na njohin si shtet”, citohet të ketë thënë Pacolli në intervistën për “AgenziaNova”.

Sipas ministrit të jashtëm “ka një dallim midis pavarësisë së Kosovës dhe aspiratës së popujve të tjerë të jenë të pavarur”, pasi në rastin e Tirolit Jugor në vitet shtatëdhjetë, ose tashmë e Katalonjës pretendimet “kanë si bazë një jetë të rregulluar dhe standarde të larta jetese”, prandaj kërkesat e tyre janë “luksoze”, ndërsa “Kosova për të mundë të ekzistuar duhet të ishte e pavarur, sepse ka ndodhur një shfarosje dhe një konflikt”.
“Kosova ka bërë shumë në këto vite”, thotë Pacolli. “Që nga shpallja e pavarësisë në vitin 2008, kanë kaluar dhjetë vjet: kemi ndërtuar një shtet, institucione dhe kemi një legjislacion modern dhe infrastruktura funksionale”, njofton zyra e tij.

Sipas mendimit të tij, fakti që pesë shtete të Bashkimit Evropian nuk e kanë njohur ende pavarësinë e Kosovës është negativ, “por ne dimë arsyet” për të cilat ata nuk kanë zgjedhur të ndërmarrin këtë hap. Përveç rastit të veçantë të Spanjës, për të cilën janë të vlefshme shqetësimet në lidhje me legjitimitetin e forcave të brendshme secesioniste në vendet Baske dhe në Katalonjë, sipas Pacollt katër vendet e tjera të BE-së kanë zgjedhur këtë linjë për “arsye veçanërisht fetare”, pasi bëhet fjalë për kombe me një shumicë të krishterë ortodokse: Greqia, Qipro, Sllovakia dhe Rumania.

“Për Spanjën, situata është pak më ndryshe”, thotë ai, ndonëse duhet thënë se edhe Katalonja përfaqëson një “situatë të ndryshme” krahasuar me rastin e Kosovës.
“Por ne nuk jemi të zemëruar”, vazhdon ministri, duke thënë se ai është i bindur se herët a vonë do të ketë një përafrim të të gjitha vendeve të BE-së mbi pavarësinë e, siç i referohet MPJ-ja, Prishtinës.

“Sigurisht”, shton Pacolli, mungesa e njohjes nga këto pesë vende të BE-së ka penguar rrugën e integrimit evropian të Kosovës, por jo aq shumë saqë të mos mund të njihej nga 115 vende në botë dhe të mos bëhet anëtare e 62 organizatave të ndryshme rajonale dhe ndërkombëtare.

Përveç kësaj, me disa demokraci të mëdha kemi marrëdhënie të shkëlqyera: Shtetet e Bashkuara, Japonia, Kanadaja, vendet evropiane si Italia, Gjermania dhe Franca”.
“Natyrisht, do të ishte e drejtë që të pranohej ky realitet, pasi që Kosova tashmë ekziston dhe asgjë s’mund të bëhet për ta ndryshuar atë”, përfundon ai.

Duke kaluar te marrëdhëniet me Serbinë, Pacolli thotë se dialogu do të ketë një shtysë në muajt e ardhshëm, pavarësisht nga ngjarjet e fundit të ndodhura në Mitrovicën e Veriut me vrasjen e udhëheqësit serbo kosovar, Oliver Ivanoviq.

“Serbia nuk duhet ta njohë domosdoshmërisht pavarësinë e Kosovës, por nuk duhet të ndalë udhëtimin e Prishtinës drejt Evropës”, thotë Pacolli pasi “ne e pranojmë Serbinë si një fakt ekzistues shumë të rëndësishëm për paqen dhe stabilitetin në Ballkan dhe e dimë që Beogradi mund të kontribuojë shumë në këtë drejtim “dhe prandaj” duhet të pranojë faktin se Kosova është shtet i pavarur “.

“Nëse ne nisemi nga ky fakt, edhe dialogu për normalizimin e marrëdhënieve duhet të shkojë më mirë”, ka thënë Pacolli. Sipas tij “2018 do të jetë një vit vendimtar” për dialogun ndërmjet Prishtinës dhe Beogradit, në mënyrë që të “diskutohen gradualisht çështje të rëndësishme për të mirën konkrete të qytetarëve “.

