Avdiu për Halil Kastratin: Në mëngjes kërkon para për të varfrit, në mbrëmje ushqen milionerët

Aktivistja e njohur kosovare, Zana Avdiu, ka reaguar ndaj një veprimi të humanistit, Halil Kastrati

Ky i fundit ftoi mbrëmë, në dasmën e djalit të tij, disa politikanë milionerë.

Avdiu në fund të shkrimit i ka parashtruar një pyetje Kastaratit se në cilën parti po shkon:- PDK apo AKR?

Postimi i plotë në Facebook:

Halil Kastrati në mëngjes kërkon para për të varfrit, në mbrëmje i ushqen milionerët- ata që e krijuan këtë varfri

Profeti Muhammed ka thënë që prijësit fetare me të këqij janë ata të cilët shoqërohen me udhëheqës politikë.

Pastaj porosia tjetër që e jep profeti Muhammed e cila shkon kryekeput kundër veprimit të këtij hoxhe është: Ushqehuni sikur të jeni një udhëtar, mos shkoni në festa të të pasurve dhe veshjen mos e konsideroni të vjetër derisa mund ta qepni.

Të njëjtën gjë e kërkon ajeti kuranor, me plakun e verbër dhe të varfër, që profeti Muhammed pa dashje e neglizhon, duke u dhënë përparësi liderëve të Mekës. Kjo është nga herat kur Zoti e kritikon më së rëndi profetin.

Në cilën anë po qëndron imami i famshëm Halil Kastrati? Ne atë cka promovon islami apo në atë cka e ndalon?

Halil Kastrati meqë veprimtarinë e tij e ka zhvilluar, kinse mbi baza të fesë islame, atëherë ai së paku parimet bazë ishte dashur t’i zbatonte. Nëse ai është besimtar si pretendon, atëherë në ato tavolina të dasmës do të duhej t’ ishin ata njerez të cilëve u janë ndërtuar shtëpitë. Kështu ai do t’ u tregonte atyre se ata janë me vlera dhe nuk kanë se pse të turpërohen dhe do ta respektonte porosinë e profetit që kërkon të shoqërohemi me të varfrit dhe të dobëtit. Por Halili e bëri të kundërten, i ftoi milionerët, ata të cilët janë përgjegjës për varfërine e atyre që kinse ky u ndihmon.

Perderisa është ndaluar t’ u shkohet në festat luksoze të të pasurve, imagjino sa e ndaluar është ta bësh ti një të tillë dhe t’i ftosh ata aty. Një festë ultraluksoze, me njerëzit më të pasur, me oligarkët më të mëdhenj të vendit dhe me njerëzit e dyshuar për krime, ishte dasma e djalit të imamit të famshëm. Bravo!

Po e njëjta gjë ndodh edhe me iftaret që i organizojnë prijësit fetarë dhe xhamitë, në të cilat asnjëherë nuk ftohen të varfrit, minoritetet, gratë. etj etj. Por, në secilën tavolinë të tyre i ke po këta që i ka ftuar Halili në dasmën e djalit të tij.

Kjo është arsyeja pse feja në ditët e sotme ështe kthyer në një sistem të shtypjes dhe të ligës, sepse prijësit fetarë e interpretojnë vetëm në interesa të tyre. Feja momentalisht i mbron të pasurit, të fortëtn, shtypesit dhe i shtyp të varfrit, të margjinalizuarit dhe të diskriminuarit.

Vetëm shihi besimtarët ku asnjëherë nuk kërkojnë që të zbatohet feja e tyre per imam, për burra, për liderë dhe të pasurit, por zoti dhe feja e tyre vlen vetëm kur është kundër grave, LGBT-së, etj. Sipas prijësve fetarë dhe atyre që i ndjekin ata, asnjëherë nuk ndodh ndonjë tërmet apo nuk afrohet kijameti për shkak të vrasjeve, femijëve lypsarë, fundosjen e refugjatëve, përdhunimeve, trafikimit me njerëz, abuzimeve, skllavërimit me njerëz, analfabetizmit, korrupsionit etj etj., por kijameti ndodh nëse ndonjë grua i zbulon gjunjët apo mos po martohen dy burra. Kjo e tregon qartë hipokrizinë e tyre, të cilat ato cka janë bazë e fesë i injorojnë dhe fenë e përdorin vetëm aty ku u konvenon atyre.

