Ramush Haradinaj në Drenicë, iu lë bakshish shahirave (VIDEO)

Kryeministri në largim i Kosovës, Ramush Haradinaj dje ka qëndruar në odën e anëtarit të ri të AAK-së, ish-asambeistit të PDK-së, Naim Bazajt.

Naim Bazaj e ka pritur tashmë bashkëpartiakun, Haradinajn në odë me ‘shahirë’ që këndonin këngë të vjetra me çifteli.

Gjatë kësaj ndeje, Bazaj ka dashur ta nxjerrë kuletën, por është ndalur nga Haradinaj. Ky më pas e nxjerrë kuletën dhe ua gjuan disa para këngëtarëve.

Naim Bazaj ishte asamblisti më i votuar i PDK-së në Drenicë. Ai dje u anëtarësua në AAK, ku u prit nga Haradinaj.

Shikoni videon më poshtë, ku shihen Haradinaj e Bazaj së bashku duke i lënë bakshish këngëtarëve./TeleshkronjaPost/

Naim Bazaj pret Haradinajn në konak, zyrtarisht pjesë e AAK-së

Ish-anëtari i Partisë Demokratike të Kosovës në komunën e Drenasit, Naim Bazaj, sot priti në odën e tij kryeministrin e dorëhequr, Ramush Haradinaj dhe bashkëpunëtorët e tij.

Haradinaj u prit nga dhjetra vetë në vizitën e tij tek Bazaj, ku edhe zyrtarisht njoftoj se ky i fundit iu është bashkuar Aleancës për Ardhmërinë e Kosovës.

Këtë e ka njoftuar vet Haradinaj përmes një postimi në Facebook, shkruan Teleshkronja Post.

Ish-kryeministri në statusin e tij në Facebook i thuri lëvdata Bazajt, duke e quajtur si një nga komandantët më të suksesshëm të UÇK-së.

Kujtojmë se deri para pak muajsh Bazaj ishte pjesë e PDK-së, por u largua nga aty pasi nuk mori besimin e ish-partisë për kryetarë të degës në Drenas, pasi drejtimin e mori Sejdi Hoxha.

Më poshtë mund ti shihni disa foto të takimit në Drenas./TeleshkronjaPost/

Ramush Haradinaj kthehet nga Haga, thotë se do ta vazhdojë punën

Kryeministri në dorëheqje i Republikës së Kosovës, Ramush Haradinaj është rikthyer nga Haga pas intervistimit që pati nga Gjykata Speciale.

Kjo u bë e ditur përmes një shkrimi që ai ka postuar në rrjetet sociale ku ka treguar se që nga nesër do të vazhdoj përsëri me punë.

Tutje, ai tha se kufijtë e Kosovës nuk guxon t’i prekë askush dhe se nuk mund të na imponohet një Dodik Republika.

Ai foli edhe për zërat se kryerja e detyrave qeverisëse pas dorëheqjes është jo kushtetuese.

Të dashur qytetarë,

Sapo u ktheva nga Haga, e nesër vazhdojmë me punë. Pas dorëheqjes sime kam kryer obligimin ligjor pranë Prokurorisë së Dhomave të Specializuara. Pafajësinë time nuk mund ta vë në pikëpyetje askush. I kthehem obligimeve të mia në Kosovë. Vendimi im për dorëheqje dhe veprimet e mia të fundit janë porosi se çfarëdo abuzimi ndaj Kosovës, që vjen, nuk do të na lëkundë nga e drejta jonë sovrane. Kufijtë e Kosovës nuk guxon t’i prekë askush. Kosovës nuk mund t’i imponohet Dodik Republika. Tregu për njohje po, e taksa deri në njohje. Dialog pa kushte, po menjëherë.

Të dashur qytetarë,

Dëgjoj zëra se kryerja e detyrave qeverisëse pas dorëheqjes, është jo kushtetuese. Si Qeveri në dorëheqje, ashtu siç e kam cekur edhe në vendimin tim për dorëheqje, do t’i kryejë detyrat, se nuk guxoj të lë vakuum qeverisës, sepse Kosova nuk mund t’i bartë pasojat e vakuumit qeverisës. Me respekt për ta, palët që mendojnë ndryshe i ftoj t’i drejtohen Gjykatës Kushtetuese. Çfarëdo që të jetë vendimi i Gjykatës Kushtetuese do ta respektoj.

Na priftë e mbara!

RH

Tahiri tregon kush e çoi Adem Jasharin për t’u ushtruar në Shqipëri

Gjatë rrëfimit të tij publicisti Ramush Tahiri foli edhe për rolin e Lidhjes Demokratike të Kosovës në vitet e ’90-ta.

Ai thotë se në Shqipëri në fillim kanë shkuar dy grupe, Adem Jashari, Sali Çeku.

“Ata i kanë dërguar këshilli i partive politike, e që mund të thuhet se i ka dërguar LDK-ja ose Haviz Gagica nga Gjermania, ose dikush tjetër, por jo LPK-ja”.