Duke kaluar te tema për iniciativën parlamentare për shfuqizimin e Gjykatës Speciale për krimet e Ushtrisë Çlirimtare të Kosovës (UÇK), Pacolli e bën të qartë se në çdo rast nuk do të dëmtohen marrëdhëniet me aleatët ndërkombëtarë.

“Mendoj se Kosova nuk do të dëmtojë marrëdhëniet me bashkësinë ndërkombëtare, për shkak se shumica e qytetarëve të Kosovës nuk e dëshiron atë, ajo dëshiron, që Gjykata Speciale të vendosi drejtësinë”, thekson Pacolli, por, gjithashtu vë në dukje se lindja e kësaj organizate, me seli në Hagë, e krijuar në vitin 2015 nga një ligj kosovar, “ndoshta nuk ishte e drejtë” sepse “duhet të kishte trajtuar edhe krime të tjera” dhe jo vetëm ngjarjet, që ndodhën në 18 muajt e fundit të konfliktit në Ballkan.

“Juridiksioni i Gjykatës Speciale”, shpjegon ai “duhet të shkonte edhe më tej prapa në kohë, në mënyrë që të mos ishte i kufizuar vetëm për anëtarët e UÇK-së, por edhe për të hetuar të tjerët të cilët kanë kryer krime gjatë konfliktit në Ballkan”. Por, përsërit edhe nëse një rishikim i ligjit themelues do të ishte i dëshirueshëm, “ne nuk mund të bëjmë asgjë dhe tani ne duhet ta pranojmë ashtu siç është: Kosova duhet të respektojë të gjitha detyrimet e marra në nivel ndërkombëtar”.

Sipas Pacollit, për më tepër, fakti që një mungesë e mundshme e Bashkimit Evropian në rajonin e Ballkanit mund të plotësohet nga Rusia është një “problem i vërtetë”.
“Unë mendoj se Evropa nuk duhet të ndalojë së qëni e pranishme në Ballkan, por duhet të rrisë këtë prezencë, sepse ky territor është i NATO-s dhe i Evropës. Pra, nuk është mirë të shkosh në shtëpinë e të tjerëve dhe të diktosh rregullat “.

Së fundmi, Pacolli përmend çështjen e liberalizimit të vizave në BE për qytetarët kosovarë. Sipas Ministrit të Jashtëm të Prishtinës, mungesa e liberalizimit të vizave u pengon shumë të rinjve kosovarë lirinë e lëvizjes dhe të udhëtimit.

Dhe mungesa e liberalizimit të vizave është lidhur nga BE me ratifikimin e marrëveshjes për kufijtë me Malin e Zi, një hap që parlamenti i Kosovës nuk mund ta përmbushë për shkak të qëndrimit të opozitës.

Sidoqoftë, Pacolli përfundon me një shënim pozitiv, duke folur për një “proces gradual” të bazuar në dialogun rajonal. Në këtë drejtim, Kosova ka patur tashmë dy takime ndërqeveritare me Shqipërinë këtë vit, një takim me ish Republikën Jugosllave të Maqedonisë dhe ndoshta do të ketë një tjetër deri në fund të vitit me Malin e Zi.

Lexo më shumë në: http://www.gazetaexpress.com/lajme/pacolli-serbia-s-duhet-ta-njohe-patjeter-kosoven-491862/?utm_source=referral&utm_medium=web&utm_campaign=copyright

Deputeti i LDK-së: Kosova po i prish marrëdhëniet me SHBA-të dhe BE-në

Deputeti i LDK-së, Haxhi Avdyli ka thënë se Kosova po i prish marrëdhëniet me SHBA-të, BE-në dhe vendet mike duke iu referuar kështu zhvillimeve të fundit politike në vend.

“Dëmi më i madh që po i bëhet Kosovës nga kjo qeveri është që po shkatërron aleancat disa dekadëshe me SHBA-të dhe Evropën”.