Po t’ ishte feja kësisoji, profeti nuk do t’ ishte Muhammedi por Ebu Xhehli.

Të kthehemi edhe njëherë te Halili, ku fillimisht është parë se është një arrogant. Dhe më se miri këtë e tregon mënyra se si “ia fali gjynahet” Naim Abazit, ku i tha se të gjithë njerëzit gabojnë dhe ia falë. Pastaj si duket veprimtaria e tij me shumë është me i ndalë njerëzit prej revoltës kundër miqve të tij që i ka ftuar në dasmë, sesa t’ u ndihmojë

Dhe krejt në fund dua t’ia bëj një pyetje Halilit: A po shkon në PDK apo në AKR?

“Ushtria e Kosovës do ta ketë armatimin më të sofistikuar në rajon”

Deputeti nga radhët e Aleancës për Ardhmërinë e Kosovës Daut Haradinaj ka bërë me dije se qeveria me vënien e taksës nuk i ka bllokuar produktet serbe.

Ai për televizionin publik ka veçuar edhe marrëdhëniet Kosovë-SHBA i cili tha se Kosova nuk ka prishur kurrfarë marrëdhënie me SHBA-në sepse siç thotë ai ata janë miqtë e Kosovës.

Haradinaj po ashtu ka theksuar se Kosova po forcon ushtrinë më armatim të sofistikuar.

“Ne i kemi taksu produktet serbe dhe nuk i kemi blloku. Ne nuk e kemi blloku kufirin. Pikërisht SHBA-ja qet tarifa dhe taksa. Qëllimi kryesor i taksës është njohja nga Serbia. Ne një ditë do të arrijmë marrëveshje me Serbisë, prandaj taksa nuk është e përjetshme. Edhe serbët janë lodhur dhe po kërkojnë zgjidhje. Ka pakënaqësi të mëdha. Është absolutisht e pavërtetë që ne i kemi prish marrëdhenit me SHBA-në, sepse kemi miq të shumtë atje. Ne do ta forcojmë ushtrinë me armatimin me të sofistikuar, sepse do të na ndihmojnë miqtë tanë. Nëse fqinjtë tanë marrin armatim të ndryshkur nga Rusia, kurse ne kemi dhe do ta kemi armatimin modern nga SHBA-të”, ka thënë Haradinaj për televizionin publik.

Unikkatil takohet me Ramush Haradinajn

Ish-kryeministri i Republikës së Kosovës, Ramush Haradinaj ka takuar rep-artistin e famshëm Viktor Palokaj në zyren e tij.

Reperi i njohur me nofkën Unikkatil, i cili mbajti koncert madhështorë javën e kaluar në stadiumin “Adem Jashari” në Mitrovicë, publikoj një foto me Haradinajn, shkruan Teleshkronja Post.

Ndërsa ky i fundit ka postuar një foto me shkrim në Facebook, ku thotë:

Me rap artistin e famshëm Viktor Palokaj, i cili kudo që përformon, Kosovën e ka pikënisje. Unik në kuptimin e plotë të fjalës! RH

Ky takim mes Unikkatilit dhe Haradinajt mund të ketë ardhur si pasojë e qëndrimeve të të dyve kundër ndarjes së Kosovës.

Haradinaj e ka përmendur disa herë se sa kundër kësaj ideje është, ndërsa edhe Unikkatil në koncert e ka përmendur këtë, duke thënë se për këtë arsyeje ka zgjedhur Mitrovicën që të përformoj./TeleshkronjaPost/

Haradinaj acarohet me të moshuarin dhe i vërsulet edhe Agim Bahtirit

Bashkëbisedimi me qytetarët e Mitrovicës i organizuar nga Nexhmedin Spahiu, në të cilin ishin të pranishëm kryeministri në dorëheqje Ramush Haradinaj e kryetari i Komunës Jugore të Mitrovicës, është përcjellë me tensione të shumta.

Fillimisht kishte qenë kreu i AAK-së, Ramush Haradinaj, i cili ishte acaruar me një anëtarë të sindikatës së Trepçës, pasi ky i fundit i kishte thënë se do të ishte më mirë që gjysma e parave të dedikuara për autostradën e Dukagjinit, t’i ndahen Trepçës për gjenerim të vendeve të reja të punës.