“Ka pasur anëtarë të LPK-së që kanë kaluar në LDK. Tendenca atëherë ka qenë që e gjithë LPK-ja të del në legalitet”, u shpreh ai.

Tahiri në Rubikon të KTV’së ka thënë se në atë kohë nuk ka pasur tendenca që të mbahen fshehtësi, pavarësisht se cilave parti u takonim.

Ai tha se nuk ishte LDK-ja, trupat nga Prishtina, të cilët e dërguan për të ushtruar Adem Jasharin.

Madje, Tahiri tha se kishte tendencë nga LDK-ja që të dallohen nga të tjerët, të paraqiten më ekskluzivë, por, thotë ai, kjo s’ka qenë e nevojshme.

“Nëse mendohet se LDK-ja në Kosovë e ka dërguar Adem Jasharin në Shqipëri, jo, sepse listat do të dalin, nuk kanë dalë ende. Në Ferizaj i ka bërë Ahmet Hoxha, është dëshmor, hero i popullit, është vrarë në burgun e Dubravës. Është njohur personalisht me Adem Jasharin, e ka bartur madje disa herë nga Tetova në Kosovë nëpër mal, bile në disa raste jam edhe vet dëshmitar, por në këtë kohë ne këto i kemi ditur dhe nëse flas tash, nuk flas nga pikëpamja e LPK-së, LDK-së apo e Demokristianëve. Unë jam ndjerë keq në dy tri raste kur kanë ardhur nga Kosova, nga kryesia e LDK-së, dhe kanë filluar të tërhiqen vetë, ‘hajde ne të LDK-së po shkojmë po hamë darkë e bisedojmë vet’”.

Meta me vajzën e tij viziton Haradinajn në Prishtinë

Ish-kryeministri i Kosovës, Ramush Haradinaj, pas dorëheqjes së tij po vazhdon të relaksohet me takime miqësore, por edhe politike që i kontribuojnë vendit tonë.

Derisa ai dje kohën e kaloi pranë familjes së tij, sot Haradinaj në Prishtinë ka mirëpritur presidentin shqiptar, Ilir Meta dhe vajzën e tij, Borën.

Postimi i Haradinajt dhe foto e postuara nga ai:

“Kënaqësi e veçantë të takoj sonte në Prishtinë Presidentin e Shqipërisë, Ilir Meta, bashkë vajzën Borën. Rast i mirë për të këmbyër mendime rreth aktualitetit politik në Kosovë, Shqipëri dhe rajon. Në proceset që po kalon Kosova, angazhimi i përbashkët përballë sfidave e fuqizon faktorin shqiptar”, ka shkruar Haradinaj në një postim të bërë në faqen e tij zyrtare Facebook.

Ndryshe, Haradinaj dha dorëheqje nga posti i tij pas marrjes së ftesës nga Gjykata Speciale, për arsyen e vetme, të intervistohet si qytetar i thjeshtë, e jo si kryeministër i Kosovës.

Reagon Thaçi pas ftesë së Krasiniqit nga Specialja: ‘Sërish do të dalim fitimtarë.’

Sot në mëngjes u bë publik lajmi se edhe ish-eprori i Ushtrisë Çlirimtare të Kosovës, Jakup Krasniqi, është ftuar nga Gjykata Speciale në Hagë.

Kjo u bë e ditur nga vet Krasniqi në një postim publik në Facebook, raporton Teleshkronja Post.

E me të marrë vesh lajmin, Presidenti i Republikës së Kosovës, Hashim Thaçi ka reaguar me një status.

Ai shkruan se asnjë gjykatë nuk mund ta gjykojë luftën e pastër të UÇK-së dhe se prapë shokët e tij do të dalin fitimtarë.

Postimi i plotë nga presidenti Thaçi:

Lufta e Ushtrisë Çlirimtare të Kosovës ka qenë dhe do të mbetet përjetësisht e pastër dhe e drejtë. Asnjë gjykatë, as vendore, as ndërkombëtare, nuk mund ta njollos atë. Me Jakup Krasniqin, me anëtarët e tjerë të Shtabit të Përgjithshëm, komandantët e zonave dhe ushtarët që janë ftuar nga Gjykata Speciale, ne e kemi mbrojtur popullin dhe e kemi luftuar armikun deri në çlirimin e vendit tonë. Si president i vendit, si bashkëluftëtar, e çmoj shumë gatishmërinë e të gjithëve që të bashkëpunojnë me drejtësinë. Duke bashkëpunuar me drejtësinë ndihmojmë që të ngadhënjejë e vërteta për luftën tonë çlirimtare. Jam i bindur që, njëjtë sikurse në të kaluarën, sërish do të dalim fitimtarë. Pastërtia e luftës sonë do të dëshmohet përballë çdo gjykate! HTH

Reagon më në fund Edi Rama për të ftuarit e UÇK-së nga Gjykata Speciale

Më fund ka një reagim nga kryeministri shqiptar, Edi Rama pas ftesave të bëra nga Gjykata Speciale në Hagë për ish-drejtuesit e UÇK-së.