“Kemi prishje të raporteve me Parlamentin Evropian, që Kosova kishte raporte shumë të mira historikisht dhe për herë të parë nuk aprovohen konkluzionet e përbashkëta të deputetëve të Parlamentit të Kosovës dhe Parlamentit Evropian, këto janë shenja të këqija”, ka treguar ai.

“Pozita e Kosovës po degradohet në arenën ndërkombëtare. Marrëdhëniet me shtetet mike po prishen dhe aktet tona që po marrim tani janë të riparueshme”.
Avdyli në studion e Info Magazine të Klan Kosovës ka thënë poashtu se pajtohet se Gjykata Speciale është e padrejtë, por sipas tij, tani nuk mund të zhbëhet kjo gjykatë sepse është shumë vonë.

“Gjykata është e padrejtë por nuk kemi bërë punë sa duhet, gjithë klasa politike që me diplomaci të shkojmë në kancelaritë ndërkombëtare dhe të ndalim pretendimet e Serbisë por sot nuk ka kthim prapa”.

“Nuk mund ta ndalim Specialen por mund të ndalim proceset e Kosovës në avancimin e saj”.

Por se Kosova po prish marrëdhëniet me vendet mike ndërkombëtare nuk pajtohet deputeti i PDK-së, Hajdar Beqa që ishte poashtu i ftuar në Info Magazine të Klan Kosovës.

“22 dhjetori ka qenë ditë jo e rëndomtë për Kosovën, kanë qenë disa deklarata edhe të shteteve mike, edhe të shteteve të Kuintit jo të mira në drejtim të Kosovës por nuk kam parë që kemi prishur raporte”, ka thënë Avdyli

“Konsideroj që është e rëndësishme të forcojmë edhe më shumë raportet me SHBA-të dhe BE-në, vendi ynë ka nevojë të zhvillohet, integrohet dhe të krijojë miqësi të reja por edhe prej miqve ndërkombëtarë, konsideroj se nuk duhet të kemi vetëm kushte po përkrahje”.

“Jemi i vetmi popull në rajon që nuk e kemi të drejtën elementare të lëvizjes, konsideroj se plotësojmë kriteret”.

“Nuk konsideroj që kemi prishje të raporteve me ndërkombëtar, si deputet i Kosovës, nëse shoh se Qeveria ka hyrë në drejtim të gabuar do ta pengoja me votë. Shohim se Qeveria ka dinamikë të mirë dhe presim performancë edhe më të mirë, për momentin do ta mbështesim për të realizuar objektivat e qytetarëve”.

Baton Haxhiu i përgjigjet Albin Kurtit: Politikan me petkun e kriminelit

Baton Haxhiu i është përgjigjur Albin Kurtit, përmes një kolumne të shkruar enkas për Gazetën Express. Përgjigjja e Baton Haxhiut, mjaft e ashpër, tregon raportet e tij me Kurtin ndër vite. Gjuhën e Kurtit, ndër të tjera, e quan të ngjashme me atë të Vojsllav Sheshelit.

Mbrëmë e shikova një intervistë të Kryetarit të Lëvizjes Vetëvendosje. Një përgjigje për gjithë intervistën do ia jap më vonë, por tash dua të deklarohem shkurtimisht për disa gjëra.

Nga pikëpamja e deklaratës së Kryetarit të VV-së nuk do të duhesha të flisja fare. Televizioni im është i të gjithë shikuesve. Edhe i këtij njeriu. Është e kotë të tentohet të bëhet një skandal, sepse ky njeri që nga fillimi ka synuar që me skandale të mbetet në skenë.

Profesionalisht jam i obliguar ta kem ekranin të hapur edhe për të, siç e kam pasur në të kaluarën.

Herën e fundit kur ishte mysafir në Klan Kosova, gjatë fushatës zgjedhore, e kemi pasur një përplasje për shkak të sjelljes së tij të pashije. Nuk dua të tregoj se çfarë i kam thënë.

Për ta neutralizuar skandalin brenda partisë, pra për vetveten, Kryetari i Lëvizjes Vetëvendosje nga mbrëmë e ka gjetur një shënjestër për radikalët e çmendur. Mua.