I moshuari nga qyteti i Mitrovicës, madje i kishte thënë kryeministrit Haradinaj, se pavarësisht që vendimet merren nga një njeri, ato duhet të jenë të barabarta për secilin rajon të Kosovës, duke përmendur kështu edhe një rrugë në Mitrovicë që kishte mbetur pa u asfaltuar.

Kjo e kishte acaruar Haradinajn mjaft shumë, duke i thënë anëtarit të sindikatës së punëtorëve të Trepçës që “marre është me fol kështu”, me arsyetimin se Peja e Gjakova kanë bërë shumë për Mitrovicën.

E pas gjithë këtij tensioni, Haradinaj është përplasur edhe me kryetarin e Komunës Jugore të Mitrovicës, Agim Bahtirin, pasi ky i fundit i tha që e mori shumë afër zemrës deklaratën e të moshuarit nga Mitrovica.

“ Kryeministër pak e morre, rajonale.. Po nuk ke rajonale se na të repsketojna.”, iu drejtua Bahtiri, Haradinajt.

“Nëse do me bo debat unë me ty, hyjm në debat. Unë ia dhash një përgjigje prej zemre, po edhe me ty mundem me hy në debat kryetar”, ia kthen Haradinaj.

“Jo nuk e pata për debat, po e pat fjalën pak ma ndryshe po ska problem”, vazhdon Bahtiri.

Pas kësaj fjale të Bahtirit, Haradinaj acarohet edhe më tepër duke i thënë se s’ka nevojë për sqarimin e tij.

“Skam nevojë për ndihmën tonde, na shqip folim e merrem vesh. Nëse ki naj sen me mu fol, na merrem vesh në bisedë” ka vazhduar Haradinaj.

Pas kësaj ka folur përsëri Bahtiri, duke i thënë se nuk dëshiron të futet në debat me kryeministrin.Video nga minuta e 55-të.

Isa Mustafa: Nuk jam kandidat për kryeministër, do ta gjej dikë në LDK

Lideri i zgjedhur për herë të tretë i Lidhjes Demokratike të Kosovës, Isa Mustafa, ka thënë se ai nuk e ka ndërmend të jetë kandidat i kësaj partie për kryeministër dhe se partia do të zgjedhë një person që e “bën më së miri këtë punë, dhe natyrisht që ka përkrahjen e plotë të LDK-së dhe të qytetarëve.” Duke folur në një intervistë për Radion Evropa e Lirë, Mustafa ka thënë se partia që ai udhëheq, dëshiron të shkojë e vetme në zgjedhje por ky qëndrim mund të ndryshojë dhe varet se si veprojnë partitë tjera. Mustafa thotë se bisedimet me Serbinë duhet t’i udhëheqë kryeministri në pajtim me vendimin e Gjykatës Kushtetuese. “Taksa duhet të vazhdojë derisa Serbia të mos ndërrojë qëndrimet e veta dhe përderisa të mos reflektojë në të gjitha këto sjellje të bllokadës që po i bën Kosovës”, ka thënë Mustafa.

Radio Evropa e Lirë: Zotëri Mustafa, ju jeni zgjedhur për të tretën herë kryetar i Lidhjes Demokratike të Kosovës. Ka pasur edhe deklarata se zgjedhjet nuk kanë qenë shumë demokratike dhe se LDK-ja nuk po ndryshon. Si i vlerësoni këto deklarata?

Isa Mustafa: Ne kemi zhvilluar një proces që ka qenë demokratik, jo vetëm në Kuvend, por edhe në degë edhe nëndegë për një periudhë të gjatë kohore, nuk e kemi pasur një proces të lehtë prandaj konsideroj se e kemi mbyllur mjaft mirë dhe konsideroj se askush nuk mund të gjejë argumente se procesi nuk ka qenë plotësisht demokratik dhe plotësisht i hapur për çdo njeri që ka pasur dëshirë të kandidohet apo ka pasur dëshirë ta marrë vlerësimin e delegatëve të LDK-së.