Kryetarit të Partisë Socialiste në Shqipëri, i janë dashur më shumë se 24 orë që të shkruaj një postim në Twitter në lidhje me kaosin e krijuar në Kosovë.

Homologu i Edi Ramës një ditë më parë kryeministri i Republikës së Kosovës, Haradinaj dha dorëheqjen pas kësaj ftese, ndërsa mëngjesin e sotëm ishte ish-kryetari i Kuvendit të Kosovës, Jakup Krasniqi që njoftoi se ka marrë ftesë për t’u paraqitur në Gjykatën Speciale.

Gjithashtu janë ftuar edhe Bislim Zyrapi dhe Sokol Bashota.

Në reagimin e tij, kryeministri Edi Rama shkruan se ftesa për protagonistët e UÇK është një sfidë e papërfunduar kombëtare në anën e duhur të historisë, raporton Teleshkronja Post.

Deklarimi i plotë i kryeministrit shqiptarë, Rama:

“Këto ftesa në radhë nga Haga për protagonistët e UÇK, janë një sfidë e re e çdonjërit prej të thirrurve, në vazhdën 20-vjeçare të betejës së pasluftës, për të provuar deri në fund pafajësinë e tyre. Por janë edhe një sfidë e papërfunduar kombëtare në anën e duhur të historisë”, tha Rama.

Edhe Jakup Krasniqi ftohet nga Gjykata Speciale në Hagë

Jakup Krasniqi përmes një shkrimi të postuar në Facebook, ka njoftuar opinionin se ka marrë ftesë nga Gjykata Speciale.

Ky është njoftimi i tij përmes Facebookut:

Të nderuar bashkëkombës

Ndihem i obliguar moralisht t’ju njoftoj se kam marr ftesë nga Dhomat e Specializuara të Gjykatës Speciale në Hagë të paraqitem më 24 korrik 2019.

Pavarësisht bindjeve të mia që Gjykata Speciale e ngritur mbi bazën e raportit të Dick Martit, miratuar nga Këshilli i Evropës, i cili fund e krye është sajuar në Beograd me shpifje e gënjeshtra dhe me motiv e qëllim të komprometimit dhe inkriminimit të luftës së drejtë e të pastër të Ushtrisë Çlirimtare të Kosovës, përkundër qëndrimit tim të hapur kritik e kundërshtues për krijimin me presion të kësaj gjykate, unë do të prezantohem në hetuesinë e saj në datën e caktuar në cilëndo cilësi. Me besim në drejtësinë, i bindur se e vërteta është që gjatë luftës në Kosovë, Serbia ka kryer gjenocid, kurse konstruktet e saj monstruoze për UÇK-në do të bien poshtë, unë do të jem atje për të dhënë kontributin tim për ndriçimin e së vërtetës historike.

Megjithatë është fatkeqësi dhe ironi e llojit të vet, që në vend se Serbia të përballet me drejtësinë për krimet kundër njerëzimit dhe gjenocidit, ne duhet të mbrohemi nga akuzat e saj të trilluara, në vend që të gjykohen argumentet dhe provat e pamohueshme dhe të njohura botërisht, drejtësia merret me trille dhe shpifje të ulëta të politikës serbe dhe të shërbimeve të saj sekrete.

Përkundër bindjeve të mia sa i përket kësaj gjykate politike, të krijuar me presion politik nga njerëzit që bartin funksione të larta shtetërore në Kosovë dhe themelimin e saj me votën e atyre deputetëve që ishin numra në Kuvendin e Kosovës, unë do të prezantohem në hetuesinë e Gjykatës Speciale.
Nuk do të jetë hera e parë që dal para hetuesve për të dhënë përgjigje për çështje të sajuara nga pushteti i Serbisë. Ia kam dalë në proceset e hetuesisë jugosllave të viteve tetëdhjetë, siç ia kam dalë me përgjegjësi edhe kur jam ftuar nga Gjykata Penale Ndërkombëtare për ish-Jugosllavi, për rastet e kurdisura në bazë të dosjeve të dorëzuara nga Serbia kundër Fatmir Limajt, Ramush Haradinajt dhe bashkëluftëtarëve të tyre.

Në të dy rastet kam dhënë deklarata në cilësinë e zëdhënësit të UÇK-së, përfaqësuesit të saj politik dhe anëtarit të Shtabit të Përgjithshëm të UÇK-së gjatë luftës së viteve 1998-1999. Deklaratat e mia në Gjykatën Penale Ndërkombëtare për ish-Jugosllavi janë publike, siç është publik edhe verdikti i kësaj gjykate kur i hodhi si të pabaza të gjitha akuzat kundër Fatmir Limajt dhe Ramush Haradinajt, duke shpallur pafajësinë e tyre.

As kësaj radhe nuk mund të jetë ndryshe.