I pafuqishëm, i dobët, herë-herë irracional në rrëfim, ai ka ndërtuar një tregim që ngjan me atë të secilit injorant në kafenetë e këqija provinciale. Aty ku është streha e fundit e horrave. Aty ku, nga mbrëmë, përfaqësohet edhe ai.

E njoh gjatë kryetarin e Lëvizjes Vetëvendosje, por asnjëherë nuk kam pasur përplasje të madhe direkte. E di që e kishim një letërkëmbim në vitin 2001, për shkak të një gënjeshtre të tij publike, dhe më pas konsideroja se kisha të bëja me një wannabe kryetar të kamufluar.

Kam qenë unë, bashkë me disa miq dhe kolegë, që e kemi shndërruar në person publik më 1997. Dhe për këtë ka faj edhe grupi ynë në Koha. Por, kjo është e kaluar.

Ai nuk më njeh nga afër dhe s’di asgjë për mua. As për familjen dhe as për të kaluarën time. Dhe, pranoj se jam fajtor që e kam ndihmuar një person në imazhin publik për flokët dhe jo për dijen e tij dikur. Sot dijen që e krijuar e ka për rrënim.

Ne mund të jetojmë në epokën e pasvërtetës, por në fund të fundit, asgjë nuk na shpëton nga e vërteta. Qëndrimi për të vërtetën ishte dhe mbetet gjithmonë misioni im.

Profesionin tim nuk ka të bëjë me të qenit neutral, pa pasion, pa qëndrim. Ka të bëjë me qëndrimin për versionin më të mirë të mundshëm të së vërtetës. Në rastin tim, kjo e vërtetë ishte ajo që ka kontribuar në bërjen e shtetit të Kosovës, me aq sa kam mundur, dhe kjo do të kontribuojë edhe në të ardhmen e saj. Këtu fillon dhe përfundon përgjegjësia ime.

Unë nuk jam përgjegjës ndaj politikanëve. Por, ndjehem i obliguar që ta analizoj politikën e tyre që bëjnë. Pra, edhe të Kryetarit të Lëvizjes Vetëvendosje. Në këtë drejtim, të gjithë akterët në këtë lojë do të gjykohen gjithmonë sipas kontributit të tyre në të ardhmen e Kosovës. Ndoshta kemi versione të ndryshme të asaj të ardhme. Sepse nuk jam as vrasës, as pengues dhe as pretendues i kalljes së institucioneve.

Sepse është shumë e lehtë t’i mashtrosh njerëzit me zemërim dhe urrejtje. Me sulme brutale, me gënjeshtra, me minimin e të gjitha institucioneve që janë në ndërtim e sipër dhe ende nuk kemi arritur t’i përfundojmë në këto 10 vjet.

Unë e di që në këtë moment ju dhe Lëvizja Vetëvendosje keni nevojë për të gjetur një armik më të madh se sa problemi juaj.

Ju keni nevojë për një objektiv të ri për ta larguar vëmendjen nga gabimet e juaja.

Nga mungesa e vendimeve të lidershipit, të krizës së identitetit në Lëvizjen Vetëvendosje, për shkak se anëtarësia ka nevojë dhe dëshiron në këtë moment të jetë diçka më shumë sesa thjesht një lëvizje anti-pushtet, ju vazhdoni ta përdorni ndjenjën popullore vetëm për ta sfiduar çdo respekt te tjetrit.

Tash, brenda Vetëvendosjes keni njerëz që duan të respektohen.

Ju nuk mund t’i heshtni ata, kështu që duhet të krijoni zhurmë më të egër.

Kryetari i Lëvizjes Vetëvendosje me vendimet e reja dëshiron t’i kthehet rrënjëve politike, në primitivizëm, në sulm në emër të sulmeve, në manipulim me të vërtetën.

Ju duhet ta ndani kombin edhe më shumë, përtej pajtimit, për ta thyer lojën në të cilën po humbni fuqinë dhe me këtë ta bëni veten përsëri të nevojshëm.