Tash sfida e parë janë zgjedhjet nacionale të cilat do të jenë kah fundi i muajit shtator të këtij viti, pastaj sfidë tjetër do të jetë zgjerimi dhe forcimi i mëtutjeshëm i LDK-së, do të jenë zgjedhjet lokale dhe unë mendoj se do të dalim mirë si LDK këtu, sepse jemi unikë dhe e kemi të qartë se çfarë dëshirojmë dhe se çfarë mund t’iu ofrojmë qytetarëve të Kosovës.

Radio Evropa e Lirë: I përmendët zgjedhjet, a do të jeni ju kandidat për kryeministër?

Isa Mustafa: Unë sigurisht do të bëj përpjekje që të gjejë një kandidat tjetër brenda LDK-së dhe vetë të mbaj timonin e LDK-së, por do të bëjmë përpjekje që bashkërisht të diskutojmë më Këshillin e Përgjithshëm, Këshilli vendos për atë çështje dhe unë tani jam i orientuar që në këtë pozitë të jetë një njeri që ta bëjë mirë këtë punë dhe ta ketë besimin e qytetarëve të Kosovës.

Radio Evropa e Lirë: Nëse ju jo, si do ta zgjedhin kandidatin nga LDK-ja për kryeministër?

Isa Mustafa: Po do të gjejmë zgjidhje të brendshme, e cila çon nga njeriu i cili e bën më së miri këtë punë, dhe natyrisht që ka përkrahjen e plotë të LDK-së dhe të qytetarëve.

Radio Evropa e Lirë: A do të zgjerohet kryesia e LDK-së?

Isa Mustafa: Kemi mendim ta zgjerojmë, e kemi rritur edhe Këshillin e Përgjithshëm të LDK-së, do ta rrisim edhe numrin e anëtarëve të Kryesisë në mënyrë që të përfshijmë sa më shumë njerëz që mund të japin vlera, si dhe vendimmarrja të jetë ajo që e presin edhe anëtarësia e LDK-së edhe qytetarët.

Radio Evropa e Lirë: Zotëri Mustafa, a preferoni të bëni koalicione parazgjedhore apo paszgjedhore dhe me cilat parti?

Isa Mustafa: Ne jemi përcaktuar parimisht që të shkojmë vetë dhe të matemi para qytetarëve, mirëpo e gjithë kjo varet nga ajo se çfarë do të bëjnë tjerët, sepse nëse tjerët bëhen bashkë atëherë edhe ne duhet ta mendojmë alternativën tjetër. Por, parimisht ne i kemi ftuar edhe partitë tjera që të matemi para opinionit si parti se kush del i pari, i dyti, i treti e të tjera dhe pastaj pas raundit të parë, pas vlerësimit të qytetarëve, pastaj të bëjmë edhe koalicione varësisht nga programet politike dhe se çfarë mund t’i ofrojmë vendit në qeverisjen e ardhshme.

Tani nuk mund të flas për preferenca të veçanta se me cilën parti do të kishim bërë koalicion parazgjedhor, sepse duhet ta diskutojmë në organet e LDK-së, mirëpo do të bëjmë koalicion me atë që mendojmë se e drejton mirë Kosovën, do të luftojmë korrupsionin, krimin, do të ketë progres në zhvillimin ekonomik, në integrimet evropiane, ato euroatlantike edhe në procesin e dialogut i cili është përpara nesh.

Radio Evropa e Lirë: Pas zgjedhjeve, kush duhet t’i prijë bisedimeve me Serbinë, presidenti apo kryeministri?

Isa Mustafa: Gjykata e ka përcaktuar kush, do të thotë është kryeministri, është qeveria që e ka barrën ta bëjë këtë, ndërkaq presidenti e ka rolin e vet të këshillimit me kryeministrin në procesin e dialogut.

Radio Evropa e Lirë: Çka do të bëni që dialogu për normalizimin e raporteve Kosove – Serbi, të mos kushtëzohet nga Serbia?

Isa Mustafa: Ne do të kushtëzojmë edhe vetë dialogun, sepse ne nuk do të dialogojmë për çështjet që jemi përcaktuar si LDK që nuk i dialogojmë, çështjen e territorit, çështjen them pushtetit të tretë, çështjen e shtetësisë së Kosovës, nuk do të lejojmë që në asnjë rast ta vendosim në tryezë të bisedimeve.