Kështu që ju keni nevojë për mua që ta krijoni atë zhurmë të pakuptimtë, pa mëdyshje shumë primitive, bazuar në nevojat e juaja dhe jo në fakte. Ju keni nevojë për mua që të jeni ju, pra, që të bëni betejë të humbur brenda Lëvizjes Vetëvendosje.

Por, unë nuk kam nevojë për ju.

Dhe ju e dini këtë.

Unë kam nevojë për politikë përgjegjëse, për lojën që nuk ka të bëjë me pozicionet dhe fuqinë e zhveshur, por me të ardhmen dhe dinjitetin e kombit. Ndoshta ju keni disa ide për të ardhmen, por nuk kemi parë shumë dinjitet ne idetë që i përfaqësoni.

Ashtu siç i keni përmendur disa akterë të së kaluarës, mos harroni se në vitet 1990, unë kam pasur kundërshtarë më të egër dhe më të fuqishëm se ju. Por, besoja, siç besoj tash, se kam qëndruar dikur dhe vazhdoj të qëndroj i tillë për të ardhmen reale të Kosovës. Ajo ka vlerën dhe fuqinë e vet, pa marrë parasysh se çfarë është kostoja.

Dhe e rrejshmja është e rrejshme, pa marrë parasysh sa me zë të lartë thuhet.

Nuk është patriotizëm ai, i cili në të vërtetë punon më mirë për ata që nuk kanë interes për një Kosovë të qëndrueshme dhe të pavarur. Dhe nëse doni të flisni për spiunë, le të flasim për këtë. Kur te doni. I hapim të gjitha letrat dhe detajet e angazhimeve tona publike.

Unë nuk fsheh asgjë. As nga e kaluara ime, as nga familja, as nga gjyshërit e mi dhe prejardhja ime. Jemi aq larg në çdo gjë, në të gjitha zhvillimet e epokave, sa nuk krahasohemi dot.

Ju, Kryetar i Lëvizjes Vetëvendosje, nuk mund të jeni politikan dhe rebel i vazhdueshëm pa shkak. Keni hyrë në lojën politike dhe qëllimi juaj përfundimtar është ta fitoni ndeshjen. Por, kjo përfshin edhe rrezikun e humbjes. Edhe me peshën e pafuqisë duhet ta duroni dhe nuk iu lejohet duke bërë lojën e politikanit me petk krimineli.

Kështu nuk mund ta fitoni betejën për pushtet.

Veçanërisht nëse ajo për të cilën po flisni nuk qëndron në realitet.

Kjo mund të funksionojë me afat të shkurtër, por qytetarët e Kosovës janë me mbingarkesë të gënjeshtrave, urrejtjes dhe zemërimit.

Ata duan diçka tjetër. Ata kanë nevojë për diçka tjetër.

Dhe unë gjithmonë do të qëndroj për këtë aty që t[ kontribuoj pozitivisht duke mos fshehur asgjë.

Në Kosovë është e patolerueshme përsëritja e të njëjtave gabime. Një vend me kaq vuajtje nuk mund të mbajë politikanë kriminelë. Dhe një politikan me diskurs të Sheshelit.

Është vdekje politike, bashkë me besimin e gënjeshtërt që jeni munduar ta krijoni prej kaq vitesh.

Përplasje e ashpër Lladrovci – Drenori: Kush bre s’guxon me e gjujtë mikrofonin

Në Kuvendin Komunal të Drenasit ka pasur një debat të ashpër.

Kryetari Ramiz Lladrovci është përplasur ashpër me Xhavit Drenorin nga opozita për një mikrofon.

Shikoni videon më poshtë për të parë ngjarjen.

Donika Kadaj: S’ka demokraci aty ku lideri është mbi organizatën !

Deputetja nga radhët e Lëvizjes Vetëvendosje, Donika Kadaj-Bujupi ka komentuar zgjedhjet e partisë nga ku u shpall fitues Albin Kurti.

Donika Kadaj-Bujupi ka folur rreth “kryetarllëkut” brenda Vetëvendosjes, duke thënë se kjo parti ka ardhur në një pikë ku gjithë të tjerët punojnë si nënpunës të liderit, transmeton Teleshkronja.