Çështjen e përparimit, avancimit të të drejtave të njeriut, të minoriteteve, janë çështje që gjithmonë do të gjejnë hapësirë të dialogut, çështjet e zhvillimit ekonomik, çështjet e zgjidhjes së problemeve të drejtpërdrejta të qytetarëve, jo vetëm të serbëve por edhe të tjerëve, do të jenë preokupim i ynë. Por jo çështje për të cilat ne kemi marrë qëndrim dhe mendoj se qëndrimi është treguar shumë i saktë dhe i arsyeshëm.

Sa u përket çështjes së tarifave, që po ashtu është një çështje që ka mbetur të diskutohet, unë mendoj se ajo çështje duhet të jetë çështje e reciprocitetit, sepse nuk mund Kosova të vendosë për heqje të tarifave, përderisa Serbia sillet në këtë formë ndaj qytetarëve të Kosovës.

Në këtë rast kemi situata kur qytetarët tanë po presin mbi 6 orë të hyjnë në kufi, për arsye të pengesave qe po u bën Serbia me masa jotarifore, për të cilat askush nuk po reagon.

Radio Evropa e Lirë: Pra, ju thoni se taksa qind për qind ndaj produkteve të Serbisë duhet të vazhdojë?

Isa Mustafa: Taksa duhet të vazhdojë derisa Serbia të mos ndërrojë qëndrimet e veta dhe përderisa mos të reflektojë në të gjitha këto sjellje të bllokadës që po i bën Kosovës, edhe në njohjet ndërkombëtare, edhe ç’njohjet, por edhe në çështjet të themi të përditshme siç është lëvizja e lirë e qytetarëve, transportit të mallrave dhe çështjet tjera që ne i kemi diskutuar në Bruksel. Janë arritur marrëveshje por Serbia nuk po i zbaton.

Radio Evropa e Lirë: Kur jemi të dialogu, a mendoni se për dialog do të mund arrihet një konsensus i brendshëm politik?

Isa Mustafa: Unë mendoj se dialogu nuk mund të zhvillohet pa konsensues të gjerë politik të brendshëm. Dhe ajo duhet të bëhet, si do të gjejmë ne mënyrën që të ulemi së bashku në një tryezë, të gjitha subjektet relevante politike të Kosovës dhe të gjejmë një gjuhë të përbashkët dhe një interes të përbashkët, sepse nuk ka këtu interesa të veçanta pasi është në pyetje Kosova. Është çështje që do të jetë e mundimshme, do të jetë e rëndë por ne duhet gjithsesi ta bëjmë dhe të arrijmë.

Radio Evropa e Lirë: Në praktikat e kaluara kryeministri zakonisht ka kërkuar mocion mosbesimi ndaj Qeverisë së tij në Kuvend, kurse dorëheqja ishte një rast i ri. Si e keni parë ketë veprim dhe qeverisjen Haradinaj?

Isa Mustafa: Ne kemi dhënë vlerësimet se qeverisja ka qenë skandaloze. Kemi pas një qeverisje shumë të keqe dhe ne kemi pas të gatshëm mocionin e mosbesimit që atë ta procedojmë në fillim të shtatorit të këtij viti.

Kësaj i ka paraprirë veprimi i kryeministrit për të dhënë dorëheqje, natyrisht për një arsye krejt tjetër dhe ne kemi thënë se nuk do ta dëshironim që qeveria të bie për këtë arsye të ftesës që i është bërë kryeministrit nga Gjykata Speciale në Hagë.

Do të dëshironim që kjo qeveri të shkojë për shkak të defekteve të punës së keqe të skandaleve që kanë ndodhur gjatë këtyre dy viteve, të cilat mendoj se kanë qenë shumë të dendura dhe është vështirë tash ta shkoqitësh njërin nga tjetri sepse një skandal i sotëm e ka mbuluar skandalin e djeshëm dhe kështu me radhë është bërë një shtresim, i cili sigurisht do të shihet më vonë por, nuk mund të mbulohet me politika populliste.

Radio Evropa e Lirë: A prisni që situata aktuale në Kosovë të reflektojë edhe në vendimmarrjen e BE-së, sa i përket liberalizimit të vizave për Kosovën?

Isa Mustafa: Mosliberalizimi është një e padrejtë që po i bëhet Kosovës, sepse janë plotësuar të gjitha kushtet dhe institucionet e Bashkimit Evropian, dhe Komisioni Evropian ka konstatuar se Kosova i ka përmbushur këto kritere.

Unë mendoj se ajo duhet të ndodhë. Nuk ka ndodhur me këtë qeveri dhe këtë qeverisje, por duhet të ndodhë nesër, në momentin që i përfundojmë zgjedhjet dhe në momentin që kemi një qeveri të re.

Unë mendoj se Bashkimi Evropian, Komisioni Evropian, vendet e BE-së meqenëse tash është në kompetencën e tyre, duhet të reflektojnë që edhe neve të na e mundësojnë një lëvizje të lirë ashtu siç e kanë të gjithë qytetarët e tjerë evropianë e veçmas qytetarët e vendeve të Ballkanit Perëndimor, ku kemi mbetur vetëm ne të izoluar.

ZYRTARE: LDK zgjedhë kryetarin e ri, nuk ka befasi

Ish-kryeministri i Kosovës, Isa Mustafa është rizgjedhur kryetar i LDK-së për herë të tretë.

Me shumicë votash, delegatët e LDK-së vendosën që Isa Mustafa të jetë përsëri udhëheqësi i partisë, raporton Teleshkronja Post.

Procesi i Kuvendit Zgjedhor u mbajtë me dyer të mbyllura për publikun dhe ishte vetëm një kandidaturë për kryetarë.

Ish-presidenti Fatmir Sejdiu kërkoj që të hiqet kushti 50+1 për kandidim, por kjo kërkesë nuk u plotësua./TeleshkronjaPost/

Zyrtare: Presidenti Thaçi i kërkon koalicionit PAN mandatarin e ri për kryeministër

Presidenti i vendit, Hashim Thaçi, përmes një shkrese zyrtare dërguar bartësit të koalicionit fitues të zgjedhjeve të fundit, Kadri Veselit, i ka kërkuar edhe zyrtarisht koalicionit PAN që të propozojnë kandidatin e ri për ta mandatuar për formimin e Qeverisë së Kosovës.

Në këtë letër të presidentit Thaçi drejtuar Veselit thuhet se si koalicion fitues që kanë fituar shumicën e nevojshme në Kuvend për të formuar Qeverinë, kanë të drejtën e propozimit të kandidatit të ri për të formuar Qeverinë e Republikës së Kosovës.

Dokument: Proceduralisht, pas caktimit të mandatarit për formimin e qeverisë, pas propozimit të partisë politike ose të koalicionit që përbën shumicën e Kuvendit, kandidati i ri për kryeministër jo më vonë se pesëmbëdhjetë ditë pas emërimit, paraqet përbërjen e qeverisë së re para Kuvendit të Kosovës dhe kërkon miratimin nga ana e Kuvendit.

Nëse ajo përbërje e propozuar e Qeverisë nuk merr shumicën e votave të nevojshme, presidenti brenda dhjetë ditësh emëron kandidatin tjetër sipas së njëjtës procedurë. Nëse as herën e dytë nuk zgjidhet qeveria, atëherë presidenti i shpall zgjedhjet që duhet të mbahen jo më vonë se 40 ditë nga dita e shpalljes së tyre.

Foto dokumenti :

Ramush Haradinaj në Drenicë, iu lë bakshish shahirave (VIDEO)

Kryeministri në largim i Kosovës, Ramush Haradinaj dje ka qëndruar në odën e anëtarit të ri të AAK-së, ish-asambeistit të PDK-së, Naim Bazajt.

Naim Bazaj e ka pritur tashmë bashkëpartiakun, Haradinajn në odë me ‘shahirë’ që këndonin këngë të vjetra me çifteli.

Gjatë kësaj ndeje, Bazaj ka dashur ta nxjerrë kuletën, por është ndalur nga Haradinaj. Ky më pas e nxjerrë kuletën dhe ua gjuan disa para këngëtarëve.

Naim Bazaj ishte asamblisti më i votuar i PDK-së në Drenicë. Ai dje u anëtarësua në AAK, ku u prit nga Haradinaj.

Shikoni videon më poshtë, ku shihen Haradinaj e Bazaj së bashku duke i lënë bakshish këngëtarëve./TeleshkronjaPost/