“Ajo që e shoh si kryesore, është fakti se mënyra se si përjetohet rëndësia e liderit në LV – e shndërron çdo zyrtar të saj në njeri të panevojshëm. Është situatë edhe e frikshme, por edhe pikëlluese. Erdhëm në pikë kur brenda organizatës mund të funksionojmë vetëm si nëpunës të liderit Po. Për fat të keq, gjatë kësaj kohe në LV u zhvillua një qasje e tillë – ku lideri shihej si formulë për ndryshime kadrovike. Pra, me shkuarjen e Visarit duhej të shkonte një ekip i njerëzve (shembull, SP)… Dhe, me ardhjen e Albinit duhej të vinte një ekip tjetër…”, ka thënë ajo në një emision në RTK.

Zëvendëskryeministrin e Kosovës e zë gjumi në seancë

Gjatë ditës së sotme, është vërejtur mjaftë shumë mosinteresimi i deputetëve për pikat e rendit të ditës së seancës plenare.

Sot zëvendëskryeministri Dalibor Jevtiq ka zgjedhur Kuvendin e Kosovës që të bëjë një “sy gjumë”

Ai shihet nuk ishte aspak i interesuar nga ajo se çfarë po diskutohej në Kuvend dhe për një çast është “kotur” në seancën e Kuvendit të Kosovës.

Molliqaj: Ka inicizime në VV, ku Albini thotë se duhet të bëjmë koalicion me PDK’në

Ish-sekretari organizativ i Lëvizjes Vetëvendosje, Dardan Molliqaj, ka thënë se kryetari i ri i partisë, Albin Kurti, në muajin prill të vitit 2016 kishte kërkuar që të mos viheshin vija të kuqe për koalicion të mundshëm me Partinë Demokratike të Kosovës.

Molliqaj ka thënë në Rubikon të KTV’së se partia ka dëshmitë për deklaratën e Kurtit.

“PDK është konstantja në pushtet, ndërsa variablat po ndryshojnë”, ka thënë Molliqaj të ketë deklaruar Kurti.

“Ekziston incizimi me kamerë. Video-incizim i mbledhjes së prillit 2016 debati mes meje dhe Kurtit”, ka treguar Molliqaj.

“Vetëm le të deklarohet se s’është e vërtetë dhe le të besojë publiku. Nëse ai deklarohet se po them diçka të pavërtetë, le ta publikojnë”, është shprehur Molliqaj.

“Ai ka thënë tekstualisht se ne duhet t’i heqim vijën e kuqe ndaj PDK-së. Ishte mbledhja e Këshillit. Kur fitojmë ne do të bëhen ndryshime në PDK e LDK. Duhet të shohim se kush e përkrah më shumë programin tonë, PDK apo LDK”, ka bërë të ditur ai.

Molliqaj: Albin Kurti dhe Xhelali i nxitën aktivistët e VV’së për të na rrahur

Ish-sekretari organizativ i Vetëvendosjes, ka thënë se kryetari Albin Kurti dhe deputeti tjetër Xhelal Sveçla, kishin mobilizuar një grup aktivistësh që t’i rrahin anëtarët e kryesisë që nuk ishin pro kandidaturës së Kurtit për kryeministër në zgjedhjet qendrore.

“Ka pas mobilizim të aktivistëve që të na rrahin kush jemi kundër Kurtit kryeministër. Albini e Xhelali i kanë thirrur. Ka qenë nën organizimin e tyre”, ka thënë Molliqaj në Rubikon të KTV-së.

Molliqaj ka thënë se në VV kishte pasur kusht që të mos lejohej kandidatura e tij për deputet.

“Ai u kishte thënë se tash nuk kanë besim në mua dhe se unë kam paraqitur rrezik”, ka thënë ai.

Molliqaj ka thënë se anëtari i VV-së në Shqipëri, Boiken Abazi, i kishte kërkuar të mos fliste një vit.

“Më kërkoi të shkoj në Tiranë dhe të mos flas për një vit. I duhesha atyre atje që të më besonin se s’kam plane kundër Kurtit”, ka thënë ai.

Ai theksoi se është krejtësisht gënjeshtër deklarata se Molliqaj kishte kërkuar moskandidimin e Kurtit.

Dardan Molliqaj: Albin Kurti është i rrezikshëm për Kosovën !

Ish-sekretari organizativ i Vetëvendosjes, Dardan Molliqaj, ka thënë se kryetari i Vetëvendosjes, Albin Kurti, ka qasje politike të rrezikshme për Kosovën.

“Duke u nisur nga ajo që jam përballur në 15 muajt e fundit në parti, kam parë që nëse bëhet ajo që është bërë brenda në parti, çka mund të bëhet kur ai të merr kontrollin e shtetit, policinë dhe gjykatat.

Kushdo që mendon që Albini nuk është rrezik le ta votojnë, a bën të ma lejojnë që unë të mendoj ndryshe. Shpresoj që të mos jetë ashtu, por përvoja ime 15 mujore dhe faktet po flasin kështu”., ka treguar Molliqaj.

“Ata që besojnë ndryshe, le të mendojnë ashtu. Unë po i ftoj ata që të mos thonë i thashë e më thanë, hajde le të debatojmë për faktet që i kemi, ta mbyllim këtë çështje dhe t’i lëmë qytetarët ta vlerësojnë”, ka thënë ai.

Molliqaj po ashtu thotë se gjasat për pajtim të të dorëhequrve nga Vetëvendosje me të tjerët që po përkrahin kryetarin aktual Albin Kurti, janë minimale.

Ish-sekretari organizativ ka thënë se grupi i të pakënaqurve në Vetëvendosje është i madh. Ka thënë se ai personalisht nuk do të shkojë në ndonjë parti tjetër ekzistuese, teksa ka lënë të hapur opsionin për parti të re.

Megjithatë, ka thënë se ky vendim vjen vetëm pas takimit me të pakënaqurit tjerë.

Ish-gazetari serb në Kosovë hyn në grevë urie, kërkon përkrahje nga shteti i Kosovë

Ish-gazetari serb në Kosovë hyn në grevë urie, kërkon përkrahje nga shteti i Kosovë

Ish-gazetari serb në Kosovë, Bojan Bozhoviq, ka hyrë në grevë urie me arsyetimin e vetëm se ka mbetur pa punë dhe pa përkrahje nga shteti i Kosovës.
Në postimin e tij në Facebook, Bozhoviq ka shkruar se ndodhet në spitalin rajonal në jug të Mitrovicës, duke marrë trajtim mjekësor pasi ka probleme me zemër.

Ai thotë se do të qëndrojë në grevë urie derisa zyrtarët e vendit të reagojnë në përmirësimin e kushteve të jetës së tij dhe familjes.

Ky është postimi i plotë:

Të nderuar miq. Është dita e dytë që kam vendosur të hy në grevë urie dhe as ujë të mos pi në mënyrë që të tërheq vëmendjen për pa drejtësinë karshi meje.

Nuk kam punë të siguruar dhe asnjë lloj ndihme nga shteti i Kosovës e tani as dokumentet personale nuk mund t’i marrë. Nuk mund të marrë patentë shoferin pa një dëshmi nga MUP-i serb e ju të gjithë e dini se unë në Serbi asnjëherë ma nuk dua të shkoj.

Për këtë arsye kam vendosur që t’i lutem presidentit ,kryeministrit dhe ministrit të policisë të më gjejnë një punë adekuate dhe pas asnjë lloj kushtëzimi të ndryshojnë patentë shoferin e Republikës së Serbisë me atë të Republikës së Kosovës.

Deri sa nuk më plotësohen këto dy kushte nuk do marr ushqim dhe ujë e as terapi për zemër.

Mjekët në spitalin e Mitrovicës jugore më kanë këshilluar që nëse nuk marr ilacet dhe ujin gjendja e shëndetit tim do të përkeqësohet gjatë ditës.

Ndërsa unë megjithatë kam vendos të vazhdoj me grevën deri sa të më plotësohen kërkesat dhe pres përgjigjen nga zyrtarët kosovar.

Jam sigurt se edhe gazetarët kosovar gjithashtu me mbështesin për të realizuar të drejtat e mia dhe do të informojnë për kërkesat e mia.